Yehova walenga Adamu ndi Eva ndi chilatu chakuti aje ndi umoyu wamuyaya mu Paradayisu. Satana wapusikiya zina laku Chiuta ndi kukayikiya asani Ngwakwenere kuwusa. Adamu ndi Eva alondo Satana pakugarukiya, ndipu ivi vizisa ubudi ndi nyifwa paku yiwu ndi ŵana ŵawu

Yehova walanga akugaruka ŵenaŵa ndipu walayizga kuti Mtaski pamwenga Mbewu yizengi yo yazamutema Satana ndi kutuzgapu vinthu vosi viheni vo vikwamba chifukwa cha kugaruka ndi ubudi

Yehova walayizga Abrahamu ndi Davidi kuti azamuja apapi a Mbewu pamwenga Mesiya yo wazamuwusa nge Fumu kwamuyaya

Yehova wachitisa kuti achimi akambi vinthu vo vazamuchitika kunthazi, kuti Mesiya wazamutuzgapu ubudi ndi nyifwa. Pamoza ndi wo wazamuwusa nawu, iyu wazamuwusa nge Fumu ya Ufumu waku Chiuta wo wazamumalisa nkhondu, matenda ndipuso nyifwa

Yehova watumiza Mwana waki pacharu chapasi ndipu waziŵikisa Yesu nge Mesiya. Yesu wapharazga za Ufumu waku Chiuta ndi kupereka umoyu waki nge sembi. Pavuli paki, Yehova watimuyusa ndi liŵavu lauzimu

Yehova waŵika Mwana waki pa chitengu kuchanya nge Fumu, kulongo kwamba kwa mazuŵa ngakumaliya nga mugonezi wunu. Yesu walongozga akumulondo ŵaki a pacharu chapasi asani apharazga za Ufumu waku Chiuta pacharu chosi chapasi

Yehova walongozga Mwana waki kuti Ufumu waki uwusi pacharu chapasi. Ufumu wo ubwanganduwa maboma ngosi ngaheni, ndipu ujalikiska Paradayisu ndi kupangisa ŵanthu akugomezgeka kuja akufikapu. Kwenere kwaku Yehova kuwusa kuwoneke pakweru ndipu zina laki litoweseka kwamuyaya