Nge po tawone mu nkhani yajumpha, Yesu wanguŵika mtima waki wosi pa “kupharazga ndi kumemeza uthenga wamampha wa Ufumu waku Chiuta.” (Luka 8:1) Iyu wangujipereka ndipu wangwenda mitunda yitaliyitali mucharu cha Isirayeli kuti wasambizi ŵanthu Ufumu waku Chiuta. Vosi vo iyu wangusambiza visanirika mumabuku nganayi nga Uthenga wamampha. Mumabuku ngenanga, mazu ngakuti Ufumu ngasanirika mumalu ngakujumpha 100. Nganandi mwa mazu ngenanga ngangukambika ndi Yesu. Kweni pe so vinthu vinyaki vinandi vakukwaskana ndi Ufumu waku Chiuta vo Yesu wangukamba vo vikulembeka cha!—Yohane 21:25.

Ntchifukwa wuli Yesu wawonanga kuti Ufumu ngwakukhumbika ukongwa? Chifukwa chimoza ntchakuti Yesu waziŵanga kuti Chiuta wakumusankha kuti waje Fumu. (Yesaya 9:6; Luka 22:28-30) Kumbi venivi ving’anamuwa kuti Yesu wakhumbisiskanga udindu ndipuso unkhankhu? Awa. (Mateyu 11:29; Mariko 10:17, 18) Iyu wakambanga ukongwa va Ufumu ndi chilatu chakuti wasaniriyepu kanthu kanyaki cha. Kweni chifukwa chikulu cho Yesu waŵikiya mtima waki wosi pa Ufumu waku Chiuta * mpaka sonu ntchakuti, waziŵa vo Ufumu wenuwu wazamuchitiya wo watiŵayanja ukongwa, kung’anamuwa Awisi akuchanya ndipuso akusambira ŵaki akugomezgeka.

Yesu watiŵayanja ukongwa Awisi akuchanya. (Nthanthi 8:30; Yohane 14:31) Iyu waziŵa kuti Awisi ŵe ndi mijalidu yamampha ukongwa nge chanju, lisungu ndipuso urunji. (Dotoronome 32:4; Yesaya 49:15; 1 Yohane 4:8) Mwaviyo, Yesu vitimuŵaŵa ukongwa asani watuvwa maboza ngo ŵanthu akamba ngakukwaskana ndi Awisi, nge boza lakuti Chiuta watoliyaku kanthu cha masuzgu nga ŵanthu ndipuso lakuti Chiuta wakhumba kuti tisuzgikengi. Ndichu chifukwa chaki Yesu wapharazganga mwaphamphu “uthenga wamampha wa Ufumu,” pakuti waziŵanga kuti Ufumu wazamutowesa mbiri ya Awisi. (Mateyu 4:23; 6:9, 10) Kumbi Ufumu wazamuchita wuli venivi?

Mwakugwiriskiya ntchitu Ufumu waki, Yehova wazamusintha vinthu vinandi ukongwa vo vazamuchitiska kuti ŵanthu ayanduwi. “Iyu wazamuleska masozi ngosi mumasu” mwa ŵanthu ŵaki akugomezgeka. Yehova wazamutuzgapu vinthu vo vititichitiska kuti tituzgengi masozi. Mwakuyeruzgiyapu, “nyifwa yazamuŵaku so cha. Kwazamuŵavi kuliya, kukuta pamwenga urwirwi.” (Chivumbuzi 21:3, 4) Mwakugwiriskiya ntchitu Ufumu waki, Chiuta wazamutuzgapu masuzgu ngosi ngo ŵanthu akumana nangu. *

Tizizwa cha kuwona kuti Yesu wakambiyanga ŵanthu mwaphamphu vakukwaskana ndi Ufumu! Iyu waziŵanga kuti Ufumu wenuwu wazamulongo kuti Awisi mbanthazi ukongwa kweniso mbalisungu. (Yakobe 5:11) Yesu waziŵanga kuti Ufumu wazamuwovya so ŵanthu.

Yesu wechendazi pacharu chapasi, wenga kuchanya ko wanguja ndi awisi kwa vyaka vinandi. Yehova wangugwiriskiya ntchitu mwana waki Yesu kuti walengi vinthu vosi, kwamba ndi vinthu vakuziziswa vo ve kuchanya nge nyenyezi zambula kuŵerengeka ndipuso mapulaneti, mpaka charu chapasi chakutowa cho mwe vamoyu vinandi. (Akolose 1:15, 16) Pa vinthu vosi venivi, Yesu wangwamba ‘kwanja ukongwa ŵanthu.’—Nthanthi 8:31.

Pa nyengu yo wachitanga uteŵeti waki panu pacharu chapasi, Yesu wangulongo kuti watanja ŵanthu. Kutuliya pakwamba, iyu wangukambiya limu kuti wakuza pacharu ‘kuzipharazga uthenga wamampha kwa akavu.’ (Luka 4:18) Kweni Yesu wakambanga waka pamulomu cha kuti wakhumba kovya ŵanthu. Iyu wachitanga vinthu vo valongonga kuti watanja nadi ŵanthu. Mwakuyeruzgiyapu, nyengu yinyaki ŵanthu anandi ŵati awungana kuti avwisiyi upharazgi waki, Yesu “wanguŵalenge lisungu kweniso wanguchizga wo atamanga.” (Mateyu 14:14) Kweniso munthu munyaki yo watamanga nthenda yakuŵaŵa ukongwa wati walongo chivwanu mwaku Yesu kuti wangamuchizga asani wakhumba, Yesu wangukwaskika ukongwa chifukwa cha chanju. Iyu wangumuchizga, ndipu wangumukambiya mwalisungu kuti: “Ndikhumba! Towa.” (Luka 5:12, 13) Nyengu yinyaki so Yesu wati wawona Mariya yo wenga mubwezi waki wachiliya chifukwa cha nyifwa ya mzichi waki Lazaro, iyu nayu “wangutamantha,” “wangusuzgika maŵanaŵanu” ndipuso “wanguliya.” (Yohane 11:32-36) Pavuli paki, Yesu wanguchita chinthu chinyaki chakuziziswa. Iyu wanguyuska Lazaro chinanga kuti pa nyengu iyi ndipu pajumpha mazuŵa nganayi kutuliya po wangufwiya!—Yohane 11:38-44.

Yesu waziŵanga kuti chovyu cho iyu wangupereka pa nyengu iyi chenga chambula kujalisa. Waziŵanga kuti asani pajumpha nyengu, ŵanthu wo wanguŵachizga atamengi so kweniso wo wanguŵayuska afwengi so. Kweni Yesu waziŵanga so kuti Ufumu wa Awisi ndiwu wazamutuzgiyapu limu masuzgu ngenanga. Ndichu chifukwa chaki Yesu wachitanga vakuziziswa pe cha, kweni wapharazganga so mwaphamphu “uthenga wamampha wa Ufumu” wenuwu. (Mateyu 9:35) Vakuziziswa vo wanguchita vingulongo waka vinthu vikulu vo Ufumu waku Chiuta uchitengi panu pacharu chapasi pambula kuswera. Wonani vo Bayibolu likamba kuti vichitikengi.

• Kwazamuŵavi matenda.

  “Pa nyengu yo, masu nga ŵanthu achibulumutiya ngazamujulika, ndipu makutu nga ŵanthu ambula kuvwa ngazamujulika. Pa nyengu yo, akupunduka azamundwika nge mphoyu, ndipu lilimi la ambuwu lazamudaniriza chifukwa cha likondwa.” Kweniso “palivi wakuja mucharu cho yo wazamukamba kuti: ‘Ndatama.’”—Yesaya 33:24; 35:5, 6.

• Kwazamuŵavi nyifwa.

  “Ŵanthu arunji azamulonde charu chapasi, ndipu azamuja mwenimo kwamuyaya.”—Salimo 37:29.

  “Iyu wazamumeza nyifwa kwamuyaya, ndipu Yehova, Ambuya Fumu Yikulu wazamupuputa masozi pa visku vosi.”—Yesaya 25:8.

• Akufwa azamuyuka.

  “Ŵanthu wosi wo ŵe mumiwunda yachikumbusu, azamukuvwa mazu ngaki ndipu azamutuwamu.”—Yohane 5:28, 29.

  “Kwazamuja chiyuka cha ŵanthu arunji ndi ambula urunji.”—Machitidu 24:15.

• Palivi yo wazamusoŵa pakuja ndipuso ntchitu.

  “Yiwu azamuzenga nyumba ndi kujamu, ndipuso azamulima minda ya mphereska ndi kurya vipasu vaki. Yiwu azamuzenga nyumba kuti wajemu munthu munyaki cha. Ndipuso azamulima kuti waryi munthu munyaki cha. . . . Ndipu ŵanthu ŵangu akusankhika azamukondwa ukongwa ndi ntchitu za manja ngawu.”—Yesaya 65:21, 22.

• Kwazamuŵavi nkhondu.

  “Iyu wamalisa nkhondu pacharu chosi chapasi.”—Salimo 46:9.

  “Mtundu wazamunyamuwa lipanga cha kuti uyukiyi mtundu unyaki, Ndipu ŵanthu azamusambira so nkhondu cha.”—Yesaya 2:4.

• Kwazamuŵavi nja.

  “Charu chiperekengi vipasu vaki; Chiuta, Chiuta widu watitumbikengi.”—Salimo 67:6.

  “Pacharu chapasi pazamuja chakurya chinandi; ndipu chazamusapaliya pachanya pa mapiri.”—Salimo 72:16.

• Kwazamuŵavi ukavu.

  “Ŵanthu akavu aluwikengi cha nyengu zosi.”—Salimo 9:18.

  “Iyu wazamutaska akavu wo apempha chovyu, ndipuso ŵanthu akusika kweniso weyosi yo walivi wakumuwovya. Iyu wazamuchitiya chitima ŵanthu akusika ndi akavu, ndipu wazamutaska maumoyu nga ŵanthu akavu.”—Salimo 72:12, 13.

Mwangawona malayizgu ngosi yanga, sonu kumbi pangaŵa pakuvwika cha kuti Yesu wawonengi kuti Ufumu waku Chiuta ngwakukhumbika ukongwa? Po wenga pacharu chapasi, iyu wakambiyangaku munthu weyosi yo wenga ndi mtima wakuvwisiya vakukwaskana ndi Ufumu waku Chiuta. Iyu wachitanga venivi chifukwa waziŵanga kuti Ufumu ndiwu wazamumalisa masuzgu ngosi ngo tiwona mazuŵa nganu.

Kumbi vo Bayibolu lilayizga vakukwaskana ndi Ufumu vakukondwesani? Asani ndi viyo, kumbi mungachita wuli kuti musambiri vinandi vakukwaskana ndi Ufumu? Nanga mungachita wuli kuti muziyanduwi ndi vitumbiku venivi? Nkhani ya umaliru pa nkhani izi yimukengi mafumbu ngenanga.