Kumbi Vingachitika Kuja Akuyanana pa Nkhani ya Chuma?
Mu vyaru vinandi, ŵanthu achita viwoneseru chifukwa chakuti awona kuti ayanana cha pa nkhani ya chuma. Masuzgu ngenanga ngakuwa ukongwa chifukwa cha mulili wa COVID-19. Venivi vachitiska kuti ŵanthu alekengi kukondwa chifukwa malokudawuni, kusoŵa vinthu vakukhumbika kweniso chovyu chakuchipatala, valongore limu mphambanu yikulu yo yilipu pakati pa akavu ndi akukhupuka.
Kumbi masuzgu nga chuma ngo ngachitiska kuti ŵanthu asuzgikengi ukongwa ngazamumala? Hinya. Bayibolu likonkhoska vo Chiuta wazamuchita kuti wamalisi masuzgu ngo tikumana nangu.
Masuzgu nga chuma ngo Chiuta wazamumalisa
Suzgu: Ŵanthu atondeka kunozga vakuti weyosi wasaniyengi vinthu vo wakhumbika pa umoyu.
Mo suzgu yeniyi yazamumaliya: Chiuta wazamuchitiska kuti Ufumu waki usere mumalu mwa maboma nga ŵanthu. Yiwu wazamulamuliya charu chosi chapasi kutuliya kuchanya.—Daniyeli 2:44; Mateyu 6:10.
Vo vazamuchitika: Chifukwa chakuti Ufumu waku Chiuta wazamulamuliya charu chosi chapasi, wazamuwovya kuti weyosi wasaniyengi vinthu vakukhumbika pa umoyu. Ŵanthu azamusuzgika so cha ndi ukavu pamwenga kufipa mtima kuti asaniyengi wuli vinthu vakukhumbika. (Salimo 9:7-9, 18) Mumalu mwaki, yiwu azamuyanduwa ndi ntchitu yo azamugwira, ndipu yiwu ndi mabanja ngawu azamujanga umoyu wakukondwesa. Bayibolu lilayizga kuti: “Yiwu azamuzenga nyumba ndi kujamu, ndipuso azamulima minda ya mphereska ndi kurya vipasu vaki. Yiwu azamuzenga nyumba kuti wajemu munthu munyaki cha. Ndipuso azamulima kuti waryi munthu munyaki cha.”—Yesaya 65:21, 22.
Suzgu: Ŵanthu angakhwecha cha vinthu vo vichitiska kuti akumanengi ndi masuzgu kweniso kuti asoŵengi vinthu vo akhumbika pa umoyu.
Mo suzgu yeniyi yazamumaliya: Chiuta wazamugwiriskiya ntchitu Ufumu waki kuti watuzgepu vinthu vo vichitiska kuti tichitengi mantha kweniso kujivwa kuti te ambula kuvikilirika.
Vo vazamuchitika: Mu Ufumu waku Chiuta, ŵanthu azamukumana so cha ndi vinthu vo vichitiska kuti yiwu pamwenga ŵanthu a mu banja lawu atayengi vinthu vo vingaŵawovya kuti aje ndi umoyu. Mwakuyeruzgiyapu, nkhondu, nja ndipuso milili kwazamuŵavi. (Salimo 46:9; 72:16; Yesaya 33:24) Chiuta wakukamba kuti: “Ŵanthu ŵangu azamuja mumalu ngachimangu, azamuja mumalu ngakuvikilirika kweniso mumalu ngakupumuliyamu ngachimangu.”—Yesaya 32:18.
Suzgu: Kanandi ŵanthu akandilizgika ndi ŵanthu akujikuzga kweniso ambunu.
Mo suzgu yeniyi yazamumaliya: Ŵanthu wo azamuwusika ndi Ufumu waku Chiuta, azamusambira kwanja ukongwa anyawu kuluska mo atijiyanjiya ŵeneku.—Mateyu 22:37-39.
Vo vazamuchitika: Mu Ufumu waku Chiuta, weyosi wazamulongonga chanju cho Chiuta wenachu, cho “chikhumba vakuchija pe cha.” (1 Akorinto 13:4, 5) Bayibolu likamba kuti: “Azamupwetekana cha pamwenga kusakazana muphiri langu losi lakupaturika, chifukwa charu chapasi chazamuzaza ndi kuziŵa Yehova a nge mo maji ngazaziya nyanja.”—Yesaya 11:9.
Bayibolu lilongo kuti tija mu mazuŵa ngakumaliya nga nyengu yinu kweniso kuti pambula kuswera Chiuta wafiskengi layizgu laki lakuti wamalisengi masuzgu ngosi nga chuma. b (Salimo 12:5) Kweni pasonu panu, fundu za mu Bayibolu zingakuwovyani kumalana ndi masuzgu nga chuma ngo mukumana nangu. Mwakuyeruzgiyapu, wonani nkhani yakuti “Vo Mungachita Asani Musaniya Ndalama Zimana” ndipuso yakuti “Kodi Mungatani Kuti Musakhale Wokonda Ndalama?”
a Bayibolu likamba kuti zina laku Chiuta ndi Yehova.—Salimo 83:18.
b Kuti muziŵi chifukwa cho mutenere kugomezge Bayibolu, wonani nkhani yakuti “Bayibolu ndi Buku la Uneneska.”
Mungayanja Kuŵerenga so Nkhani Izi
CHIGONGWI CHA MLINDA
Kumbi ndi Vinthu Wuli vo Ufumu Waku Chiuta Ufiskengi?
Yesu waziŵanga kuti Ufumu waku Chiuta ndi boma lija lo lingamalisa masuzgu ngosi pacharu. Kumbi ndi vinthu wuli vo Ufumu waku Chiuta wachitapu kuti tiwugomezgi?
KUKONKHOSKA MAVESI NGA MU BAYIBOLU
Kukonkhoska Lemba la Mateyu 6:34—“Lekani Kufipiya Mtima va Mawa”
Yesu wang’anamuwanga kuti tilekengi kuŵanaŵaniya va munthazi cha, pamwenga vo tazamuchita kunthazi.
