KUMBI Yesu wenga nadi ndi umoyu walikondwa? Mwambula kukayika, iyu wangukuliya m’banja lakukhupuka cha ndipu pa umoyu waki wosi wenga ndi vinthu vimanavi. Yesu ‘wengavi pakusamira [pakunyekeza] mutu.’ (Luka 9:57, 58) Kusazgiyapu pa venivi, watinkhikanga, amupusikiziyanga ndipu pavuli paki arwani ŵaki angumubaya.

Mungaŵanaŵana kuti, ‘Umoyu waviyo ngwambula likondwa!’ Kweni pe vinthu vinandi vo titenere kusambira pa vo Yesu wachitanga. Tiyeni tiwoni vinthu vinayi vo iyu wachitanga.

“Chakurya changu nchakuti ndichitengi khumbu la wakundituma yo.”—Yohane 4:34.

Vo Yesu wakambanga ndipuso vo wachitanga, vingulongo kuti wakhumbisiskanga kufiska khumbu laku Yehova. a Yesu wakondwanga ukongwa chifukwa chakuchita khumbu laku Chiuta. Iyu wanguyeruzgiya kuchita khumbu laku Chiuta ndi chakurya nge mo lemba lakambiya. Ŵanaŵaniyani vo vinguchitiska Yesu kuti wayeruzgiyi kuchita khumbu laku Chiuta ndi chakurya.

Yesu wangukamba mazu yanga cha m’ma 12 koloku msana. (Yohane 4:6) Iyu wangwenda m’charu cha mapiri cha Samaria mulenji wosi ndipu watenere kuti wenga ndi nja. Mwaviyo, akusambira ŵaki angumukambiya kuti: “Msambizi ryani.” (Yohane 4:31) Vo Yesu wangumuka, vingulongo kuti iyu wasaniyanga nthazi chifukwa chakugwira nchitu yaku Chiuta. Ivi vilongo kuti iyu wajanga nadi ndi umoyu wakukondwa.

“Nditanja Ada.”​—Yohane 14:31.

Yesu wenga paubwezi wakukho ndi Awiski kuchanya. Kwanja ukongwa Chiuta kunguchitiska Yesu kuti waziŵikiski zina, khumbu ndipuso mijalidu ya Awiski. Vo Yesu wakambanga, wachitanga ndipuso waŵanaŵananga valongonga mo Awiski aliri, mwakuti vo tiwona mwaku Yesu vititipaska chithuthuzi cha Awiski. Ndichu chifukwa chaki Filipu wati wamukambiya kuti: “Tirongoni Ada,” Yesu wangumuka kuti: “Yo wawona ini, wawona Ada.”​—Yohane 14:8, 9.

Yesu wayanjanga ukongwa Awiski ndipu wenga wakunozgeka kufwa chifukwa chakuŵavwiya. (Ŵafilipi 2:7, 8; 1 Yohane 5:3) Chanju chaviyo, chinguchitiska Yesu kuja walikondwa.

Palivi munthu yo wangaŵa ndi ‘chanju chikuru kwakuruska ichi, kuti munthu wangapereka umoyu waki chifukwa cha mabwezi ngaki.’​—Yohane 15:13.

Nge ŵanthu ambula kufikapu, kukamba uneneska umoyu widu ngwamasuzgu pe. Bayibolo likamba kuti: “Mwa munthu yumoza [Adamu] ulakwi unguserere m’charu, ndi nyifwa pa chifukwa cha ulakwi wo, ndi viyo nyifwa yambukiya pa ŵanthu wosi, pakuti wosi ŵangulakwa.” (Ŵaroma 5:12) Mwaku isi tija tingayigwentha cha nyifwa yo yikuza chifukwa cha ubudi.​—Ŵaroma 6:23.

Tiwonga ukongwa kuti Yehova wakupereka nthowa yakumaliskiya masuzgu nga ŵanthu wosi. Iyu wanguzomerezga kuti Mwana waki wambula ubudi kweniso wakufikapu, wasuzgiki ndipuso wafwi kuti wapereki umoyu waki kuwombo ŵanthu wosi ku ubudi ndi nyifwa. Yesu wanguvwiya ndipuso wangupereka umoyu waki wakufikapu m’malu mwaku isi chifukwa chakuti watanja Awiski ndipuso ŵanthu. (Ŵaroma 5:6-8) Chanju chambula mbunu chenichi, chinguwovya Yesu kuti waje ndi umoyu walikondwa. b

““Mweniyo ndi Mwana wangu, nkhwanjiwa, mwaku mweniyo ndikondwere.”​—Mateyu 3:17.

Yehova wangukamba mazu yanga pa nyengu yo Yesu wabatizikanga. Mwaviyo, Yehova wangulongo pakweru kuti wamuyanjanga ndipuso wakondwesekanga ndi Mwana waki, Yesu. Ndichu chifukwa chaki, Yesu wangukamba mwakusimikizga kuti: “Ada atindanja”! (Yohane 10:17) Chifukwa chakuti iyu waziŵanga kuti Awiski amuyanjanga kweniso akondwesekanga nayu, vingumuwovya kuti wakunthiyepu pa nyengu yo amususkanga ndi kumunyoza. Ivi vingumuwovya so kuti waleki kuchita mantha pa nyengu yo akhumbanga kumubaya. (Yohane 10:18) Mwambula kukayika, chifukwa chakuti Yesu waziŵanga kuti Awiski amuyanjanga ndipuso akondwanga nayu, vamuchitiskanga kuti waje ndi likondwa.

Kukamba uneneska, Yesu wenga nadi ndi umoyu walikondwa. Mwaviyo, tingasambira vinandi kutuliya kwaku iyu va mo tingachitiya kuti tije ndi umoyu walikondwa. M’nkhani yakulondopu tikambiskanengi ulongozgi wo Yesu wangupereka kwa akusambira ŵaki, wa mo angajaliya ndi umoyu walikondwa.