‘MULIMU wakutebula mupati, pesi basimilimu mbache nkaako amukombelezye Mwaami wakutebula, kuti atume basimilimu mukutebula kwakwe.’ (Lk. 10:2) Majwi aaya akaambwa aJesu muminyaka iili 2 000 yakiinda, atondeezya zilikuchitika kuMyanmar mazubaano. Nkamboonzi? Nkaambo muchisi eechi kulibasikupupulula basika ku4 200 luzutu balikukambawuka makani mabotu kubantu basika kumamiliyoni aali 55.

Jehova ‘Mwaami wakutebula’ wakajula myoyo yabakwesu abachizi bazwa muzisi zisiyene-siyene, nkinkaako bakalipeda amoyo woonse kuti bazoogwasilizye mumulimu wakutebula mubukombi muchisi chili kuSoutheast Asia. Niinzi chakapa kuti basiye nkubakazwa? Niinzi chakabagwasya kuti bakonzye kwiinka kubusena oobu? Nziizili zilongezyo nzibakajana? Atumvwe nzibaamba.

Muminyaka yayinda, umwi payona wakuJapan utegwa Kazuhiro, wakaba abulwazi bwakalikupa kuti amane manguzu mpawo wakatolwa kuchibbaddela. dokotela wakamubuzya kuti atanoodilayivi moota kwaminyaka iibili. Kazuhiro wakayoowa. Wakalibuzya kuti, ‘Ndizookonzya na kuchita mulimu wakupayona ngundiyandisya?’ Wakakomba kuli Jehova kakumbila kuti amugwasye kuzumanana kupayona.

Kazuhiro wakati: “Umwi mweenzuma uukkala kuMyanmar wakamvwa atala achiimo changu. Wakandifoonena akundibuzya kuti: ‘KuMyanmar bantu bagada mabbasi. Kuti waza ookuno, uzookonzya kupayona kutabelesyi moota!’ Ndakaambuula adokotela wangu kandimubuzya kuti chiimo changu chilandizumizya na kuti ndiinke kuMyanmar. Ndakagamba dokotela naakati: ‘Kuli umwi dokotela uuzwa kuMyanmar ulanga-langa zyabongo, weelede kusika kuJapan lino-lino. Ndizoomubuzya atala anduwe. Kuti waakuchiswa lubo, dokotela ooyo uyookugwasya.’ Nzyaakandibuzya dokotela wangu, ndakabona kuti ninsandulo iizwa kuli Jehova.”

Kuzwa waawo, mukwesu Kazuhiro wakalemba lugwalo kumutabi wakuMyanmar lutondeezya chiyandisyo nchakalaacho amukayintu wakwe chakuyoobeleka kabali mapayona kuchisi eechi. Nikwakiinda mazuba aali 5, bamutabi wakuMyanmar bakamusandula kuti, “Amusike, kuyandikana mapayona biingi!” Mukwesu Kazuhiro amukayintu wakwe Mari bakawuzya moota zyabo zibili mpawo bakawula maviza amatikiti andeke. Lino balikunjila akabunga kasign-language kuMandalay. Kazuhiro wakati: “Kwiinda muzintu eezi nzitwakalibonena, lusyomo lwesu lwasimisigwa achisyomezyo chaLeza chijanika muli Intembauzyo 37:5 iiti:  ‘Leka inzila yako mumaanza aa-Jehova; komusyoma, nkabela uyoocita.’”

Mumunyaka wa2014, Bakamboni baJehova kuMyanmar bakali achilongezyo chakuba amuswaangano wabbooma wanyika zyoonse uuyandikana. Kumuswaangano ooyu, kwakali bakwesu abachizi bazwa kuli zimwi zisi. Umwi wabo muchizi uutegwa Monique uuli aminyaka iisika kuma30 uukkala kuUnited States, wakati: “Nitwakabweeda kulindiswe, ndakakomba kuli Jehova kandikumbila kuti andigwasye kuti ndichite chimwi chintu chiyandikana mubuumi. Kuzwa waawo, ndakabuzya bazyali bangu atala anzindakali kuyanda kuchita mubukombi. Bakandizumizya kuti ndibweede kuMyanmar alubo twakali kukomba kwaziindi zyiingi pesi kwakatola chiindi chilamfu kuti ndikonzye kubweeda.” Monique wakapandulula kuti nkamboonzi nizyakatola chiindi chilamfu.

Monique wakati: “Jesu wakasungwaazya batobeli bakwe kuti ‘babale mali.’ Nkinkaako, ndakalibuzya kuti: ‘Ndizookonzya na kulongela kuchisi eechi? Ndiyoowujana na mulimu uuyoondigwasya kuti ndijane ziyandikana mubuumi kanditabeleki chiindi chiingi?’” Wakazumina kuti: “Teendakali aayo pe mali yakuti ndilongele kuchisi eechi.” Pesi wakakonzya biyeni kwiinka?—Lk. 14:28.

Monique wakati: “Bumwi buzuba muntu ngundibelekela wakandiita kayanda kundibona. Ndakayoowa nkaambo ndakali kuyeeya kuti ulandibuzya kuti mulimu wamana. Pesi ndakagamba nkaambo wakandilumba akundibuzya kuti ndakali kubeleka kabotu. Mpawo wakandibuzya kuti uyanda kundipa mali yabbonasi alubo mali eeli njiyo yakali kuyandikana kuti ndilibambile zintu zyoonse!”

Monique wakasaanguna kupayona kuMyanmar muDecember 2014. Monique umvwa biyeni atala akubelekela kubusena buyanda basikugwasilizya? Wakati: “Kulandibotezya kubelekela ookuno. Ndili azyiiyo zyaBbayibbele zitatu. Umwi uli aminyaka iili 67. Chiindi nandijuzya, ulamwemwetela akundikumbata. Yakamweenda misozi naakayiya kuti zina lyaLeza nguJehova. Mukayintu ooyu wakati: ‘Nkakusaanguna kumvwa zina lyaLeza lyakuti Jehova. Ulimuniini loko kulindime pesi wandiyiisya chintu chipati loko nchindatazi pe.’ Ndakabula zyakwaamba alubo eezi zyakapa kuti andime misozi yeende. Kujana bantu bali boobo, kupa kuti kubelekela kubusena buyanda basikugwasilizya kunoneezye.” Lino-lino, Monique wakajana chilongezyo chakunjila Chikolo chaBakambawusi baBwaami.

Chimwi chintu chakapa kuti basikupupulula bayinke kuMyanmar makani aakapupululwa muYearbook of Jehovah’s Witnesses aali atala achisi eechi. Muchizi uutegwa Li uuli aminyaka yiinda ku30 ukkala kuSoutheast Asia. Muchizi ooyu wakali kubeleka mulimu wakunyama pesi makani aakazwa muYearbook akapa kuti ayande kuyoobelekela kuMyanmar. Nindakanjila muswaangano wazisi zyoonse kuYangon, ndakabonana awumwi mukwesu amukayintu wakwe bakali kubelekela kubusena buyanda basikugwasilizya mumulaka wachiChina kuMyanmar. Mbukunga chiChina ndakalichizi, ndakasala kuyoogwasilizya kabunga kachiChina kuMyanmar. Twakabamba aMonique, mpawo twakaya kuMandalay. Jehova wakatulongezya nkaambo twakajana mulimu uubelekwa mazuba mache kuchikolo chimwi ang’anda iili afwiifwi achikolo eecho. Kulandibotezya kubelekela ookuno nikuba kuti kulapya akuti zimwi zintu nzindiyanda tandizijani pe. Bantu bakuMyanmar bapona buumi buuba pesi balalibombya akuswiilila makani mabotu. Kulabotezya kubona Jehova mbalikupa kuti mulimu wakwe uzwidilile chakufwambaana. Zili antanganana kuti nkuyanda kwaJehova kupede kuti ndizoobelekele ookuno kuMandalay.

Basikupupulula biingi babeleka kumasena ayanda basikugwasilizya bakabona Jehova mbasandula nkombyo zyabo. Atubone zyakachitika kuli Jumpei uuli aminyaka iili 37 amukayintu wakwe Nao uuli aminyaka iili 35. Bakali kunjila ambungano yasign-language kuJapan. Niinzi chakapa kuti balongele kuMyanmar? Jumpei wakati: “Ime amukayintu wangu twakali achiyandisyo chakuyoobelekela kubusena buyanda basikupupulula kuli chimwi chisi. Mukwesu ngutwakalikunjilaamwi mumbungano yasign-language kuJapan wakalongela kuMyanmar. MuMay 2010 andiswe twakalongela kuMyanmar, nikuba kuti twakali amali nche. Bakwesu abachizi bakuMyanmar bakatutambula kabotu!” Mukwesu ooyu ulimvwa biyeni kuba mumbungano yasign-language kuMyanmar? Wakati: “Bantu bali achiyandisyo. Bantu bataambuuli ngabagamba nitubatondeezya mavidiyo asign-language. Tulabotelwa kuti twakasala kubelekela Jehova katuli ookuno!”

Jumpei aNao bakayijana biyeni mali njibakali kubelesya? Bakati: “Nikwakiinda minyaka iitatu, twakali twiibelesya mali njitwakalaayo alubo teetwakachilikwe yakubbdala lenti mumunyaka uutobela. Makani aaya twakali kwaakombela chiindi chiingi. Katulyiibide, twakatambula lugwalo luzwa kumutabi lwakali kututamba kuti tubeleke katuli mapayona ayandikana kwachiindi chifwiifwi. Twakasyoma muli Jehova alubo twakabona kuti taakatulekelezya pe. Ulatupa zintu zyoonse ziyandikana.” Minyaka miche yakiinda, Jumpei aNao bakanjila Chikolo chaBakambawusi baBwaami.

Niinzi chakagwasya Simone wakuItaly uuli aminyaka iili 43 amukayintu wakwe Anna uuzwa kuNew Zealand uuli aminyaka iili 37 kuti balongele kuMyanmar? Anna wakati: “Makani alaatala aMyanmar aakazwa muYearbook yamu2013!” Simone wakati: “Nchilongezyo chipati kubelekela Myanmar. Ookuno tupona buumi buuba alubo ndijana chiindi chiingi chakubelekela Jehova. Kulabotezya kubona Jehova mbatugwasya akaambo kakubelekela kubusena buyanda basikugwasilizya.” (Int. 121:5) Anna wakati: “Ndilikubotelwa loko kwiinda chiindi. Tupona buumi buuba. Lino ndakajana chiindi chiingi chakubelekelaamwi amulumaangu alubo eezi zipa kuti lukwatano lwesu lusime. Alubo twakaba aabamwi beenzuma. Bantu balabatambula Bakamboni alubo bali achiyandisyo chakumvwa makani mabotu!” Nkamboonzi Anna nakaamba oobo?

Anna wakati: “Limwi zuba ndakakambawukila umwi musimbi uuli kuyunivesiti kumusika mpawo ndakachita mabambe akuti ndizoobwede lubo. Nindakabweeda, ndakajana watamba mweenzinyina. Nindakabweeda lubo, ndakajana wakatamba bamwi. Muchiindi chakatobela, wakali watamba bamwi lubo. Lino ndiiyaabo Bbayibbele kabali 5.” Simone wakati: “Bantu bakokuno balasangalizya alubo bali achiyandisyo. Tatuchijani pe chiindi chakukambawukila bantu boonse bali achiyandisyo.”

 Pesi nziizili zimwi zintu bamwi nzibakachita kuti bakabelekele kuMyanmar? Muchizi uutegwa Mizuho wakuJapan wakati: “Ime amulumaangu Sachio twakali achiyandisyo chakuyoobelekela kubusena buyanda basikupupulula kuli chimwi chisi pesi teetwakazi pe kuti nkuukuli. Zyakachitikila bamwi nzitwakabala muYearbook yamu2013 yakali kwaambuula atala aMyanmar, zyakatusika aamoyo zyakuti twakasaanguna kuyeeya kuti tukabelekele nkuko.” Sachio wakayungizya kati: “Twakasala kuti tukaswaye dolopo pati lyakuMyanmar litegwa Yangon kwamviki iimwi, kuti tukalange-lange mbukubede. Nzitwakabona, zyakapa kuti tusale kuyoobelekela nkuko.”

Rodney amukayintu wakwe, Jane, bali aminyaka yiinda ku50, bazwa kuAustralia abana babo babili Jordan aDanica, mbaasikupupulula balikubelekela kuMyanmar kuzwa mumunyaka wa2010. Rodney wakati: “Twakasungwaazigwa anzala yakasimpe bantu njibakalaayo. Ndisungwaazya zimwi mpuli kuti zikabelekele kumasena aali mbuuli kuMyanmar.” Nkamboonzi nakaamba oobo? Wakati: “Kubelekela ookuno kwapa kuti toonse mumpuli tujatane! Bachikula biingi bayandisya mafooni, moota, milimu azimwi. Pesi, bana besu balikwiiya mabala mapya kuti bakonzye kukambawukila bantu. Baleezya kukambawukila bantu batazi Bbayibbele, kusandula kumiswaangano yambungano alubo bachita zintu zyiingi zyabukombi.”

Mukwesu Oliver uuli aminyaka iili 37, uuzwa kuUnited States, wakapandulula kaambo nayanda kubelekela kubusena buyanda basikugwasilizya. Wakati: “Kubelekela kubusena nkunditazibide, kwapa kuti ndijane zilongezyo zyiingi. Kubelekela kubusena buli kule akung’anda kwapa kuti ndisyome Jehova chiindi choonse. Kubelekaamwi abakwesu mbindakatazi pesi basyoma nzindisyoma, kwandigwasya kubona kuti Bwaami bwaLeza mbubo abulikke bukonzya kupa kuti bantu bajatane.” Oliver amukayintu wakwe Anna, balikubelekela mumbungano yachiChina.

Muchizi Trazel, uuli aminyaka iili 52, uuzwa kuAustralia, wakasaanguna kubelekela kuMyanmar mu2004. Wakati: “Kuti zyiimo zyako kazikuzumizya, ulakonzya kubelekela kubusena buyanda basikugwasilizya. Ndakalibonena kuti Jehova ulakulongezya kuti waba achiyandisyo chakumubelekela. Taakwe nindakali kuyeeyela pe kuti ndizoopona buumi buli boobo. Ndilikupona buumi buli ampindu, mbundakatali kuyeeyela pe.”

Tusyoma kuti majwi aaya akaambwa abasikupupulula balikubelekela kubusena buyanda basikugwasilizya kuMyanmar ayookusungwaazya kuti ukambawukile kumasena atanakambawukwa. Bakwesu abachizi bali kubelekela kuchisi eechi baamba kuti: “Tukumbila kuti muzubukile kuMyanmar muzootugwasye!”