FUNDU YA M’BAYIBOLU: ‘Lutirizgani . . . kugowokiyana ndi mtima wosi, chinanga kuti munyaki we ndi chifukwa chakudandauliya va munyaki. Nge mo Yehova wakukugowokiyani ndi mtima wosi, namwiso chitani viyo.’​—Ŵakolose 3:13.

Kumbi fundu iyi ying’anamuwanji? Bayibolu liyeruzgiya ubudi ndi ngongoli ndipu kugowoke litikuyeruzgiya ndi kugowoke ngongoli. (Luka 11:4) Buku linyaki likamba kuti, m’Malemba mazu ngachigiriki ngo akungafwatuliya kuti “kugowoke” ngang’anamuwa “kuleka kukumbuska ngongoli.” Ndichu chifukwa chaki asani tagowoke munthu, tikumbusa cha vo wakutinangiya. Kugowoke kung’anamuwa kuti tizomerezga vinthu viheni vo watichitiya cha pamwenga kuwona kuti watinangiya kamanavi. M’malu mwaki tiluwaku ŵaka vo watinangiya, chinanga kuti pangaja chifukwa chakuvwika “chakudandawuliya.”

Kumbi fundu iyi njakovya mazuŵa nganu? Tosi tibuda chifukwa tikutole ubudi kwaku Adamu. (Ŵaroma 3:23) Mwaviyo, nchinthu chazeru kugowoke anyidu chifukwa nasi tikhumba kuti nawu atigowokiyengi. Kweniso tiyanduwa ukongwa asani tigowoke anyidu. Nchifukwa wuli tikamba viyo?

Asani tisungiya anyidu chakukhosi tingakumana ndi masuzgu. Kusunga chakukhosi kungatipangisa kuti tijengi ambula kukondwa ndipuso ambula kufwatuka. Kweniso vingachitisa kuti titami matenda ngakulu. Dr. Yoichi Chida ndi Andrew Steptoe, wo awona va umoyu angulemba kuti: “Kafukufuku walongo kuti kukwiya kweniso kusunga vifukwa kutambisa matenda nga mtima.”​—Journal of the American College of Cardiology.

Kuti tije ndi umoyu wamampha tikhumbika kugowoke anyidu. Asani tigowoke anyidu ndi mtima wosi vitovya kuti tikoliyanengi nawu ndipuso kuti ubwezi widu uleki kumala. Kweniso asani tigowoke anyidu ndikuti tiyezga Chiuta yo wagowoke ndi mtima wosi ŵanthu wo alapa. Ivi ndivu wakhumba kuti nasi tichitengi.​—Marko 11:25; Ŵaefesu 4:32; 5:1.