Pa 23 October 2020, * khoti la mutawuni ya Oktyabrsky lo le muchigaŵa cha Kirov lazamupereka cheruzgu chaki pa mulandu wakukwaskana ndi Mubali Anatoliy Tokarev. Iyu wangayeruzgika kuti wakaje mujeri kwa vyaka vitatu.

Anatoliy Tokarev

• Chaka cho Wakuwiya: 1958 (ku Baranovskaya, mutawuni ya Kirov)

• Mo Wakukuliya: Wakulereka ndi ama ŵaki. Wagwiranga ntchitu yakunozga makompyuta wechendato peshoni. Iyu watanja vakujambulajambula, kutchaya tchesi ndipuso kumba kodiyoni. Wakutorana ndi Margarita mu 1979. Yiwu ŵe ndi ŵana ŵaŵi

• Iyu wati wayamba kusambira vasayansi, wangwamba kugomezga kuti kulivi Chiuta. Pa nyengu yo wenga ndi vyaka 27, wangwamba kusambira Bayibolu ndi Akaboni aku Yehova ndipu wanguziŵa kuti vo Bayibolu lisambiza visuskana cha ndi sayansi

Pa 24 May 2019, arara aboma wo angutuwa ku Center for Countering Extremism angufufuza nyumba ya Mubali Tokarev. Apolisi angwamba kumufumba mafumbu Mubali Tokarev. Yiwu anguwofyeza banja la Mubali Tokarev kuti asani mubali uyu waleka kuzomereza kuti vo achita “vakofya” aŵatombozgengi. Mubali Tokarev wangutoleke ku khoti kuti akamufumbi mafumbu.

Pati pajumpha myezi pafufupi yinkhondi, Mubali Tokarev angumumba mulandu mwakukoliyana ndi fundu zo ze mu marangu ngaŵi nga Criminal Code of the Russian Federation. Iyu atimumba mulandu wakuti wapereka ndalama ku gulu “lakofya.” Loya wakumiya boma wagwiriskiya so ntchitu mazu ngo ngangujambulika ku nyumba ya Mubali Tokarev mwakuchita kubisa kuti amusaniyi ndi mulandu wakuti wachitiskanga maunganu mwakugwiriskiya ntchitu mabuku “ngakofya” ngo ngakukanizika.

Titimupemphere Mubali Tokarev ndi banja laki. Tigomezga kuti Yehova walutirizgengi ‘kuŵachitiya vinthu mwakugomezgeka.’—Salimo 18:25.