MARANGU ngo Chiuta wangupasa Mosese ngazomerezanga munthu kulapa pa vinthu vakwenere. Kweni munyengu yaku Yesu ŵanthu alapanga pa chechosi cho akambanga. Yiwu achitanga viyo kuti ŵanthu agomezgengi vo akambanga. Yesu wanguŵakambiya kuti vo achitanga venga vambula kwenere. Iyu wanguti: “Asani wakamba kuti ‘Hinya,’ waŵi hinya ndipu asani wakamba kuti ‘Awa,’ waŵi awa.”—Mat. 5:33-37; 23:16-22.

Mwakukoliyana ndi vo buku linyaki likamba, “Ayuda ayanjanga ukongwa kulapa kuti alongo kuti vo akamba vauneneska.” (Theological Dictionary of the New Testament) Tingavwisa ivi asani tingawona vo ve m’buku la Talmud lo akulembamu vo ŵanthu alapanga. Vinyaki vo alapanga vilongo kuti venga vauneneska kweni vinyaki venga vaboza.

Wenga Yesu pe cha yo wawonanga kuti Ayuda alapanga mwambula kwenere. Munthu munyaki wakulemba mbiri zina laki Flavius Josephus wangukamba za gulu linyaki la Ayuda. Iyu wangukamba kuti: “Ŵanthu ŵenaŵa akhwechanga kulapa chifukwa agomezganga kuti, kulapa kwenga kuheni ukongwa kuluska kukamba boza. Yiwu awonanga kuti asani munthu walapa kuti walongo kuti vo wakamba vauneneska ndikuti munthu waviyo ngwaboza.” Buku linyaki la Ayuda nalu so lingukamba kuti: “Munthu yo walapa ndikuti wasunga dangu cha.” (Wisdom of Sirach) Ndichu chifukwa chaki Yesu wanguŵakambiya kuti angayiwonanga mwakupepuka cha nkhani ya kulapa. Asani nyengu zosi tikamba uneneska, titenere cha kulapizga kuti ŵanthu agomezgi vo tikamba.