NKHANI YA PAPEJI LAKWAMBA | ASANI MUNTHU YO TAMUYANJANGA WATAYIKA
Kumbi Kuliya Nkhunanga?
Kumbi mukutamapu? Nyengu zinyaki munguchira liŵi ndipu sonu mukumbuka so cha mo vinthu venge. Kweni chitima chimala liŵi cha. Dr. Alan Wolfelt wangulemba m’buku laki kuti, “Palivi chinthu chakusuza kumala kuluska chitima.” Kweni wangukamba so kuti: “Chitima chimalaku asani pajumpha nyengu kweniso asani anyaku atikupembuza.”
Mwakuyeruzgiyapu, ŵanaŵaniyani mo Abrahamu wanguvwiya muwolu waki wati watayika. Bayibolu likamba kuti “Abrahamu wangwamba kuliya ukongwa ndi nyifwa yaku Sara.” Mazu ngakuti “wangwamba” ngalongo kuti Abrahamu wanguliya kwa nyengu yitali. * Yakobe nayu wanguliya ukongwa wati wapusikika kuti mwana waki Yosefe waryika ndi chinyama cha mudondu. Iyu wanguliya kwa “mazuŵa nganandi” ndipu ŵanthu a m’banja laki angutondeka kumupembuza. Iyu wanguchita chitima ndi nyifwa yaku Yosefe kwa vyaka vinandi.—Chiyambo 23:2; 37:34, 35; 42:36; 45:28.
Abrahamu wanguliya nyifwa ya muwolu waki Sara
Mazuŵa nganu napu, ŵanthu anandi aliya kwa nyengu yitali asani abali ŵawu atayika. Tiyeni tiwoni vo vinguchitikiya ŵanthu ŵaŵi yaŵa.
-
“Mulumu wangu Robert, wangutayika pa July 9, 2008. Ndi mulenji zuŵa lo wanguchitiya ngozi vinthu vosi ngenga nge mo tachitiyanga mazuŵa ngosi. Tati tarya chakurya cha mulenji, murumu wangu wangunyamuka kuluta kuntchitu, ndipu tingufyofyonthana, kuvumbatiyana, ndipuso wangundikambiya mazu ngakuti: ‘Nditikuyanja.’ Sonu pajumpha vyaka 6, kweni ndeche kuchita chitima ndi nyifwa ya murumu wangu. Ndikayikiya kuti ndazamuluwa nyifya yaku Rob.”—Gail, wa vyaka 60.
-
“Chinanga kuti pajumpha vyaka 18 kutuliya po muwolu wangu wakutayikiya kweni ndechekumukumbuka ndipuso ndeche ndi chitima. Nyengu zosi asani ndiwona vinthu vakukondwesa va chilengedu, ndiŵanaŵana zaku iyu ndipuso mo watingi wakondwiyengi kuwona vo ndiwona.”—Etienne, wa vyaka 84.
Kukamba unenesa, munthu weyosi watuvwa chitima kwa nyengu yitali asani munthu yo wamuyanjanga watayika. Munthu weyosi walongo chitima munthowa zakupambanapambana ndipu nkhwamampha cha kunena munyidu asani walongo chitima pa vo vachitika. Kweniso tikhumbika cha kujimba mlandu asani tiwona kuti tichita chitima ukongwa. Kumbi tingachita wuli kuti tileki kusuzika ukongwa ndi chitima?
^ ndimi 4 Yisaki yo wenga mwana waku Abrahamu, nayu wanguliya kwa nyengu yitali. Nge mo tawone mu nkhani yo ye mu magazini iyi yakuti “Yezgani Chivwanu Chawu,” Yisaki wanguliya anyina a Sara kwa vyaka vitatu.—Chiyambo 24:67.
Mungayanja Kuŵerenga so Nkhani Izi
CHIGONGWI CHA MLINDA
Vo Vingawovya Munthu Kuti Chitima Chimaleku
Bayibolu le ndi fundu zo zawovyapu kali ŵanthu anyaki.
JANI MASU!
Chitima—Vo Vichitika
Kumbi ndi vinthu wuli vo vingachitikiya munthu asani mubali waki watayika?
