Bakamboni ba Jehova babelesya nzila iigwasya kapati kuyiisya Bbaibbele. Pulogilamu yesu yakwiiya Bbaibbele ilakonzya kumugwasya:

•   Kupona buumi bukkomanisya

•   Kuba mulongwe wa Leza

•   Kwiiya zisyomezyo zyakumbele izili mu Bbaibbele

Izili apeeji eeyi

•  Ino ciiyo ca Bbaibbele cicitwa buti?

•  Sena ndeelede kubbadela buya kutegwa ndiiye?

•  Ino lwiiyo lutola ciindi cilamfwu buti?

•  Ino ncinzi ncondeelede kucita kutegwa nditalike kwiiya?

•  Sena inga ndasola kwiiya kabeela kasyoonto buyo?

•  Ikuti ndazumina kunooyiya Bbaibbele, sena ndiyoosungilizyigwa kuba umwi wa Bakamboni ba Jehova?

•  Sena ndilakonzya kubelesya Bbaibbele lyangu?

•  Sena ndilakonzya kutamba abambi kutusangana lyaciiyo?

•  Ino mbuti kuti musyule ndakaiya Bbaibbele a Bakamboni ba Jehova? Sena ndilakonzya kwiiya alimwi?

•  Sena inga ndaiya Bbaibbele kakunyina wakundiyiisya?

 Mwiiyi wanu uyoomugwasya kwaazyiba kabotu makani aasiyene-siyene aajanika mu Bbaibbele kwiinda mukwiiya andinywe makani amwi aamwi aagaminide. Kwiinda mukubelesya bbuku lyakuti Amupone Kukabe Kutamani!—Lwiiyo Lwamu Bbaibbele! muyakwiiya asyoonto-syoonto kujatikizya mulumbe uujanika mu Bbaibbele alimwi amboukonzya kumugwasya. Kutegwa mwiiye zinji, amweebelele kavidiyo aaka.

 Peepe. Tutobela busolozi Jesu mbwaakapa basikwiiya bakwe bwakuti: “Mwakapegwa kakunyina kubbadelesyegwa, amupe kakunyina kubbadelesya.” (Matayo 10:8) Bamayi besu tababbadelwi, alimwi tamuyandiki kubbadela kutegwa mupegwe Bbaibbele naa bbuku lya Amupone Kukabe Kutamani!

 Bbuku lyoonse lijisi ziiyo izili 60. Mulakonzya kusala bulamfwu bwaciindi ncomuyanda kunooyiya, pele basikwiiya banji bakkomanina kwiiya ciiyo comwe naa kwiinda waawo ansondo.

1.  1. Amulembe foomu iili aintaneti. Makani ngomuyoolemba aajatikizya ndinywe tuyakwaabelesya buyo kupanga bubambe bwakuti muntu umwi akabandike andinywe kweelana akulomba kwanu.

2.  2. Mwiiyi uyoobandika andinywe. Mwiiyi wanu uyoopandulula zintu nzyomulangila kwiiya mulwiiyo lwamu Bbaibbele alimwi akwiingula mibuzyo iili yoonse njomukonzya kuba anjiyo.

3.  3. Nywebo amwiiyi wanu muyoopangana. Mulakonzya kunooyiya cacigaminina naa kubelesya fooni, video call, kulembelana magwalo, naa email. Kanji-kanji ciiyo inga citola maminiti masyoonto, woola lyomwe naa kwiinda aawo, ciya buyo aciindi ncomujisi.

 Inzya. Ikutegwa mucite oobo, amulembe foomu iili aintaneti. Mpoonya mwiiyi abandika andinywe, amumuzyibye kuti muyanda buyo kusola kwiiya akubona naa inga mwakukkomanina. Uyoobelesya broshuwa yakuti Amupone Kukabe Kutamani! iijisi ziiyo zyantalisyo zyotatwe, kumugwasya kubona naa inga mwakukkomanina kwiiya.

 Peepe. Bakamboni ba Jehova balakkomana kapati kuyiisya bantu Bbaibbele, pele tababasungilizyi kubasangana mubukombi bwabo. Muciindi caboobo, cabulemu tubatondezya buyo ncolyaamba Bbaibbele katuyeeyede kuti muntu umwi aumwi ulijisi nguzu izyakusala kujatikizya ncayoosyoma.—1 Petro 3:15.

 Inzya, mulakonzya kubelesya Bbaibbele lili lyoonse ndyomuyanda. Nokuba kuti tulakkomana kubelesya Bbaibbele lya Busanduluzi bwa Nyika Mpya, akaambo kakuti lisanduludwe munzila iilimvwisya alimwi iiluzi, tulizyi kuti bantu banji bakkomanina kubelesya leelyo ndyobazyibide.

 Inzya. Mulakonzya kutamba bamukwasyi wanu boonse naa balongwe.

 Inzya. Alimwi buya, muyakulukkomanina kapati lwiiyo lupya kwiinda lwakaindi akaambo kakuti lubambidwe kugwasya bantu kweelana anzyobayandika mazuba aano. Kuyungizya waawo, mukwiimpana abubambe bwakaindi, lujisi zifwanikiso zinji amavidiyo alimwi lukulwaizya kubandika.

 Inzya. Nokuba kuti basikwiiya banji balagwasyigwa kapati kwiinda mukuyiisyigwa amwiiyi, ibamwi balombozya kusaanguna kuliyiisya. Peeji yesu ya Zibelesyo Izigwasya Kwiiya Bbaibbele lijisi mulongo wazibelesyo zitabbadelesyegwi zikonzya kumugwasya nomwiiya Bbaibbele. Nzeezi zibelesyo zikonzya kumugwasya:

•   Mavidiyo Aamu Bbaibbele. Mavidiyo mafwaafwi aaya apandulula njiisyo ziyandika kapati zyamu Bbaibbele.

•   Mibuzyo Yamu Bbaibbele Yaingulwa. Zibalo eezyi zilapa bwiinguzi bwamibuzyo minji iisiyene-siyene yamu Bbaibbele.

•   Tupango Twamu Bbaibbele Twapandululwa. Amubone bupanduluzi bwatupango atwaambo tumwi twamu Bbaibbele ituzyibidwe kapati.