Kumbi Ufumu waku Chiuta Ntchinthu Wuli?

JULANI

Vo Bayibolu Limuka

Ufumu waku Chiuta ndi boma chayilu lo likujalikiskika ndi Yehova Chiuta. Mu Bayibolu, “Ufumu waku Chiuta” udanika so kuti “ufumu wakuchanya” chifukwa chakuti ulamuliya kutuliya kuchanya. (Mariko 1:14, 15; Mateyu 4:17, Bayibolu la King James Version) Chinanga kuti Ufumu uwu we ndi vigaŵa vinandi va maboma nga ŵanthu, kweni boma ili ndapachanya ukongwa kuluska maboma nganyaki ngosi.

Wo alamuliya. Chiuta wakusankha Yesu Khristu kuja wakulamuliya wa ufumu waki, ndipu wakumupaska nthazi zo ziluska munthu weyosi yo walamuliya. (Mateyu 28:18) Yesu wagwiriskiya ntchitu nthazi zenizi mwakwenere chifukwa pa nyengu yo wenga pacharu chapasi, wangulongo kuti ngwakugomezgeka kweniso kuti ngwalisungu. (Mateyu 4:23; Mariko 1:40, 41; 6:31-34; Luka 7:11-17) Mwakulongozgeka ndi Chiuta, Yesu wasankha ŵanthu akutuliya mu mitundu yosi wo “azamuwusa charu chapasi nge mafumu” limoza ndi iyu kuchanya.—Chivumbuzi 5:9, 10.
Utali wa nyengu. Mwakupambana ndi maboma nga ŵanthu ngo ngalamuliya kwa nyengu yimanavi ndi kutuwapu, Ufumu waku Chiuta “wazamubwangandulika cha.”—Danyele 2:44.
Zika za Ufumu. Weyosi yo wachita khumbu laku Chiuta, wangaja zika ya Ufumu waku Chiuta kuleka kutole mtundu pamwenga ko wakuwiya.—Machitidu 10:34, 35.
Marangu. Marangu nga Ufumu waku Chiuta ngakanizga ŵaka kuchita vinthu viheni pe cha. Yingu ngasambiza zika za ufumu uwu kuja ndi jalidu lamampha. Mwakuyeruzgiyapu, Bayibolu likamba kuti: “‘Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi.’ Lenili ndilu dangu likulu kweniso lakwamba. Lachiŵi lakuyanana nalu ndakuti: ‘Uyanjengi munyaku nge mo utijiyanjiya wamweni.’” (Mateyu 22:37-39) Kwanja Chiuta ndi anyidu ndiku kungachitisa kuti tizisere mu Ufumu waku Chiuta.
Vo Ufumu usambiza. Ufumu waku Chiuta upereka fundu zapachanya za mijalidu yamampha ku ŵanthu wo ndi zika za Ufumu waki ndipu utiŵasambiza so fundu zo atenere kulondo.—Yesaya 48:17, 18.
Chilatu cha Ufumu wenuwu. Ŵo alamuliya mu Ufumu waku Chiuta, aryiya zika za Ufumu wenuwu masuku pamutu cha. M’malumwaki, yiwu achita vinthu ndi chilatu chakuti Chiuta wafiski malayizgu ngaki, nge layizgu lakuti ŵanthu wo atimuyanja azamuja ndi umoyu wambula kumala mu paradayisu pacharu chapasi.—Yesaya 35:1, 5, 6; Mateyu 6:10; Chivumbuzi 21:1-4.

Nkhani Zinyaki

Ufumu waku Chiuta Mafumbu ngo Bayibolu Limuka

Mungayanja Kuŵerenga so Nkhani Izi

ESSENTIAL BIBLE TEACHINGS

Kumbi Ufumu Waku Chiuta Ntchinthu Wuli?

Pa nyengu ya uteŵeti waki Yesu wasambizanga ukongwa za Ufumu waku Chiuta kuluska nkhani yinyaki yeyosi. Kwa vyaka vinandi akusambira ŵaki nawu apempheranga ukongwa kuti Ufumu waku Chiuta uzi.

CHIGONGWI CHA MLINDA

Kumbi Fumu ya Ufumu Waku Chiuta Ndiyani?

Ŵanthu wo akulemba Bayibolu akulemba fundu zo zingatiwovya kuziŵa yo wajengi Fumu ya Ufumu waku Chiuta. Mu mbiri yosi ya ŵanthu, ndi munthu yumoza pe yo wafiska mauchimi ngosi ngenanga.