ASIBWENI a Nikolai Dubovinsky ŵepafupi kufwa, angulemba mbiri ya umoyu wawu. Angulemba vinthu vakukondwesa ndi masuzgu ngo angukumana nangu po ateŵetiyanga Yehova. Vinandi vo angulemba vinguchitika pa nyengu yo Akaboni angukanizgika kusopa mu muwusu wa Soviet Union. Chinanga kuti angukumana ndi mayeseru, yiwu angulutirizga kuja akugomezgeka. Kanandi asibweni a Nikolai akambanga kuti akhumbanga kuti achinyamata aziŵerengi mbiri ya umoyu wawu. Sonu ndikukonkhoskiyeni vinthu vinyaki vo vinguŵachitikiya pa umoyu wawu. Yiwu anguwa mu 1926 mumuzi wa Podvirivka m’charu cha Ukraine.

Asibweni a Nikolai angukamba kuti: “Zuŵa linyaki mu 1941, muku wangu Ivan wanguza ndi buku la The Harp of God ndi la The Divine Plan of the Ages, magazini nga Chigongwi cha Alinda ndi timabuku tinandi. Ndinguŵerenga vosi. Ndinguzizwa ndati ndasambira kuti ndi Chiuta cha yo wachitiska masuzgu pacharu chapasi, kweni ndi Diabolo. Ndinguŵerenga so buku la Mateyu, Marko, Luka ndi Yohane ndipu ndinguziŵa kuti ndasaniya uneneska. Ndati ndaŵerenga mabuku ngenanga, ndinguziŵa vinandi ndipu ndakhumbanga kuteŵete Yehova. Ndingwamba kukambiyaku anyangu vo ndingusambira vakukwaskana ndi Ufumu.

“Ndinguziŵa kuti nditambuzikengi chifukwa cha vo ndigomezga. Iyi yenga nyengu ya nkhondu kweni ndakhumbanga cha kubaya munthu. Kuti ndinozgeke masuzgu ngo ngenga kunthazi, ndingwamba kuloŵeza mavesi nga m’Bayibolu nge Mateyu 10:28 ndi 26:52. Ndingusimikizga mtima kuja wakugomezgeka kwaku Yehova chinanga angakhumba kundibaya.

“Mu 1944, ndingukwanisa vyaka 18 ndipu angundidana kuti nkhayambi ntchitu ya usilikali. Ndingukumana ndi abali achinyamata wo nawu angudanika kuti akayambi ntchitu ya usilikali. Yaka kenga kakwamba kuti ndije pakati pa Akhristu anyangu. Tingukambiya alongozgi ŵa asilikali kuti tichitengeku cha nkhondu. Yiwu angukwiya ndipu angutiwofyeza kuti atinolengi chakurya, atikumbisengi galandi pamwenga atichutengi. Tinguŵamuka kuti: ‘Te mumanja nginu. Kweni vosi vo mungachita nasi, tilekengi cha kuvwiya dangu laku Chiuta lakuti, “Ungabayanga cha.”’​—Chit. 20:13.

“Ini ndi abali ŵaŵi angutitumiza ku Belarus kuti tikagwirengi ntchitu m’munda ndi kunozga nyumba zakunangika. Ndeche kukumbuka vinthu viheni vo vachitikanga mutawuni ya Minsk chifukwa cha nkhondu. Vimiti vo anguviwotcha venga mumsewu. Muvimphwamphwazi ndi mudondu mwenga viŵanda va ŵanthu ndi akavalu akufwa. Ndinguwona ngolu zo ŵanthu angusiya, futi zakofya ndi ndegi  yakunangika. Yapa ndawonanga ndi masu ngangu uheni wakuleka kuvwiya marangu ngaku Chiuta.

“Nkhondu yingumala mu 1945, kweni isi tenga teche mujeri. Angutiyeruzga kuti tijengemu vyaka 10 chifukwa chakuleka kuchitaku nkhondu. Kwa vyaka vitatu, tawungananga cha kweniso tengavi mabuku kuti tiŵerengengi. Tingulembe kalata azichi anyaki, kweni nawu so anguŵamanga ndipu anguŵakambiya kuti ajengi mujeri kwa vyaka 25.

“Angutituza liŵi mujeri mu 1950 ndipu tinguwere kunyumba. Pa nyengu yo ndenga mujeri ama ndi mzichi wangu Maria angubatizika. Aku ŵangu atatu ŵenga ŵeche ndabatiziki, kweni asambiranga Bayibolu. Chifukwa ndapharazganga mwaphamphu, akhumbanga so kundimanga. Pavuli paki, abali wo alongozganga ntchitu yakupharazga angundipempha kuti nkhagwirengi ntchitu yakupanga mabuku mwakubisa. Pa nyengu iyi ndenga ndi vyaka 24.”

“Akaboni ayanjanga kukamba kuti, ‘Asani ntchitu ya Ufumu yakanizgika, tichitengi mwakubisa.’ (Nthanthi 28:28) Pa nyengu iyi, mabuku nganandi ngasindikizikanga mwakubisa, muvipinda va pasi. Pakwamba ndagwiriyanga ntchitu ‘muchipinda’ cha pasi mu nyumba yo mwajanga muku wangu Dmitry. Nyengu zinyaki ndatuwanga cha muchipinda ichi kwa masabata ngaŵi. Asani nyali yazimwa chifukwa chakuti mphepu ya okusijini yamala, ndagonanga pasi ndi kulindizga kuti muchipinda musele so mphepu.

“Zuŵa linyaki, m’bali yo ndagwiranga nayu ntchitu wangundifumba kuti, ‘Nikolai, kumbi  ukubatizika?’ Chinanga kuti ndinguteŵete Yehova vyaka 11, kweni ndenga ndechendabatiziki. Mwaviyo, wangukambiskana nani ndipu ndingubatizika zuŵa lenili. Ndingubatizikiya munyanja nde ndi vyaka 26. Pati pajumpha vyaka vitatu, ndingupaskika udindu unyaki. Ndingupempheka kuti ndije mu Komiti ya Charu. Pa nyengu yo, abali wo ŵenga mujeri cha aŵikikanga pa udindu uwu kuti ato malu nga wo amangika. Ivi vawovyanga kuti ntchitu ya Ufumu yilutiriyi.”

“Ntchitu yakusindikiza mabuku muchipinda chapasi yenga yakusuzga ukongwa kuluska kuja mujeri. Ndinguja vyaka 7 kwambula kuwungana chifukwa chakopa apolisi. Mwaviyo, ndakhumbikanga kusambira pakundija. Abali ŵangu ndawonanga pija asani ndaluta kunyumba, kweni ivi vachitikanga pafupipafupi cha. Yiwu avwisanga ndipu ivi vandichiskanga ukongwa. Nyengu zosi ndajaliyanga mantha pe chifukwa chakopa apolisi. Takhumbikanga kunozgeke chechosi. Mwakuyeruzgiyapu, zuŵa linyaki ndi mazulu, kunyumba kunguza apolisi ŵaŵi. Ndingutuliya pa windu ndi kuchimbiliya ku dondu. Pavuli paki ndinguvwa chiwawa. Ndati ndavwa kuliya kwa futi, ndinguziŵa kuti chiwawa cho ndavwanga chenga cha mpholopolu. Wapolisi munyaki wandichutanga we pahachi mpaka po mpholopolu zingumaliya. Mpholopolu yimoza yingundifikiya pa janja. Ŵati andichimbiza kwa makilomita 5, ndingubisama. Pa nyengu yo andiyeruzganga ndipu ndinguvwiya kuti angundichuta maulendu 32.

“Chifukwa chakuti ndinguja nyengu yitali muchipinda chapasi, liŵavu langu lingusintha ukongwa. Ivi vinguchitisa kuti ndileki dankha ntchitu yo ndachitanga. Mwaviyo, ndajanga nyengu yitali pa lumwi. Kuja muchipinda chapasi kwa nyengu yitali kunguchitiska so kuti ndiyambi kutama. Nyengu yinyaki ndingutondeka kukumana ndi abali anyaki chifukwa ndatuwanga ndopa mumphunu ndi mumulomu.”

“Pa 26 January 1957, ndingumangika. Ndipu pati pajumpha myezi 6, Khoti Likulu la ku Ukraine lingugamuwa kuti nkhabayiki. Kweni chifukwa chakuti chilangu chakubaya munthu chingumala m’charu ichi, angundikambiya kuti nkhaje mujeri vyaka 25. Isi angutimanga  tengapu 8 ndipu vyaka vo angutikambiya kuti tikaje mujeri vosi pamoza vingukwana 130. Angutitumiza ku jeri la ku Mordvinia, ko kwenga Akaboni 500. Tawungananga mwakubisama m’timagulu kuti tisambirengi Chigongwi cha Alinda. Mulonda munyaki wati wawona magazini ngo boma lingutilonda, wangukamba kuti: ‘Takulondani magazini yanga chifukwa asani mungalutirizga kuŵerenga, mujengi akukho ukongwa.’ Ntchitu yo atipasanga tamalizanga ndipu kanandi tasazgiyangapu yinyaki. Kweni yo wawoneliyanga jeri wangukamba kuti: ‘Ntchitu yo mugwira njakuzirwa cha kwaku isi. Isi tikhumba kuti muvwiyengi ndi kugomezgeka ku boma.’”

Asibwezi a Nikolai ŵati atuwa mujeri mu 1967, angwamba kupanga mipingu mu Estonia ndi mutawuni ya St. Petersburg, ku Russia. Kukwambiriya kwa chaka cha 1991, chilangu cho khoti lingupereka mu 1957 chingusintha chifukwa chakuti pengavi ukaboni. Akaboni anandi wo anguŵatambuzga anguŵakambiya kuti ŵengavi mlandu. Mu 1996, a Nikolai angusamukiya mutawuni ya Velikiye Luki m’charu cha Pskov Oblast, cho che pa mtunda wamakilomita 500 kutuliya ku St. Petersburg. Angugula kanyumba ndipu mu 2003 Nyumba ya Ufumu yinguzengeka pa malu ngawu. Mazuŵa nganu, mipingu yiŵi yiwungana pa Nyumba ya Ufumu yeniyi.

Ini ndi murumu wangu titeŵete pa ofesi ya nthambi ya Akaboni aku Yehova ku Russia. Mu March 2011, kwati kwaja myezi yimanavi kuti Asibweni a Nikolai ŵafwi, yiwu anguza kuzitiwona. Vo angukamba vingutikwaska ukongwa. Yiwu angukamba kuti: “Nge mo viwoneke, ndiwona kuti zuŵa la 7 lakuzunguliya Yeriko lakwana.” (Yos. 6:15) Yiwu ŵenga ndi vyaka 85. Chinanga kuti angukumana ndi masuzgu pa umoyu wawu, yiwu angukamba kuti: “Nde wakukondwa ukongwa chifukwa chakuti ndingusankha kuteŵete Yehova pa unyamata wangu! Ndidandawula cha chifukwa chakusankha viyo!”