BULANGILIZI BWIINDA KUBOTA! Mulengi wesu wakatusyomezya kuti tuyoopona kukabe kutamani aanyika. Nikuba boobo, bantu biingi tabaasyomi pe majwi aaya. Bamwi bati ‘Kuti muntu wazyalwa, chisyeede nkufwa.’ Bamwi balazisyoma kuti balakonzya kupona kukabe kutamani pesi kutali aanyika. Baamba kuti ulakonzya kupona buumi butamani kuti wafwa mpawo waya kujulu. Aniwe utyeni?

Kutanasandula mubuzyo ooyu, atulange-lange nsandulo zizwa muBbayibbele zyamibuzyo iitatu iitobela: Nzila njalengedwaayo muntu itondeezya kuti weelede kupona kwachiindi chilamfu biyeni? Ngaali makanze Leza ngakalaawo atala anyika abantu? Niinzi chipa kuti bantu kabafwa?

Leza wakalenga zintu zisiyene-siyene zipona pesi bantu balisiyene azimwi zilenge. Basiyene biyeni? Bbayibbele litondeezya kuti bantu mbabo abalikke bakalengwa “mucinkozya” chaLeza kabali “mbuli” nguwe. (Matalikilo 1:26, 27) Eezi zyambaanzi? Zyaamba kuti bantu bakalengwa kabakonzya kutondeezya bube bwaLeza mbuuli luyando abululami.

Kuyungizya waawo, bantu bakalengwa kabakonzya kuyeeya, kusala chibotu achibi alubo kabali achiyandisyo chakuziba Leza. Eezi nzizyo zipa kuti tubone bubotu bwazintu zyakalengwa, tuyande kudilowa akwiimba. Kwiinda zyoonse, bantu bakalengwa kabali achiyandisyo chakukomba Mulengi. Bube oobu, bupa kuti bantu basiyane azimwi zilenge zyoonse zili aanyika.

Kaansinga Leza wakalenga bantu kuti bapone kwachiindi chifwiifwi, wali kunoobalenga kabali abube oobu naakuti kabali achiyandisyo chakuchita zintu zisiyene-siyene na? Peepe. Zili antanganana kuti Leza wakalenga bantu kabali abube oobu kuti bakonzye kupona kababotelwa kukabe kutamani aanyika.

Bamwi bantu baamba kuti Leza taakatulengela kuti tuzookkale aanyika pe. Basyoma kuti tuli beenzu aanyika akuti Leza wakalenga nyika kuti asunke bantu kuti abone beelela kuyoopona kujulu. Kaansinga Leza mbaakakanzide, nizyaamba kuti nguwe weeta mapenzi. Eezi zyalikunookazyania abube bwaLeza nkaambo Bbayibbele lyaamba kuti: “Inzila zyakwe zyoonse zililuzi. Ngu-Leza uusyomeka  uutakwe cibi, uliluleme, uliluzi.”—Deuteronomo 32:4.

Kalipandulula makanze aaLeza atala anyika, Bbayibbele lyaamba kuti: “Majulu majulu aa-Jehova, pele nyika wakiiaba kubana ba-Adamu.” (Intembauzyo 115:16) Zili antanganana kuti Leza wakalenga nyika kuti ibe muunzi wabantu alubo wakabikka zintu zyoonse nzituyandikana kuti tubotelwe kukabe kutamani.—Matalikilo 2:8, 9.

“Majulu majulu aa-Jehova, pele nyika wakiiaba kubana ba-Adamu.”—Intembauzyo 115:16

Bbayibbele liwabikka antanganana makanze aLeza atala abantu. Wakabuzya mpuli yakusaanguna kuti: “Amuzyalisye, muvule, muzuzye nyika akwiibombya. Amweendelezye . . . abanyama boonse baputauka ansi.” (Matalikilo 1:28) Wakabuzya mpuli eeyi kuti ichite kuti nyika yoonse ibe Paradayizi. Nkinkaako, zili antanganana kuti Adamu aEva kuswaanizya abana babo bakali kuyoopona aanyika kukabe kutamani kutali kujulu.

Nkamboonzi nitufwa? Bbayibbele lyaamba kuti, umwi mungelo wakapapila Leza akuba Saatani Dyabbulosi mpawo wakanyongania makanze aaLeza mumuunda waEdeni. Wakazichita biyeni?

Saatani wakeena bazyali besu bakusaanguna, Adamu aEva kuti bapapile Leza. Majwi ngakaamba Saatani akali kutondeezya kuti Leza tayandi kuti balisalile chibotu achibi, nkinkaako bakasala kuswiilila nguwe kutali Leza. Zyakabeendela biyeni nibakasala kuswiilila Saatani? Bakazoofwa mbuuli mbaakababuzizye Leza. Bakasweekelwa mweenya wakupona aanyika kukabe kutamani.—Matalikilo 2:17; 3:1-6; 5:5.

Kutaswiilila kwaAdamu aEva nkuko kwakeeta mapenzi aanyika. Jwi lyaLeza liti: “Mbuboobo cibi mbucakanjila munyika kumaanza aamuntu omwe buyo [Adamu], alwalo lufu nkaambo kacibi, nkabela mbubonya obo lufu mbulwakazida bantu boonse.” (BaRoma 5:12) Tulafwa akaambo kachibi nchitwakajana kubazyali besu bakusaanguna kutali akaambo kakuti ‘nkuyanda’ kwaLeza naakuti nguwe wakazibamba.

Nikuba kuti Adamu aEva bakapapila Leza mumuunda waEdeni pesi Leza taakachincha pe makanze aakwe atala abantu anyika. Akaambo kakuti Leza ulatuyanda wakayanduula nzila yakutwaangununa kuchibi alufu. Mwaapostolo Pawulu wakati: “Cakuvola cazibi ndufu, pele caabilo ca-Leza mbuumi butamani bwamuli-Kristo Jesu Mwami wesu.” (BaRoma 6:23) Leza “mbwaakayandisya nyika, wakapa Mwanaakwe simuzyalwa alike [Jesu Kristu], kuti umwi umwi uumusyoma atafwidilili, pele abe abuumi ubutamani.” (Johane 3:16) Kwiinda mukupa buumi bwakwe kuti bube chinunuzyo, Jesu wakapa kuti tukonzye lubo kujana zilongezyo zyakasowegwa aAdamu. a

Lino-lino, Leza uyoozuzikizya chisyomezyo chakwe chakuchincha nyika kuti ibe paradayizi. Ulakonzya kuyoobona chisyomezyo eechi kachizuzikizigwa kuti waswiilila majwi aaJesu aakuti: “Amunjile mumulyango uumanikide, nkaambo mulyango uukwazeme anzila impati njiitola kukunyonyooka, nkabela abo banjila mulinjiyo mbanjibanji. Mulyango uumanikide anzila iipatide njiitola kubuumi, nkabela abo biijana mbace.” (Matayo 7:13, 14) Buumi bwesu bwakunembo buyeeme kunzila njitusalaayo. Zili kulinduwe kuti uyoosala biyeni.