ERNST yo we ndi vyaka 70 wangukamba kuti: “Ndikumana ndi masuzgu pafupipafupi chifukwa cha kukota.” a Kumbi namwi ndimu viliri? Asani namwi mukota ndipu muwona kuti mutamatama, mungavwisa vo Solomoni wangukamba m’buku la Wakutaula chaputala 12. Mu vesi 1, Solomoni wangukamba kuti mazuŵa nga ukoti ndi “mazuŵa ngaheni.” Chinanga vingaŵa viyo, ivi ving’anamuwa kuti mujaliyengi ŵaka masuzgu cha. Mungaja ndi umoyu wamampha ndi kuteŵete Yehova mwakukondwa.

Abali ndi azichi akukota ndimwi pe cha mukumana ndi masuzgu. Ateŵeti akali aku Yehova wo ŵenga akukota nawu akumananga ndi masuzgu ngo imwi mukumana nangu. Mwakuyeruzgiyapu, Yisaki, Yakobe ndi Ahija awonanga cha. (Chiy. 27:1; 48:10; 1 Ŵaka. 14:4) Fumu Davidi yavwanga kufunda cha. (1 Ŵaka. 1:1) Barzilai wavwanga cha kunowa kwa chakurya ndi kumba kwa sumu. (2 Sam. 19:32-35) Muwolu waku Abrahamu wangutayika ndipu Naomi wenga choko.​—Chiy. 23:1, 2; Ruti 1:3, 12.

Nchinthu wuli chinguŵawovya kuti alutirizgi kuvwiya Yehova ndi kuja akukondwa? Abrahamu wati wakota, wagomezganga vo Chiuta wangumulayizga chifukwa wenga ndi chivwanu chakukho. (Ŵar. 4:19, 20) Nasi tikhumbika kuja ndi chivwanu chakukho. Kuti tije ndi chivwanu chakukho, vithemba msinkhu wamunthu cha, pamwenga mo vinthu viliri pa umoyu widu. Mwakuyeruzgiyapu, Yakobe wengavi nthazi, wawonanga cha, ndipuso watondekanga kwenda. Kweni wagomezganga ukongwa vo Yehova wangumulayizga. (Chiy. 48:1-4, 10; Ŵah. 11:21) Ines we ndi vyaka 93 ndipu wasuzgika ndi nthenda yinyaki. Iyu wangukamba kuti: “Ndiwona kuti Yehova watinditumbika nyengu zosi. Zuŵa lelosi ndiŵanaŵana za Paradayisu. Ndipu ivi vitindiwovya kuti ndileki kuwere vuli.” Kuŵanaŵana viyo nkhwakovya ukongwa!

Chivwanu chidu chikho asani tiromba, tiŵerenga Mazu Ngaku Chiuta kweniso kuwungana. Danyele wenga wakukota, kweni warombanga katatu pa zuŵa ndipuso waŵerenganga Mazu Ngaku Chiuta nyengu zosi. (Dan. 6:10; 9:2) Ana wenga choko chakukota, kweni nyengu zosi wasanirikanga pa nyumba yakusopiyaku. (Luka 2:36, 37) Muchiskika kweniso muchiska anyinu asani mutesesa kuwungana, kukamba nkhani ndi kumukapu. Yehova wakondwa ndi marombu nginu chinanga kuti mutondeka kufiska vinthu vinyaki mumpingu.​—Nthanthi 15:8.

Anandi aku imwi, mukhumbisiska kuŵerenga ndi kuluta ku maunganu, kweni muchita ivi mwakusuzgikiya ndipu mwanyaki mutondeke limu. Kumbi mungachita wuli? Muchitengi vo mungafiska. Anyaki wo atondeka kuluta ku maunganu, avwisiya pa foni. Inge we ndi vyaka 79 ndipu chinanga kuti masu ngaki ngawona umampha cha, iyu wanozgeke maunganu pa mapepala ngo m’bali wa m’mpingu waki watimupaska. M’bali uyu watimukuzgiyaku mazu kuti waŵerengengi umampha.

Panyaki imwi mwe ndi nyengu yinandi yo abali ndi azichi anandi atondeka kuyisaniya. Mungachita umampha kugwiriskiya ntchitu nyengu iyi. Mungavwisiya maseŵeru, mabuku, nkhani pamwenga Bayibolu pa CD. Kweniso mungambiya foni Akhristu anyinu kuti muŵachiski.​—Ŵar. 1:11, 12.

Mzichi munyaki zina laki Christa we ndi vyaka vakujumpha 80. Iyu wangukamba kuti: “Nchakudandawuliska ukongwa asani wayamba kutondeka kuchita vinthu vinyaki pa kuteŵete Yehova.” Nanga nchinthu wuli chingawovya akukota kuti alutirizgi kuja akukondwa? Peter yo we ndi vyaka 75 wangukamba kuti: “Atenere kuwona vinthu mwakwenere.  Angaŵanaŵananga waka vinthu vo atondeka kufiska cha kweni vo angafiska.”

Asani mungafiska cha kupharazga kunyumba ndi nyumba, mungayesa nthowa zinyaki zo mungafiska. Mwakuyeruzgiyapu, Heidi wangafiska cha kuluta kunyumba ndi nyumba nge mo wachitiyanga kali. Sonu we ndi vyaka vakujumpha 80. Iyu wakusambira kulemba makalata pa kompyuta kuti wapharazgiyengi ŵanthu. Abali ndi azichi anyaki akukota apharazgiya ŵanthu asani aja pasiteji pamwenga kumalu nganyaki ko ŵanthu acheze. Asani muja ko asungiyaku ŵanthu akukota, mungapharazgiya madokotala ndipuso ŵanthu anyaki wo aja kweniko.

Fumu Davidi yati yakota, yinguwovya ukongwa kuti ŵanthu asopengi Chiuta mwauneneska. Iyu wangupereka ndalama ndi vinthu vinyaki kuti viwovyi pa ntchitu yakuzenga nyumba yakusopiyamu. (1 Mik. 28:11–29:5) Namwi mungachita so viyo kuti muwovyi pa ntchitu za Ufumu zo zichitika pacharu chosi chapasi. Mungawovya apayiniya pamwenga apharazgi anyaki aphamphu mumpingu winu. Mungaŵachiska ndi mazu, kuŵapaska chawanangwa pamwenga kuŵanozge chakurya. Kweniso mungarombe anamana, mabanja, wo achita uteŵeti wanyengu zosi, wo atama, ndipuso wo ŵe ndi maudindu ngakulu.

Yehova watikuwonani kuti mwe akuzirwa ukongwa. Kweniso, wakondwa ukongwa ndi vo muchita pakumuteŵete. Mwa abali ndi azichi ŵidu akwanjiwa, Awuskefwi akuchanya akutayeningi cha. (Sumu 71:9) Yehova watikuyanjani. Pambula kuswera yapa, tosi tazamuvwanga vakupweteka cha. Kweni vosi vazamumala ndipu tazamuteŵete Yehova Chiuta kwamuyaya.