“Ikuti mwamulomba cintu cili coonse Taata, uyoomupa ncico muzina lyangu.”—Johane 16:23.

Lugwalo oolu lutondeezya kuti Jehova uyanda kuti tukombe kulinguwe kwiinda muzina lyaJesu Kristu katutabelesyi zifanikisyo, basaante naakuti kukomba mizimu. Chiindi nitukomba kuli Leza kwiinda muzina lyaJesu, tutondeezya kuti tulalumba akaambo kazintu nzitwakachitilwa aaJesu. Jesu wakaamba kuti: “Kunyina uuboola kuli Taata ccita kuti wainda mulindime.”—Johane 14:6.

“Amumwaambile zyoonse zili mumyoyo yanu.”—Intembauzyo 62:8.

Chiindi nitukomba kuli Jehova, tweelede kwaambuulaawe mbuli mbutwaambuula aamuzyali wesu. Nitukomba kuli Leza, tweelede kutondeezya kuti tulamulemeka alubo tweelede kukomba kazizwa aansi aamoyo kutali kwiindulula majwi ngitwakalemba mukabbuku naakuti majwi ngitwakajata aamutwe.

“Kufwumbwa cintu ncotumulomba ceendelana akuyanda kwakwe, ulatumvwa.”—1 Johane 5:14.

MuBbayibbele, Jehova utubuzya zintu nzyayanda kutuchitila anzitweelede kumuchitila. Kuti Leza asandule nkombyo zyesu, tweelede kukumbila zintu zyeendelana “akuyanda kwakwe.” Kuti tukonzye kuchita oobo, tweelede kubala Bbayibbele kuchitila kuti tumuzibe kabotu. Kuti twachita oobo, uyoozisandula nkombyo zyesu.

Kombela Zintu Zikugwasya Mubuumi. Tulakonzya kukombela kuti tujane chakulya, zyakuzwaata aakukkala. Tulakonzya kukomba kuli Leza katukumbila kuti atupe busongo bwakuti tusale munzila iilikabotu akuti atupe manguzu aakuti tulisimye chiindi nituli mumapenzi. Tulakonzya kukomba kuli Leza katukumbila kuti tube aalusyomo, atulekelele akuti atugwasye.—Luka 11:3, 4, 13; Jakobo 1:5, 17.

Kombela Bamwi. Bazyali balabotelwa kuti babona bana babo kabamvwanana. Mbukubede akuli Jehova, uyanda kuti toonse tumvwanane abamwi. Nkinkaako, tweelede kukombela bantu mbitukwetenaabo, bamumpuli, bana besu abeenzuma. Bbayibbele lyaamba kuti “amupaililane.”—Jakobo 5:16.

Komba Kolumba Leza. Leza Mulengi wesu alubo Bbayibbele lyaamba kuti atala anguwe: “Wakacita zibotu, wakamupa mvwula kuzwa kujulu aziindi eelyo nokuba micelo minji, alimwi wakamukkutya azilyo akuzuzya myoyo yanu akubotelwa.” (Milimo 14:17) Kuti twayeeyesesya atala azintu zibotu nzitwakachitilwa aaLeza ziyoopa kuti tumulumbe chiindi nitukomba. Tweelede kutondeezya kuti tulamulumba Leza kwiinda munzila njitulijataayo.—Bakolose 3:15.

Chimwi chiindi, kuti twabonaanga nkombyo zyesu zyanonoka kusandulwa, tulakonzya kumana manguzu. Eezi zyaamba kuti Leza takwe ndaba na andiswe? Peepe! Atubone zyakachitikila bamwi zikonzya kutugwasya kuti tuzumanane kukomba.

Steve waambwa kumasaangunino aamagazini eeyi wakaamba kuti, “Kaansinga teendakagwasigwa aakukomba, tandizi pe lino kuti nikuli ndilaali.” Niinzi chakagwasya Steve kuti achinche maboneno aakwe? Nkwiiya Bbayibbele alubo wakabona kuti weelede kuzumanana kukomba. Steve wakayungizya kuti, “Ndilakomba kuli Leza kandimulumba akaambo kakuti wakabelesya beenzuma kuti bandigwasye. Lino ndilikubotelwa mubuumi.”

Twiiyaanzi kuli Jenny wakali kubonaanga taakali kweelela pe kuti Leza aswiilile nkombyo zyakwe? Jenny wakati, “Chiindi nindakali kukataazikana zyiindilide, ndakali kukomba kuli Leza kandimubuzya kuti nkamboonzi nindakali kulimvwa kuti tandigwasyi pe.” Kukomba kwakamugwasya biyeni? Wakati, “Kwaambuula aaLeza munkombyo, kwakandigwasya kuti ndibe aamaboneno aalikabotu akubona kuti chiindi nindibonaanga Leza takwe ndaba andime nga teembandibona pe. Kuba aamaboneno aalikabotu kwakandigwasya kuti ndizumanane kukomba.” Kuzwa waawo, niinzi zyakachitika? Jenny wakayungizya kuti, “Kukomba kwakapa kuti Jehova ndimubone mbuli muntu ngundikonzya kubona aameso alubo ndakaziba kuti nguLeza ulaaluyando, nguNdeende akuti Mweenzuma uulibambilide kundigwasya chiindi choonse kuti ndazumanana kuchita zintu nzyayanda.”

Kwalino, atulange-lange zyakachitikila Isabel. Chiindi naakabaada, madokotela bakamubuzya kuti wakali kuzootumbuka mwana uulemene. Eezi zyakapa kuti akataazikane loko. Bamwi bakamubuzya kuti agwisye da. Isabel wakati, “Ndakakataazikana loko zyakuti ndakalikubonaanga ndilafwa biya.” Isabel wakachitaanzi muchiimo eechi? Wakati, “Ndakakomba akukomba kandikumbila kuti Leza andisimye.” Isabel wakazootumbuka mwana mulombe uutegwa Gerard, mwana ooyo wakazyalwa kalemene. Leza wakazisandula na nkombyo zyaIsabel? Iiyi wakazisandula. Nkamboonzi nitwaamba oobu? Isabel wakazoowamba kuti, “Lino mwanaangu ulaaminyaka iili 14, chiindi nindimubona kalikubotelwa mubuumi nikuba kalemene zinditondeezya kuti Leza wakazisandula nkombyo zyangu.”

Nzibakaamba bantu bali aajulu aawa zitondeezya kuti majwi aakaambwa aasintembawuzyo ngachoonzyo aakuti: “Yebo uyoomvwa kulomba kwababombe myoyo, O Jehova. Yebo uyookkazika myoyo yabo akubaswiililisya.” (Intembauzyo 10:17) Makani aaya atugwasya kuti tuzumanane kukomba.

MuBbayibbele mulembedwe nkombyo zyaJesu. Nkombyo iizibikene loko njeeyo njaakayiisya basikwiiya bakwe. Twiiyaanzi kunkombyo eeyo?