Charu cha United States kweniso vyaru vinyaki 30 va ku Europe, vingususka mwanthazi charu cha Russia chifukwa chakutombozga abali ŵidu. Vyaru venivi vingususka charu cha Russia pa nkhumanu yo wupu wa Organization for Security and Co-operation in Europe (OSCE) unguchitiska. Nkhumanu iyi yinguchitika * pa 23 July, 2020.

Pa nkhumanu yeniyi, khansala wakumiya wupu wa OSCE ku U.S. Ms. Lane Darnell Bahl, wangukamba kuti: “Charu cha United States ndi vyaru vinyaki vinandi asuska ndipu alutirizgengi kususka vo boma la Russia lichita. Ivi veviyo chifukwa malipoti ngalongo kuti apolisi ku Russia afufuza nyumba za Akaboni aku Yehova, kuŵamanga kwambula mulandu, kuŵatombozga, kuŵaŵika mujeri ndipuso anyaki atiŵayeruzga kuti akaje mujeri kwa vyaka 6.”

Arara ŵenaŵa angukwaskika ndi malipoti ngapambula kuswera kuti arara aboma la Russia angufufuza nyumba za Akaboni aku Yehova zakujumpha 100 Muchigaŵa cha Voronezh. Ms. Bahl wangukamba kuti: “Vo boma la Russia lichita pakutombozga ŵanthu amuchisopa cho chichita vinthu mwachimangu vakofya ukongwa.”

Wachiŵi wakumiya charu cha United Kingdom (UK), Ms. Nicola Murray, wangukamba so kuti wakwaskika ndi “mo chiŵerengeru cha nyumba zo zifufuzika chikwere kweniso unandi wa nyumba zo zifufuzika pa nyengu yimoza vichitiska kuti alutirizgi kutombozga Akaboni aku Yehova.” Ms. Murray wangulutirizga kukamba kuti: “Arara a boma la Russia angufufuza ndipuso kutombozga Akaboni anyaki chifukwa chakuti nyengu zosi achita vinthu vakukwaskana ndi kusopa kwawu.”

Arara amuchigaŵa cha Voronezh angukamba kuti Akaboni angutoleke kujeri chifukwa chakuti “agwiriskiyanga ntchitu vinthu vambula kuzomerezeka.” Kweni Ms. Bahl wangukamba kuti vinthu vo atiŵapusikiziya Akaboni vaboza. Yiwu atiŵapusikiziya kuti asunga malipoti kweniso nkhani zinyaki pa vipangizu vasonu, aja mumagulu ndipuso agwiriskiya ntchitu videoconference pakupanga maunganu. Ms. Bahl wangukamba kuti vinthu vo arara a boma ku Russia achita “vachilendu kweniso vakuchitiska soni.” Iyu wangukamba kuti: “Ndigwiriskiya ntchitu nthowa zenizi zo akamba kuti ziheni zuŵa lelosi.” Wangukamba so kuti ŵanthu aku Russia angulumikiza nkhumanu yo yachitikanga ndi wupu wa OSCE ndipu “nawu ŵenga mugulu lakugwiriskiya ntchitu nthowa yo awonanga kuti njiheni.”

Pa nkhumanu yeniyi, * ŵanthu 27 akutuliya muvyaru vakupambanapambana va ku European Union (EU) angukamba kuti: “Pa wupu wo wuziŵika kuti Permanent Council taja tichivwa kananandi waka ŵanthu wo amiya boma la Russia achikamba kuti Akaboni aku Yehova asopa mwawanangwa ndipu alutirizgengi kuchita vinthu vakukwaskana ndi kusopa kwawu mwawanangwa. Ndipu wanangwa wakusopa pamwenga vo agomezga vinguzomerezeka ndi Boma la Russia. Chinanga kuti ve viyo, kweni tilutirizga kuwona malipoti nganandi ngakukwaskana ndi nyumba zo zifufuzika, kumangika kwa Akaboni ndipuso kufufuza nkhani mwambula kuzomerezeka zakukwaskana ndi Akaboni aku Yehova. Venivi vikoliyana cha ndi vo ŵanthu a ku Russia angukamba.”

Wupu wa EU ungukamba so kuti: “Ŵanthu wosi, kusazgiyapu Akaboni aku Yehova atenere kukondwa ndi wanangwa wawu mwachimangu nge wanangwa wakusopa pamwenga kuchita vo agomezga, wanangwa wakuwungana pamoza, kupanga maunganu mwachimangu kweniso wanangwa wakulongoro kwambula sankhu. Venivi ndivu wupu wa Constitution of the Russian Federation [and] Russia’s OSCE ungulayizga mwakukoliyana ndi dangu la pacharu chosi.”

Ms. Murray wangukamba so vo boma la UK lingukamba kuti charu cha Russia chileki kutombozga Akaboni aku Yehova.

Ms. Bahl wangukambiya charu cha Russia kuti: (1) aleki kufufuza milandu yakulimbana ndi Akaboni aku Yehova, (2) aŵaweze Akaboni aku Yehova likulu lawu ku Russia ndipuso (3) aŵatuzgi mwaliŵi Akaboni wosi wo ŵe kujeri.

Yaka nkhakwamba cha kuti mawupu ngasuski mwanthazi vo charu cha Russia chichita pakutombozga abali ŵidu. Charu cha Russia akuchitcheŵeskapu kali ndi vo chichita. Ndipu charu chosi chiziŵa mo charu cha Russia chitombozge abali ndi azichi ŵidu. Chakukondwesa ukongwa ntchakuti, Yehova wawona mo abali ndi azichi ŵidu asuzgikiya ku Russia. (Masalimo 37:18) Ada ŵidu achanju kuchanya alutirizgengi kutumbika abali ŵidu kuti alutirizgi kuja akugomezgeka, achiganga ndipuso kuti afiskengi kukunthiyapu.—Masalimo 37:5, 28, 34.