Mbuli mbutuli kubona kunkondo iilikuchitika ku-Ukraine bapati bazikombelo bali kusungilizya bantu kuti baswaanizye munkondo eeyi. Bona bapati bazikombelo mbubali kuliswaanizya mumabazu woonse:

•   Metropolitan Epiphanius I of Kyiv wakaamba kuti: “Bulemu akulumba tuzipa ndinywe nimasooja moonse akaambo kakuvuna bantu bamu-Ukraine kuli basikutulwana . . . Myoyo yesu ankombyo zyesu zizwa aansi aamoyo zili aafwiifwi loko aandinywe.”—The Jerusalem Post, March 16, 2022.

•   “Mupati waCheechi yaOrthodox kuRussia wakachita muswaangano uyandikana loko amasooja akuRussia muNsondo kali kubasungwaazya kuti bayinkilile kunembo kulwanina nyika yabo nkaambo balupati-pati bachiyanda kuti nkondo yaku-Ukraine yiinkilile kunembo.”—Reuters, April 3, 2022.

 MaKkristu beelede kuliswaanizya na munkondo? Bbayibbili lityeni?

 Bbayibbili litondeezya kuti batobeli baJesu Kkristu bachoonzyo tabaliswaanizyi pe muli zyankondo.

•   “Bweedezya panga lyako aandawu yalyo, nkaambo muntu woonse uubelesya panga, uzoojayigwa aapanga.”—Mateyo 26:52.

   Muntu uuliswaanizya mulizyankondo naakuti uuyinka kuyoolwana nkondo nga ulikwaaswiilila na majwi aJesu?

•   “Ndilikumupa mulawu mupya wakuti muyandane. Mbuli mbundakamuyanda, andinywe amuyandane. Bantu boonse bazooziba kuti muli basikwiiya bangu, kuti kamuli aaluyando aakati kanu.”—Johane 13:34, 35.

   Muntu uuliswaanizya mulizyankondo nga ulikulutondeezya na luyando Jesu ndwakaamba kuti ndululozibya bantu kuti aba mbasikwiya naakuti batobeli bakwe?

 Kuti uzibe zyiingi bala chiiyo chitii “Is War Compatible With Christianity?”

 Zili aamutwe na kulangilila kuti maKkristu bataliswaanizyi pe muli zyankondo mazubaano? Iiyi. Bbayibbili lyakaamba kuti chiindi eechino “kumazuba aamamanino” kuzooba bantu bazwa muzisi zyoonse batazooyiiyi “limbi nkondo pe,” kweendelana anjiisyo zyaJesu.—Isaya 2:2, 4 majwi aamunsi.

•   Kuti ubone zyiingi bala chiiyo chitii “Ino Leza Ulimvwa Buti Kujatikizya Nkondo?”

 Lino-lino Jehova, a “Leza waluumuno,” uzoobelezya mfulumende yakujulu kuvuna bantu kuzwa “kukudyaamininwa akunkondo.”—Bafilipi 4:9; Intembauzyo 72:14.

•   Kuti ubone kuti uuzoobavuna biyeni, yebela vidiyo itii Bwaami bwaLeza Niinzi?