Jehova ututamba kuti tumubuzye zintu zyoonse zitukataazya mumizeezo amumyoyo yesu. (Intembauzyo 55:22) Tweelede kumubuzya mapenzi eesu woonse kazitakwe ndaba kuti mapati na naakuti maniini. Kuti iswe kazitukataazya zyaamba kuti aJehova zilamukataazya anguwe. Kukomba kuli Leza kutugwasya kuti tube aaluumuno lwamumizeezo.—Bafilipi 4:6, 7.

Chiindi nitulwaana aapenzi lyakukataazikana mumizeezo, tulakonzya kulimvwa katuli atulikke. Bamwi balakonzya kutabumvwisisisya buyumu-yumu mbutulikuswaana. (Tusimpi 14:10) Pesi kuti twakomba kuli Jehova amyoyo yesu yoonse ulatuswiilila akutumvwisisisya. Jehova ulatubona, ulizizi zintu zyoonse zituchisa azitukataazya alubo uyanda kuti tumubuzye atala anzizyo.—2 Makani 6:29, 30.

Kukomba kuli Jehova kupa kuti tube aachoonzyo chakuti ulaandaba andiswe. Tulakonzya kulimvwa mbuli mbakalimvwa sintembawuzyo ooyo wakakomba kati: “Wakubona kupenga kwangu; waazyiba mapenzi aangu mapati.” (Intembauzyo 31:7) Kuziba kuti Jehova ulaabona mapenzi ngituswaana kupa kuti twiinkilile kunembo kulisimya. Pesi kuli zyiingi nzyabona kutali mapenzi eesu kupela. Kusiyana abantu boonse, ulazimvwisisisya zintu nzituswaana alubo ulatuumbulizya kabelesya Bbayibbili.