Nzitwiiya Atala aLeza kuMapolofita
Chiindi Leza wakali kubelesya mapolofita kuti babuzye bantu mulumbe wakwe. Mulumbe ooyu ulaamakani aatondeezya mbutukonzya kulongezegwa aaLeza na? Iiyi, ulatondeezya. Atubone nzitukonzya kwiiya kuzwa kumapolofita batatu.
ABRAHAMU
Leza tasaluuli pe alubo uyanda kulongezya bantu boonse.
Leza wakasyomezya mupolofita Abrahamu kuti, “mikwasyi yoonse yaanyika iyoolongezyegwa kwiinda mulinduwe.”—Matalikilo 12:3.
Twiiyaanzi? Leza ulatuyanda alubo uyanda kulongezya bantu boonse bamuswiilila baswaanizya baalumi, banakazi abana.
MOZESI
Leza ulaaluzyalo alubo ulabalongezya aabo bali aachiyandisyo chakumuziba.
Singuzuzyoonse wakapa mupolofita Mozesi manguzu aakuti achite zigambyo. Mozesi wakakomba kati: “Kondizyibya nzila zyako, kutegwa ndikuzyibe akuzumanana kufwidwa luzyalo mumeso aako.” (Kulonga 33:13) Nzyaakakumbila Mozesi zyakamubotezya Leza alubo wakamulongezya akumupa luzibo lwiingi lwakuti amvwisisisye nzila zyakwe abuntu bwakwe. Muchikozyano, Mozesi wakabona kuti Mulengi wesu ‘Leza ngusiluse akuti ngusilweetelelo.’—Kulonga 34:6, 7.
Twiiyaanzi? Leza uyanda kulongezya bantu boonse bali aachiyandisyo chakumuziba baswaanizya baalumi, banakazi abana. MuMagwalo Aasalala, Leza wakatondeezya nzila njayanda kuti tumukombaayo alubo utubikkila maanu kwiinda munzila njatujataayo.
JESU
Jesu wakasilika malwazi woonse
Leza ulatulongezya kuti twayiya atala aJesu, nzyaakali kuchita anzyaakali kuyiisya.
MuJwi lyaLeza mujanika zintu zyakachitika mubuumi bwaJesu anzyakayiisya. Leza wakapa Jesu manguzu aakuti achite zigambyo zili mbuli kupa kuti boofu babone, kusinkula matwi aabasinke matwi akuponia bantu balemene. Wakabusya bantu bafwide. Nzyaakachita Jesu zitondeezya zilongezyo nzibayoojana bantu muchiindi chilikunembo. Alubo wakaamba zintu zyeelede kuchitwa aawumwi awumwi wesu kuti akajane zilongezyo eezyo, wakati: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.”—Johane 17:3.
Jesu wakali aalweetelelo aluzyalo. Baalumi, banakazi, baniini abapati bakali kwiinka kulinguwe nkaambo wakababuzya majwi aakuti: “Mwiiye kulindime, nkaambo ndili mubombe moyo, alimwi ndilalicesya, eelyo mulakatalusyigwa.” (Matayo 11:29) Jesu wakalisiyene abantu bakapona muchiindi chakwe nkaambo wakali kubafwida luzyalo bantu bachanakazi alubo wakali kubalemeka.
Twiiyaanzi? Jesu wakali kubayanda bantu alubo wakatusiila chikozyano chilikabotu chakuti tuyande bamwi.
JESU TEELEZA PE
Magwalo Aasalala ayiisya kuti, “kuli buyo Leza omwe” alubo Jesu Kristu ngusikwaambuulila Leza. (1 Bakorinto 8:6) Jesu lwakwe wakaamba chaantanganana kuti Leza ulisumpukide kwiinda nguwe alubo wakaamba kuti wakatumwa aaLeza aanyika.—Johane 11:41, 42; 14:28. *
^ par 17 Kuti uyiye zyiingi atala aJesu Kristu, langa chiiyo 8 a9 mukabbuku kategwa Real Faith—Your Key to a Happy Life kajanika awebbusayiti iitegwa www.ps8318.com.
