Chanju chisazgapu kwanja anyidu kutuliya pasi pa mtima. Munthu wangalongo kuti watanja ŵanthu kuziya mu mazu ndi vakuchita vaki ndipuso mo wakwaskikiya ndi ŵanthu wo watiŵayanja, chinanga kuti pangakhumbika vinandi kuti wachiti viyo.

Mosese wangulongo kuti wayanjanga Chiuta. Munthowa wuli? Kumbukani mazu nga pa lemba la 1 Yohane 5:3 ngakuti: “Chifukwa chenichi nchanju cho chaku Chiuta, kuti tisungi marangu ngaki.” Mosese wagwiriskiyanga nchitu fundu yeniyi pa umoyu waki. Iyu wanguvwiya ndi kuchita vosi vo Chiuta wangumukambiya, wanguzomera kuchikambiskana ndi Farao, fumu yakofya ndipuso wangugwira nchitu yo yawonekanga nge yambula kusuzga ya kupumisa nthonga yaki pa Nyanja Yiyera. Mosese wavwiyanga vo Chiuta wakambanga mwambula kuphwere kanthu kuti venga vakusuzga pamwenga cha. “Viyo ndimu wanguchitiya.”—Chituwa 40:16.

Mosese wangulongo kuti waŵayanjanga Ayisraele anyaki. Ayisraele aziŵanga kuti Yehova wagwiriskiyanga nchitu Mosese kuti walongozgi ŵanthu ŵaki, mwaviyo, amukambiyanga masuzgu ngawu ngakupambanapambana. Bayibolo likamba kuti: “Ŵanthu wosi atuma kwakuzunguliya [iyu] kutuwa mulenji mpaka mazulu.” (Chituwa 18:13-16) Ŵanaŵaniyani nchitu yakuvukisa yo Mosese wenga nayu yakuvwisiya madandawulu nga Ayisraele ora lelosi. Mosese wakondwanga kuwovya ŵanthu mwachanju.

Kusazgiyapu pa kuŵavwisiya, Mosese warombiyanga so ŵanthu wo waŵayanjanga. Warombiyanga so chinanga ndi ŵanthu wo amunangiyanga! Mwakuyeruzgiyapu, Miriamu mzichi waki wati wamunyoza, Yehova wangumulanga ndi nthenda ya makhati. M’malu mwakukondwa ndi chilangu cho Miriamu wangupaskika, mwaliŵi Mosese wangusereriyapu ndi kuromba kuti: “Muchizgeni, Chiuta . . . nditikuŵeyeriyani.” (Maŵerengedu 12:13) Chanju ndichu chingumuchitiska Mosese kuti warombi mwakuŵeyere viyo.

Nasi tingayezga Mosese asani tiyesesa kwanja Chiuta. Chanju chenichi chititiwovya kuti tivwiyengi marangu ngaki kutuliya “mu mtima.” (Ŵaroma 6:17) Tikondwesa mtima waku Yehova asani titimuvwiya kutuliya pasi pa mtima widu. (Nthanthi 27:11) Nasi tiyanduwa so ukongwa. Ndipuso asani titeŵete Yehova chifukwa cha kumuyanja, tichitengi vinthu vamampha kweniso tikondwengi pakuvichita!—Sumu 100:2.

Nthowa yinyaki yo tingayezge Mosese ndiyu kuyesesa kwanja anyidu ndi mtima wosi. Asani mabwezi ngidu pamwenga a m’banja lidu atitikambiya masuzgu ngawu, chanju chitiwovyengi (1) kuvwisiya mwakuphwere ukongwa; (2) kuvwa chitima nge cho ŵenachu; ndipuso (3) kuŵalongo kuti nasi vatikwaska.

Tikhoza kurombe ŵanthu wo titiŵayanja nge mo Mosese wachitiyanga. Nyengu zinyaki tingajiwona kuti tingafiska cha kuwovya anyidu asani atikambiya masuzgu ngawu. Panyaki tingakamba kuti, “Pepani ukongwa, palivi cho ndingachita kweni ndikurombiyeningi ŵaka.” Kweni ziŵani kuti: “Asani munthu murunji waromba, rombu laki lija lanthazi ukongwa.” (Yakobe 5:16, The Kingdom New Testament) Marombu ngidu ngangachitiska Yehova kuti wamuwovyi munthu yo nyengu zinyaki watingi wamuwovyengi cha. Mwaviyo, palivi chinthu chinyaki cho tingachitiya ŵanthu wo titiŵayanja kuluska kuŵarombe. *

Kumbi namwi muwona nadi kuti tingasambira vinandi kutuliya kwaku Mosese? Chinanga kuti nayu wenga munthu nge isi, wangulongo chakuwoniyapu chamampha ukongwa pankhani yakuja ndi chigomezgu, kujiyuyuwa ndipuso chanju. Asani tiyesesa kutole chakuwoniyapu chaki, isi ndipuso anyidu tiyanduwengi ukongwa.—Ŵaroma 15:4.