“Kondwani ndi chilindizga. Mukunthiyengepu masuzgu. Mufwiyengepu kupemphera.”—Aroma 12:12, Bayibolu la Charu Chifya.

 “Kondwani ndi chilindizga, muzikirengi asani mukunthiyapu, mupempherengi nyengu zosi.”—Aroma 12:12, English Standard Version.

 Mu mavesi yanga, wakutumika Paulo wachiskanga Akhristu ku Roma kuti akhumbika kuchita vinthu vitatu vo vatingi viŵawovyengi kuti aje ndi chivwanu chinanga kuti atombozgekanga kweniso asani akumana ndi masuzgu nganyaki.

 “Kondwani ndi chilindizga.” Akhristu ŵe ndi chilindizga chamampha ukongwa chakuzija ndi umoyu wamuyaya, anyaki amuja kuchanya ndipu anyaki anandi azamuja pacharu chapasi mu paradayisu. (Salimo 37:29; Yohane 3:16; Chivumbuzi 14:1-4; 21:3, 4) Chilindizga chenichi chisazgapu kuwona Ufumu waku Chiuta a uchimalisa masuzgu ngosi ngo ngatambuzga ŵanthu. (Daniyeli 2:44; Mateyu 6:10) Ŵanthu wo asopa Chiuta akondwa chinanga kuti atombozgeka, chifukwa aziŵa kuti chilindizga chawu chazamufiskika nadi ndipuso aziŵa kuti asani akunthiyapu Chiuta wakondwa nawu.—Mateyu 5:11, 12; Aroma 5:3-5.

 “Mukunthiyengepu masuzgu.” Mu Bayibolu, mazu nga Chigiriki ngo akungafwatuliya kuti “kukunthiyapu” kanandi ngang’anamuwa “kuleka kuthaŵa; kufwiyapu; ndipuso kulutirizga kuja wakukho.” Ŵanthu wo alondo Khristu ‘mbacharu cha,’ b ndipu aziŵa kuti atombozgekengi, ndichu chifukwa chaki akhumbika kukunthiyapu. (Yohane 15:18-20; 2 Timote 3:12) Asani Mkhristu watesesa kuteŵete Chiuta mwakugomezgeka chinanga kuti wakunthiyapu masuzgu, chivwanu chaki chakuti Chiuta wazakumupaska mphotu chija chakukho ukongwa. (Mateyu 24:13) Mwaviyo, chivwanu chakukho chenichi chitimuwovya kuti wakunthiyengepu masuzgu mwakuzikira ndipuso mwalikondwa.—Akolose 1:11.

 “Mufwiyengepu kupemphera.” Kuti alutirizgi kuja ndi chivwanu mwaku Chiuta, Akhristu achiskika kuti apempherengi nyengu zosi. (Luka 11:9; 18:1) Yiwu akhumbika kulondo ulongozgi wakutuliya kwaku Chiuta nyengu zosi ndipuso amuthembengi pa chechosi cho achita. (Akolose 4:2; 1 Atesalonika 5:17) Yiwu asimikiza kuti Chiuta wamukengi vosi vo angapempha chifukwa chakuti avwiya marangu ngaki kweniso achita vosi vo vitimukondwesa. (1 Yohane 3:22; 5:14) Ndipuso aziŵa kuti asani afwiyapu kupemphera, Chiuta waŵapaskengi nthazi zo akhumbikiya kuti alutirizga kuja ndi chivwanu chinanga angakumana ndi masuzgu wuli.—Afilipi 4:13

 Paulo wangulembe kalata Akhristu wo ajanga ku Roma cha m’ma 56 C.E. Mu chaputala 12 cha kalata yaki, iyu wangukamba vo angachita kuti aje ndi mijalidu yamampha yo Akhristu atenere kuja nayu, mo angachitiya vinthu ndi Akhristu anyawu kweniso ŵanthu anyaki wo Mbakhristu cha, ndipuso mo angachitiya vinthu mwachimangu asani atombozgeka. (Aroma 12:9-21) Akhristu ku Roma angulonde ulongozgi wenuwu pa nyengu yaki, chifukwa pati pajumpha waka kanyengu kamanavi, angwamba kuŵatombozga mwankhaza.

 Pati pajumpha vyaka vimanavi, mu 64 C.E., chimotu chikulu chingunanga tawuni ya Roma. Ŵanthu akambanga kuti Fumu Nero ndiyu yingwambisa motu. Mwakukoliyana ndi wakulemba mbiri munyaki wa ku Roma zina laki Tacitus, Nero wangumba mulandu Akhristu kuti ndiwu ayambisa motu kuti wajivikiliyi yija. Venivi vinguchitiska kuti Akhristu atombozgekengi mwankhaza. Ulongozgi waku Paulo wa mo angachitiya kuti akunthiyepu asani atombozgeka unguŵawovya kuti alutirizgi kuja ndi chivwanu kweniso kuti achitengi vinthu mwaulemu chinanga kuti asuzgika. (1 Atesalonika 5:15; 1 Peturo 3:9) Ŵanthu wo ateŵete Chiuta mazuŵa nganu akhumbika kuyezga chakuwoniyapu chawu.

 Woneriyani kavidiyo yaka kuti muwoni vo ve mubuku la Aroma.