Munthu Wakukhupuka ndipuso Lazaro mbanthu wo anguzumbulika mu nkhani yo Yesu wangukamba. (Luka 16:19-31) Munkhani yo, ŵanthu ŵenaŵa amiya magulu ngaŵi nga ŵanthu: (1) alongozgi akujikuzga a Chiyuda a mu nyengu yaku Yesu ndi (2) ŵanthu akusika kweni wo angulonde uthenga waku Yesu.

Mu nkhani iyi, tikambiskanengi mafumbu yanga:

•  Kumbi Yesu wangukambanji vakukwaskana ndi munthu wakukhupuka ndi Lazaro?

•  Kumbi nkhani yeniyi yinguchitika nadi?

•  Kumbi nkhani yeniyi yichiska chisambizu chakuti ŵanthu azamukufya ndi motu?

•  Kumbi nkhani ya munthu wakukhupuka ndi Lazaro ying’anamuwanji?

 Mu chaputala 16 cha Luka, Yesu wangukonkhoska vakukwaskana ndi anthulumi ŵaŵi wo vinthu vingusintha ukongwa pa umoyu wawu.

 Iyi ndi nkhani yakudumuwa yo Yesu wangukamba: Munthu wakukhupuka wajanga umoyu wa pachanya ukongwa. Wakupemphesa zina laki Lazaro wajanga pa geti la munthu wakukhupuka, ndipu walindizganga kuti wapaskiki chakurya cho chambotoka pathebulu la munthu wakukhupuka. Pati pajumpha nyengu, munthu wakupemphesa yo wangufwa ndipu angelu angumutole pafupi ndi Abrahamu. Munthu wakukhupuka nayu wangufwa ndipu wanguŵikika mumuwunda. Nkhani yingukonkhoska kuti wosi ŵenga amoyu ŵati afwa. Munthu wakukhupuka yo wangufwa wangutombozgeka ndi motu wa kulilima ndipu wangupempha Abulahamu kuti watumi Lazaro kuti wabizgi kasongu ka chikumbu chaki mumaji kuti wazizirisi lilimi laki. Abulahamu wangukana vo munthu wakukhupuka wangupempha ndipu wangukamba kuti vinthu vingusintha ukongwa kwa anthulumi ŵaŵi ŵenaŵa ndipu penga chinkhwawu chikulu ukongwa pakati pa ŵanthu ŵenaŵa, chakuti palivi munthu yo wangajumphapu.

 Awa. Iyi ndi ntharika yo Yesu wangukamba kuti watisambizi. Akaswiri ndiwu anguziŵa fundu yakuti nkhani iyi ndi ntharika. Mwakuyeruzgiyapu, kamutu ka mu Bayibolu laku Luther la mu 1912, likamba kuti nkhani iyi ndi ntharika. Ndipu Bayibolu la tchalitchi cha Katolika la Jerusalem, mu mazu ngamumphata, likamba kuti “ntharika ya mu nkhani iyi yilivi malifalensi ngakulongo kuti ŵanthu wo azumbulika munkhani iyi ŵenga ŵanthu chayiwu.”

 Kumbi Yesu wasambizanga kuti munthu walutirizga kuja ndi umoyu asani wafwa? Kumbi wang’anamuwanga kuti ŵanthu anyaki asuzgika ndi motu wa helu asani ŵafwa kweniso kuti Abrahamu ndi Lazaro ŵenga kuchanya? Pe fundu zinandi zo zilongo kuti fundu zenizi zauneneska cha.

 Mwakuyeruzgiyapu:

•   Asani munthu wakukhupuka wenga kumalu chayingu ngamotu ngakutombozgiyaku ŵanthu, kumbi motu watingi ukamuskengi cha maji ngo ngenga kusongu kwa chikumbu chaku Lazaro?

•   Chinanga maji ngo ngakalekengi kukamuka chifukwa cha motu, kumbi donthu limoza la maji latingi lichitiskengi munthu wakukhupuka kuti waleki kuvwa kuŵaŵa chifukwa cha motu chayiwu wo wamuwotchanga?

•   Kumbi Abulahamu watingi wajengi wuli ndi umoyu kuchanya, po Yesu wangukonkhoska umampha kuti pa nyengu yo wakambanga ntharika yeniyi, palivi yo wanguluta kuchanya?—Yohane 3:13.

 Awa. Chinanga kuti nkhani iyi yikuchitika cha, anyaki akamba kuti nkhani iyi yilongo kuti ŵanthu amampha aluta kuchanya ndipu ŵanthu aheni atombozgeka ku motu wa helu. a

 Kumbi fundu yeniyi njauneneska? Awa.

 Chisambizu chakuti ŵanthu azamukufya ku motu helu, chikoliyana cha ndi vo Bayibolu likamba vakukwaskana ndi mo ŵanthu aliri. Mwakuyeruzgiyapu, likambapu cha kuti ŵanthu amampha wo atufwa akondwa ndi umoyu kuchanya pamwenga ŵanthu aheni atombozgeka ku motu wa helu. Mumalu mwaki, Bayibolu likamba mwakuvwika umampha kuti: “Amoyu aziŵa kuti afwengi, kweni akufwa aziŵa chechosi cha.”—Wakutawula 9:5.

 Nkhani iyi yilongo kuti magulu ngaŵi nga ŵanthu ŵenaŵa, vinthu vatingi visinthengi ukongwa pa umoyu wawu.

 Munthu wakukhupuka wamiya alongozgi achisopa cha Chiyuda “wo ayanjanga ndalama.” (Luka 16:14) Yiwu avwisiyanga po Yesu walongoronga, kweni asuskanga uthenga waki. Alongozgi ŵenaŵa awonanga ŵanthu kuti mbambula kuzirwa.—Yohane 7:49.

 Lazaro wamiya ŵanthu wo avwisiyanga uthenga waku Yesu ndipuso atinkhikanga ndi alongozgi achisopa cha Chiyuda.

 Vinthu vingusintha ukongwa ku magulu ngaŵi ngenanga.

•   Alongozgi achisopa cha Chiyuda aŵanaŵananga kuti Chiuta wakondwa nawu. Kweni vajanga nge kuti afwa po Chiuta wanguŵakana ndipuso wangukana nthowa zo agwiriskiyanga ntchitu pa kumusopa chifukwa akukana kulonde uthenga waku Yesu. Ndipu uthenga wo Yesu ndi akusambira ŵaki apharazganga, waŵatombozganga alongozgi a Chiyuda.—Mateyu 23:29, 30; Machitidu 5:29-33.

•   Ŵanthu wo angujowoleka ndi alongozgi ŵawu kwa nyengu yitali, angwamba kuyanjika. Anandi anguzomera uthenga wa mu Malemba wo Yesu wasambizganga ndipuso unguŵawovya. Yiwu ŵenga ndi mwaŵi wakuti ayanjikengi ndi Chiuta kwamuyaya.—Yohane 17:3.