SAMBIRU 01
Kumbi Bayibolu Lingakuwovyani Wuli?
Pafufupi munthu weyosi watijifumba vakukwaskana ndi umoyu, masuzgu, nyifwa ndipuso vo vichitikengi kunthazi. Kweniso tifipa mtima ndi mo tingachitiya kuti tisaniyi ndalama zakuguliya vinthu vakukhumbika pa umoyu ndipuso vo tingachita kuti banja lidu likondwengi. Ŵanthu anandi awona kuti Bayibolu limuka mafumbu ngakulungakulu pe cha kweniso le ndi fundu zo zingawovya munthu pa umoyu waki. Kumbi walipu yo muwona kuti Bayibolu lingamuwovya?
1. Kumbi Bayibolu limuka mafumbu nanga?
Bayibolu limuka mafumbu ngakukhumbika ukongwa yanga: Kumbi umoyu ukwamba wuli? Ntchifukwa wuli te ndi umoyu? Ntchifukwa wuli ŵanthu amampha nawu asuzgika? Ntchinthu wuli chichitika asani munthu wafwa? Ntchifukwa wuli pacharu pachitika nkhondu zinandi chinanga kuti munthu weyosi wakhumba kuja mwachimangu? Ntchinthu wuli chichitikengi pacharu chapasi kunthazi? Bayibolu lititichiska kuti tingalekanga cha kufufuza mpaka po tamukikiya mafumbu ngenanga. Ndipu ŵanthu anandi awona kuti Bayibolu limuka umampha ukongwa mafumbu ngenanga.
2. Kumbi Bayibolu lingatiwovya wuli kuti tikondwengi nyengu zosi?
Bayibolu le ndi fundu zakovya ukongwa. Mwakuyeruzgiyapu, litovya mabanja kuziŵa vo ngangachita kuti ngakondwengi. Lititikambiya so vo tingachita asani tasuzgika maŵanaŵanu ndipuso mo tingakondwe ndi ntchitu yo tigwira. Tichikambiskana vo ve mubuku ili, muziŵengi vo Bayibolu likamba pa nkhani zenizi ndipuso musambirengi vinandi. Namwi mufikengi pakuzomereza kuti “Malemba ngosi [ngo nge mu Bayibolu] . . . ngatovya.”—2 Timote 3:16.
Buku ili ndi Bayibolu cha. Mumalu mwaki, likuwovyeningi kuti muliziŵi umampha Bayibolu. Mwaviyo, titikuchiskani kuti muŵerengengi malemba ngo nge mu sambiru lelosi, ndipu muŵanaŵaniyengi vo musambirapu.
SAMBIRANI VINANDI
Wonani mo Bayibolu lawovyiyapu ŵanthu anyaki kweniso vo mungachita kuti mukondwengi asani mutiliŵerenga. Ndipuso wonani chifukwa cho pakhumbikiya munthu munyaki kuti wakuwovyeni kuti mulivwisengi.
3. Bayibolu lingatilongozga
Bayibolu le nge ukweru wakuŵala ukongwa wo utitimbulikiya. Lingatiwovya kuti tisankhengi umampha vakuchita kweniso lititiwovya kuziŵa vo vichitikengi kunthazi.
Ŵerengani Salimo 119:105, pavuli paki kambiskanani mafumbu yanga:
-
Kumbi yo wangulemba salimo ili waliwonanga wuli Bayibolu?
-
Nanga yimwi mutiliwona wuli Bayibolu?
4. Bayibolu limuka mafumbu ngidu
Munthukazi munyaki wanguwona kuti Bayibolu lingumuka mafumbu ngo ngamusuzganga maŵanaŵanu kwa vyaka vinandi. Woneriyani VIDIYO, pavuli paki kambiskanani mafumbu yanga:
-
Nge mo tawone mu vidiyo iyi, kumbi munthukazi uyu wenga ndi mafumbu wuli?
-
Nanga kusambira Bayibolu kungumuwovya wuli?
Bayibolu lititichiska kuti tifumbengi mafumbu. Ŵerengani Mateyu 7:7, pavuli paki kambiskanani fumbu ili:
-
Kumbi yimwi mwe ndi mafumbu wuli ngo mungayanja kuti Bayibolu likumukeni?
5. Mungakondwa ndi kuŵerenga Bayibolu
Ŵanthu anandi akondwa kuŵerenga Bayibolu ndipu awona kuti litiŵawovya ukongwa. Woneriyani VIDIYO, pavuli paki kambiskanani mafumbu yanga:
-
Nge mo tawone mu vidiyo iyi, kumbi achinyamata anandi atiyiwona wuli nkhani yakuŵerenga?
-
Kweni ntchifukwa wuli akamba kuti atanja kuŵerenga Bayibolu?
Bayibolu lingatipembuzga kweniso lingatipaska chilindizga. Ŵerengani Aroma 15:4, pavuli paki kambiskanani fumbu ili:
-
Kumbi mukondwa kuziŵa kuti Bayibolu lingakupembuzgani kweniso lingakupaskani chilindizga?
6. Anyidu angatiwovya kuti tilivwisengi Bayibolu
Chinanga kuti anyaki aŵerenga Bayibolu pakuŵija kweni awona kuti kukambiskana so ndi ŵanthu anyaki kutiŵawovya ukongwa. Ŵerengani Machitidu 8:26-31, pavuli paki kambiskanani fumbu ili:
-
Kumbi tingachita wuli kuti tilivwisengi Bayibolu? —Wonani vesi 30 ndi 31.
Munthu wa ku Ifiyopiya wakhumbikanga munthu munyaki kuti wamuwovyi kuvwisa Malemba. Ŵanthu mazuŵa nganu awona kuti ayanduwa ukongwa asani akambiskana nkhani za mu Bayibolu ndi ŵanthu anyaki.
ŴANTHU ANYAKI AKAMBA KUTI: “Kusambira Bayibolu nkhutaya waka nyengu.”
-
Yimwi muwona wuli? Nanga ntchifukwa wuli mwakamba viyo?
KUMBI MWASAMBIRANJI?
Bayibolu le ndi fundu zo zingatiwovya, limuka mafumbu ngakukhumbika ukongwa kweniso lipembuzga ŵanthu ndi kuŵapaska chilindizga.
Kuweriyamu
-
Kumbi mu Bayibolu mwe fundu wuli?
-
Kumbi ndi mafumbu nanga ngo Bayibolu limuka?
-
Kumbi ndi mafumbu nanga ngo yimwi mungayanja kuti Bayibolu likumukeni?
FUFUZANI
Wonani mo fundu za mu Bayibolu zingatiwovye mazuŵa nganu.
“Fundu za M’Bayibolu Zakovya Nyengu Zosi” (Chigongwi cha Alinda Na. 1 2018)
Wonani mo Bayibolu linguwovye munthu munyaki yo wasuzgikanga maŵanaŵanu kutuliya pa unamana waki.
Wonani mo fundu za mu Bayibolu zingawovye banja linu kuti likondwengi.
“Fundu 12 Zo Zitovya Mabanja Kuti Ngajengi Mwalikondwa” (Jani Masu! Na. 2 2018)
Wonani mo Bayibolu lisuskiya maŵanaŵanu ngaboza ngo ŵanthu anandi ŵe nangu ngakukwaskana ndi yo walamuliya charu.
Ntchifukwa Wuli Tikhumbika Kusambira Bayibolo?—Vidiyo Yosi (3:14)
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
