Kumbi Dyaboli Waliku Nadi?

JULANI

Vo Bayibolu Limuka

Hinya, Dyaboli waliku nadi. Iyu ndi mungelu yo wakugalukiya Chiuta ndi kusambuka kuja muheni ndipu ndiyu “walamuliya charu.” (Yohane 14:30; Aefeso 6:11, 12) Bayibolu livumbuwa vakuchita vaku Dyaboli kuziya mu vo mazina ngaki yanga ngang’anamuwa:

Satana, kung’anamuwa “Wakususka.”—Yobu 1:6.
Dyaboli, kung’anamuwa “Wakukamba vinthu viheni.”—Chivumbuzi 12:9.
Njoka, kung’anamuwa “Wakunyenga.”—2 Akorinto 11:3.
Wakuyesa.—Mateyu 4:3.
Waboza.—Yohane 8:44.

Dyaboli ndi maŵanaŵanu ngaheni nga mumtima wa munthu cha

Ŵanthu anyaki aŵanaŵana kuti Satana Dyaboli ndi maŵanaŵanu pamwenga jalidu liheni lo munthu watuŵa nalu. Kweni mu Bayibolu mwe nkhani yo yilongo kuti nyengu yinyaki Chiuta wangulongoro ndi Satana. Chiuta ndi murunji, mwaviyo mu mtima mwaki mulivi uheni wewosi. (Dotoronome 32:4; Yobu 2:1-6) Kweniso nyengu yinyaki, Satana wanguyesa Yesu yo walivi ubudi. (Mateyu 4:8-10; 1 Yohane 3:5) Mwaviyo, Bayibolu lilongo kuti Dyaboli ndi maŵanaŵanu pamwenga uheni wo we mumtima mwa munthu cha, kweni iyu waliku nadi.

Kumbi titenere kuzizwa asani ŵanthu anyaki akamba kuti Dyaboli kulivi? Awa, chifukwa Bayibolu likamba kuti Satana wapusika ŵanthu kuti wafiski khumbu laki. (2 Atesalonika 2:9, 10) Nthowa yikulu yo Satana wagwiriskiya ntchitu, nkhupusisa ŵanthu kuti agomezgengi kuti iyu kulivi.—2 Akorinto 4:4.

Vinthu vaboza vo ŵanthu anyaki akamba vakukwaskana ndi Dyaboli

Fundu yaboza: Zina linyaki laku Dyaboli ndi Lusifara.

Fundu yauneneska: Mazu nga Chiheberi ngo mu ma Bayibolu nganyaki akungafwatuliya kuti “Lusifara” ngang’anamuwa “wakuŵala.” (Yesaya 14:12) Nkhani yo ye mu chaputala ichi yilongo kuti mazu yanga ngakamba va mafumu ngakujikuzga nga ku Babiloni ngo Chiuta wangungasisa chifukwa chakujikuzga kwawu. (Yesaya 14:4, 13-20) Mwaviyo, mazu ngakuti “wakuŵala” angagwiriskiyanga ntchitu pa kunyoza mafumu nga ku Babiloni ngati ngathereskeka.

Fundu yaboza: Chiuta ndiyu wakutuma Satana kuti “walangengi ŵanthu.”

Fundu yauneneska: Dyaboli ndi muteŵeti waku Chiuta cha, kweni ndi murwani waki. Satana Dyaboli watombozga ateŵeti aku Chiuta kweniso watiŵapusikiziya.—1 Peturo 5:8; Chivumbuzi 12:10.