WENUWU NDI MWAŴI UKULU UKONGWA! Mulengi widu wakulayizga kuti tazamuja ndi umoyu wamuyaya, penipanu pacharu chapasi. Chinanga kuti ve viyo, ŵanthu anandi agomezga cha venivi. Yiwu akamba kuti, ‘Weyosi watenere kufwa. Ndimu umoyu wulili kuti asani munthu wawaku, nyengu yinyaki watufwa.’ Anyaki agomezga kuti ŵanthu azamuja ndi umoyu wamuyaya, kweni pacharu chapasi cha. Yiwu akamba kuti munthu walonde umoyu wamuyaya pijapija asani wafwa ndi kuluta kuchanya. Kumbi yimwi mugomezganji?

Mwechendamuki, wonani dankha mo Bayibolu limukiya mafumbu ngatatu yanga: Kumbi mo Chiuta wakupangiya ŵanthu vilongo wuli kuti wakhumbanga kuti ajengi kwamuyaya? Ntchifukwa wuli Chiuta wangulenga charu chapasi ndipuso ŵanthu? Ntchinthu wuli cho chinguchitika kuti ŵanthu afwengi?

Pa vinthu vosi vamoyu vo Chiuta wakulenga pacharu chapasi, ŵanthu wakuŵalenga mwapade ukongwa. Ntchifukwa wuli tikamba viyo? Bayibolu likamba kuti ŵanthu pe ndiwu akulengeka mu “chikozgu” chaku Chiuta kweniso ‘ŵe nge’ iyu. (Chiyambo 1:26, 27) Kumbi venivi ving’anamuwanji? Ving’anamuwa kuti ŵanthu akulengeka ndi mijalidu yo Chiuta we nayu nge chanju ndipuso urunji.

Kusazgapu pa fundu yeniyi, ŵanthu akulengeka kuti aŵanaŵanengi, apambanisengi pakati pa chamampha ndi chiheni kweniso kuti aje pa ubwezi ndi Chiuta. Ndichu chifukwa chaki tikondwa ndi kutowa kwa chilengedu, vinthu vinyaki vakuziziswa vo Chiuta wakulenga, sumu, ndakatulu kweniso vinthu vinyaki vo ŵanthu apanga mwalusu. Kuphara vosi, Mulengi wakulenga ŵanthu kuti amusopengi. Mijalidu yo ŵanthu ŵe nayu, yichitiska kuti yiwu apambanengi ndi vinthu vinyaki vosi vo Chiuta wakulenga pacharu chapasi.

Ŵanaŵaniyani fundu iyi: Asani Chiuta wangulenga ŵanthu kuti ajengi kwa vyaka vimanavi ŵaka, kumbi iyu watingi waŵapaskengi mijalidu yapade yeniyi yo akhumbika kulutirizga kuja nayu kweniso kuyikulisa? Uneneska ngwakuti, Chiuta wakutipaska mijalidu yapade yeniyi kweniso malusu ngakupambanapambana, kuti tikondwengi ndi umoyu kwamuyaya, penipanu pacharu chapasi.

Ŵanthu anyaki akamba kuti Chiuta wakulenga ŵanthu kuti ajengi pacharu chapasi kwamuyaya cha, kweni kwa kanyengu kamanavi ŵaka. Yiwu akamba kuti charu ndi malu ngo Chiuta wasankhiyapu waka ŵanthu wo mbakwenere kuluta kuchanya kuti akaje ndi iyu kwamuyaya. Asani venivi venga vauneneska, kwatingi  kuŵengi kwakwenere kukamba kuti Chiuta ndiyu wachitiska masuzgu kweniso vinthu viheni vo vichitika pacharu. Kweni venivi vauneneska cha ndipu vipambana kutali ndi mijalidu yaku Chiuta. Pakukamba vakukwaskana ndi Chiuta, Bayibolu likamba kuti: “Nthowa zaki zosi zaurunji. Chiuta ngwakugomezgeka ndipu wachita cha vinthu vambula urunji. Iyu ndi murunji ndipuso ngwakunyoroka.”—Marangu 32:4.

Bayibolu likonkhoska mwakuvwika umampha chifukwa cho Chiuta wakulenge charu. Likamba kuti: “Kuchanya nkhwaku Yehova, kweni charu chapasi wakuchipereka ku ŵana ŵa ŵanthu.” (Sumu 115:16) Mwaviyo, Chiuta wangulenga charu kuti chije chakutowa kweniso kuti ŵanthu ajengepu kwamuyaya. Iyu wanguŵikamu chechosi cho tikhumbikiya kuti tikondwengi ndi umoyu kwamuyaya.—Chiyambo 2:8, 9.

“Kuchanya nkhwaku Yehova, kweni charu chapasi wakuchipereka ku ŵana ŵa ŵanthu.”​—Sumu 115:16

Bayibolu likonkhoska so mwakuvwika umampha chifukwa cho Chiuta wakulenge ŵanthu. Iyu wangukambiya banja lakwamba kuti ‘lizazi charu chapasi ndipu lichithereski. Kweniso kuti lilamuliyengi . . .  chamoyu chechosi cho chitenda pacharu chapasi.’ (Chiyambo 1:28) Ŵanthu ŵenaŵa angupaskika mwaŵi wakunozga charu kuti chosi chije Paradayisu! Mwaviyo, Adamu ndi Eva limoza ndi ŵana ŵawu akhumbikanga kuchija kuchanya cha, kweni kuja ndi umoyu wamuyaya penipanu pacharu chapasi.

Nanga ntchifukwa wuli titufwa? Bayibolu lilongo kuti mungelu yumoza waku Chiuta wangugaruka ndipu wanguja Satana Dyaboli. Iyu wangutimbanyizga vo Chiuta wakhumbanga mumunda wa Edeni. Kumbi iyu wanguchita wuli venivi?

Satana wanguchitiska kuti apapi ŵidu akwamba, Adamu ndi Eva nawu agarukiyi Chiuta. Iyu wanguŵakambiya kuti Chiuta watiŵanola vinthu vamampha. Yapa, Satana wang’anamuwanga kuti Chiuta wakhumbanga cha kuti yiwu asankhengi ŵija chamampha ndi chiheni. Adamu ndi Eva anguvwiya Satana ndipu angusankha kugarukiya Chiuta. Kumbi ntchinthu wuli cho chinguchitika? Pati pajumpha nyengu, yiwu angufwa nge mo Chiuta wanguŵatcheŵeske. Yiwu angutaya mwaŵi wakuja ndi umoyu wamuyaya mu Paradayisu pacharu chapasi.—Chiyambo 2:17; 3:1-6; 5:5.

Mazuŵa nganu, tikumana ndi masuzgu chifukwa chakuti Adamu ndi Eva angugarukiya Chiuta. Mazu Ngaku Chiuta ngakamba kuti: “Ubudi ukuselere mucharu kuziya mwa munthu yumoza [Adamu], ndi nyifwa chifukwa cha ubudi, ndipu nyifwa yikusapaliya ku ŵanthu wosi.” (Aroma 5:12) Taŵanthu titufwa chifukwa chakuti ndivu Chiuta wakulembe limu cha, kweni chifukwa chakuti tikutore ubudi ndi nyifwa kutuliya kwa apapi ŵidu akwamba.

Chilatu cho Chiuta wakulenge ŵanthu ndipuso charu chikutondeka cha, chinanga kuti ŵanthu angumugarukiya mu Edeni. Chifukwa cha chanju kweniso urunji, vinguchitiska kuti Chiuta wapereki nthowa kuti tifwatuliki ku ukapolu wa ubudi ndi nyifwa, vo tikutore kwa apapi ŵidu akwamba. Wakutumika Paulo wangulemba kuti: “Malipiru nga ubudi ndi nyifwa, kweni mphasu yo Chiuta wapereka mbumoyu wamuyaya kuporote mwa Ambuyafwi Khristu Yesu.” (Aroma 6:23) Pakuti Chiuta wangwanja ukongwa ŵanthu, “wakupereka Mwana waki wapade [Yesu Khristu], kuti weyosi wakuvwana mwaku iyu waleki kunangika, kweni waje ndi umoyu wamuyaya.” (Yohane 3:16) Chifukwa chakuti Yesu wanguzomera kupereka sembi yakuwombole ŵanthu, wakuweziyapu vinthu vosi vo Adamu wangutaya. *

Pambula kuswera, vo Chiuta wakulayizga kuti wasinthengi charu kuja paradayisu vifiskikengi nadi. Mungazija mu paradayisu mwenuyu asani muvwiya vo Yesu wangukamba. Iyu wanguti: “Sereni pageti lifinyi, chifukwa geti lisani kweniso msewu ukulu ngwakulongozge ku pharanyiku, ndipu akwendamu mbanandi; penipo geti lifinyi kweniso msewu umana ngwakulongozge ku umoyu ndipu mbamanavi wo atiwusaniya.” (Mateyu 7:13, 14) Kukamba uneneska, vo mungasankha vingachitiska kuti muzisaniyi umoyu wamuyaya pamwenga cha.Kumbi yimwi musankhengenji?