Mulimu wesu wamunyika yoonse usumpulwa aamali iisangwa chakulipeda aBakamboni baJehova. a Balasanga kababelesya tubbokesi twakusanga tuli mumasena ngibakombela alubo zimwi nzila zyakusanga zililembedwe aapeji lilembedwe kuti Zyakusanga. Aapeji eelyo muntu ulalisalila kuti uyanda kusanga kumulimu uuchitwa munyika yoonse na naakuti mali njayanda kusanga njakugwasilizya nkwakkala naakuti uyanda kusanga koonse.

 Bakamboni baJehova tabagwisyi chakkumi pe naakuti kubuzigwa kuti bagwisye mali iilobubo kuti basange kuzwa kumali njibalaayo. (2 Bakorinto 9:7) Taakwe nitweendelezya ndido yamali pe naakuti kubbadalisya miswaangano yesu alubo aabo babbabbatizya bantu, balaazyakuchita kumadilwe, kumichado naakuti kuliimwi milimu yabukombi tabafozegwi pe. Tatuyanduuli mali kwiinda mukuuzya, kusaana mageemu naakuti kuyobukumbilila biya pe. Kuti muntu wasanga tawambilizigwi pe kubantu. (Matayo 6:2-4) Aawebbusayiti yesu amumabbuku takubikkwi zintu zyuuzigwa pe naakuti zyakuyanduulisya mali.

 Kumamanino aamweezi, mbungano imwi ayimwi yaBakamboni baJehova nga yaambilizya mali yakasangwa aambungano kumiswaangano yabo. Malekkoodi aazyamali aambungano imwi ayimwi alalangw-langwa kuchitila kuti kubonwe kuti mali yakasangwa ilikubelesegwa kabotu na.—2 Bakorinto 8:20, 21.

•   Tubbokesi twakusanga: Ulakonzya kusanga mali naakuti kubelesya macheck kutubbokesi tuli muMaanda aaBwaami, Mumasena Aachitilwa Miswaangano naakuti kulizimwi ndawu kuchitilwa miswaangano yesu.

•   Kusanga aaIntaneti: Muli zimwi zisi, ulakonzya kunjila aawebbusayiti yesu mpawo watyanka aalembedwe kuti “Zyakusanga” kuchitila kuti usange kubelesya kkaadi lyakubbenki, kutilansifeya mali kubbenki naakuti kubelesya zimwi nzila aaintaneti. b Bamwi Bakamboni ngabasala kubikka “cimwi cintu ambali” mweezi amweezi kuti basange mali kayizwa kuma-akkawunti aabo.—1 Bakorinto 16:2.

•   Kupulana nzuyanda kusanga: Zimwi zyakusanga ziyanda kupulana kakuchili chiindi naakuti ubone mbukonzya kusanga kweendalana amulawu. Kusanga kwamusyobo ooyu, kulakonzya kupa kuti kugwisya mutelo munyika yanu. Bantu biingi bakabona kuti kulagwasya kupulana nzibayanda kusanga kabachipona azintu zyeelede kuzoosangwa kuti bafwa. Kuti kuyanda kusanga kubelesya nzila zilaansi aawa, weelede kwaambuula aabakuwofesi yamutabi yaBakamboni baJehova yakubusena nkukkala:

  •   maakkawunti aakubbenki

  •   insurance apencheni

  •   mapulazi naakuti nyika

  •   mashares amabonds

  •   mawilu

 Kuti ujane makani miingi atala anzila zyakusanga zijanika kubusena nkukkala, tyanka aalembe kuti “Zyakusanga” kupeji lilaawebbusayiti yesu.