Charu chimalengi cha, chazamukufya ndi motu cha ndipu palivi charu chinyaki cho chazamusere mumalu mwaki. Bayibolu likamba kuti Chiuta wangulenga charu kuti ŵanthu ajengemu kwamuyaya.

•   “Arunji azamulonde charu chapasi ndipu azamuja mwenimo kwamuyaya.”​—Sumu 37:29.

•   “[Chiuta] wakujalika charu chapasi pachiŵanja chakukho. Chituzgikengepu cha pamalu ngaki muyaya ndi muyaya.”​—Sumu 104:5.

•   “Charu chapasi chijengepu mpaka muyaya.”​—Wakutaula 1:4.

•   “Mweniyo wakupanga charu chapasi, ndiyu wakuchipanga ndi kuchijalika pamalu ngakukho, . . . wakuchilenga kwambula chilatu cha, kweni wakuchilenga kuti ŵanthu ajengemu.”​—Yesaya 45:18.

 Chiuta wazomerezengi cha kuti ŵanthu achinangiyi limu charu chapasi ndi nkhondu pamwenga vinthu vinyaki. Mumalu mwaki, iyu wazamunanga “wo ananga charu chapasi.” (Chivumbuzi 11:18) Kumbi wazamuchita wuli venivi?

 Chiuta wazamutuzgapu maboma nga ŵanthu chifukwa ngatondeka kuvikiliya charu ndipu Ufumu waki ndiwu wazamulamuliya mumalu mwa maboma ngenanga. (Danyele 2:​44; Mateyu 6:​9, 10) Mwana waku Chiuta, Yesu Khristu ndiyu wazamulamuliya Ufumu wenuwu. (Yesaya 9:6, 7) Pa nyengu yo Yesu wenga pacharu chapasi, wangulongo kuti wenga ndi nthazi pa chilengedu. (Mariko 4:​35-​41) Nge Fumu ya Ufumu waku Chiuta, Yesu wazamulamuliya charu chosi kweniso vinthu vosi vo ve mwenimo. Iyu wazamunozga vinthu pacharu chapasi kuti viziyanani ndi mo venge mumunda wa Edeni.​—Mateyu 19:28; Luka 23:43.

 Awa. Ŵanthu anyaki akamba kuti charu chazamukufya ndi motu chifukwa cha fundu yo ye pa lemba la 2 Peturo 3:7 lo likamba kuti: “Kuchanya ndi charu chapasi vasungikiya motu.” Tiyeni tikambiskani fundu ziŵi zakukhumbika ukongwa zo zingatiwovya kuvwisa vo mazu yanga ngang’anamuwa:

1.   Mazu ngakuti “kuchanya,” “charu chapasi” ndipuso “motu” ngamiya vinthu vinandi mu Bayibolu. Mwakuyeruzgiyapu pa Chiyambo 11:1 pakamba kuti: “Charu chosi chapasi chenga ndi chineneru chimoza.” Pa lemba ili, mazu ngakuti “charu” ngamiya ŵanthu.

2.   Mavesi nganyaki ngo nge pafupi ndi 2 Peturo 3:7 ngatitiwovya kuziŵa vo mazu ngakuti kuchanya, charu chapasi ndi motu vimiya. Mavesi 5 ndi 6 ngayeruzgiya vo vazamuchitika kunthazi ndi vo vinguchitika pa Chigumula cha mu nyengu yaku Nowa. Pa nyengu iyi ŵanthu pe ndiwu angufwa, kweni charu chingunangika cha. Chigumula chingupeya ŵanthu wosi aheni wo akambika kuti “charu.” (Chiyambo 6:11) Chigumula chingunanga so “kuchanya,” ko kwamiyanga ŵanthu wo alamuliyanga pa nyengu yo. Pa nyengu iyi charu chingunangika cha kweni ŵanthu aheni ndiwu angunangika. Nowa ndi banja laki angutaskika pa nyengu yo charu chingunangika ndipu yiwu anguhara charu chapasi pavuli pa Chigumula.​—Chiyambo 8:​15-​18.

 Nge mo maji ngangubayiya ŵanthu pa Chigumula, “motu” wo ukambika pa 2 Peturo 3:7 wazamunanga charu chapasi cha kweni wazamunanga ŵanthu aheni. Chiuta wakulayizga “kuchanya kufya ndi charu chapasi chifya,” mo “mwazamuja urunji.” (2 Peturo 3:​13) “Charu chapasi chifya,” pamwenga kuti ŵanthu wo azamutaskika azamulamulika ndi “kuchanya kufya,” pamwenga kuti Ufumu waku Chiuta. Pa nyengu yo Ufumu waku Chiuta wazamulamuliya, charu chazamuja paradayisu mo mwazamukuŵa chimangu.​—Chivumbuzi 21:​1-4.