Mubusena bwiitwa kuti Amazon ku South America, kuli bantu bamisyobo iindene-indene, myaambo alimwi azisi. Aboobo, mu July 2017, kakamu ka Bakamboni ba Jehova ibali 13 bakanyamuka kuti bakaswaye ku Mulonga wa Maroni alimwi atulonga tutila mumulonga ooyu ituli kujwe ku French Guiana. Ino bakajisi makanze nzi? Kutola mulumbe wamu Bbaibbele uupa bulangizi kubantu bakkala mumbali aamulonga ooyu.

 Kakucili mwezi omwe kuti lweendo oolu lwamazuba aali 12 lutalike, basilweendo boonse bakajanika kumuswaangano wakulibambila. Ba Winsley bakaamba kuti: “Twakaiya makani aajatikizya busena oobu alimwi ambotwakeelede kulibambila lweendo oolu.” Umwi aumwi wakapegwa mwakubikkila kalo alimwi a mosquito net. Mulweendo oolu kwakali kutanta ndeke ziindi zyobilo alimwi akweendela mutubwato kwamawoola manji.

 Ino mbuti mbobakalimvwa aabo ibakatambwa mulweendo oolu? Ba Claude aba Lisette ibakacitide litaya kumulimo tiibakawayawaya kucibweza coolwe eeci. Ba Claude bakaamba kuti: “Ndakakkomana kapati, pele akuyoowa asyoonto. Ndakamvwide makani manji kujatikizya mbowakali kuyoosya mulonga ooyu.” Ba Lissete abalo kuli nzyobakali kulibilika bakati: “Ndakali kuyeeya mwaambo ngotwakali kuyoobelesya kubantu aaba.”

 Abalo ba Mickaël mbobakali kulimvwa oobo. Bakaamba kuti: “Tiitwakazyi zinji kujatikizya Ciwayana, aboobo ndakavwuntauzya aintaneti kutegwa ndizyibe mabala masyoonto alimwi ambobaanzya mumwaambo wabo.

 Ba Shirley balo ibakaunka abalumi babo ba Johann, bakalemba mulongo wamyaambo yaambaulwa kubusena ooko. Bakaamba kuti: “Twakadauniloda mavidiyo a jw.org aamumyaambo eeyo abbuku lijisi mabala aamuci Wayana.”

 Muli Bwabili, mu July 4, kakamu aaka kakatanta ndeke ku Saint-Laurent du Maroni akuunka ku Maripasoula dolopo limwi lisyoonto mu French Guiana.

 Mumazuba one aakatobela, kakamu aaka kakaswaya bantu bamuminzi, mulonga wa Maroni nkouli kumulundu, kubelesya tubwato tujisi injini twiitwa kuti pirogues. Ba Roland bakaamba kuti: “Twakajana kuti bantu aaba balaikkomanina mibandi yamu Magwalo. Bakajisi mibuzyo minji, alimwi bamwi bakali kuyanda kwiiya Bbaibbele.”

 Mumunzi umwi, ba Johann aba Shirley bakajana banabukwetene bana-bana ibakajisi mubbululu iwakalijaya alimwi kwakaindide buyo mazuba masyoonto. Ba Johann bakati: “Twakabatondezya vidiyo yakuti A Native American Finds His Creator a JW Broadcasting. Banabukwetene aaba yakabakkomanisya kapati vidiyo eeyi. Bakatupa e-mail adilesi nkaambo bakali kuyanda kuti katubandika ambabo.”

 Busena buli kulamfwu kapati nkobakasika, mulonga nkouli kumulundu, kwakali ku Antécume Pata. Okuya, mwami wamunzi wakabazumizya Bakamboni ibakakatede, kuti boone mumunzi. Alimwi bakasamba kumulonga mbubwenya mbuli basimunzi.

 Kuzwa kokuya, kakamu aaka kakaunka kumunzi wa Twenké, kwalo nkobakajana dilwe. Ba Eric umwi wabasilweendo bakaamba kuti: “Basibbuku bakatuzumizya kweendeenda mumunzi kutegwa tuumbulizye baabo ibakali mubuumba. Basibbuku amukwasyi wabo bakakkomanina magwalo akaambo kakuti twakali kubelesya Bbaibbele lyaci Wayana. Kunze lyaboobo twakabatondezya mavidiyo aatondezya cisyomezyo camu Bbaibbele cabubuke.”

 Busena bwakatobela kuswaya lyakali dolopo syoonto lya Grand-Santi mulonga nkouli kunselelo, alimwi lwakali lweendo lwamaminiti aali 30 mundeke kuzwa ku Maripasoula. Muli Bwabili a Bwatatu, basilweendo bakakambauka mulumbe wamu Bbaibbele kubantu bakubusena oobo. Muli Bwane, Bakamboni aaba bakapanga lumbi lweendo lutola mawoola osanwe acisela kutozya kunselelo aa Mulonga wa Maroni kumunzi wa Apatou.

 Kakusyeede buzuba bomwe kuti lweendo lumane, kakamu kakaswaya minzi ya Maroon, ikukkede mazyalani aabazike baku Africa ibakatolwa ku South America ciindi cabuzike afwaafwi a Suriname. Bakamboni bakatamba bantu boonse kumuswaangano mutente lipati ilyakabikkidwe kucitila muswaangano ooyu. Ba Claude bakaamba kuti: “Twakakkomana kapati kubona bantu banji ibakasika. Twakabatambide kuseeni buzuba oobo!” Ba Karsten mbabakapa makani aabuleya mumwaambo waci Aukan, akajisi mutwe wakuti “Sena Buumi Buno Mbobuumi Buliko Bolikke?” Bantu ibali 91 bakajanika kuzwa muminzi iindene-indene.

 Lweendo nolwakasika kumamanino, boonse bakapiluka ku Saint-Laurent du Maroni. Basilweendo aaba bakakkomana kapati kubona luyandisisyo ndobakatondezya bantu balo ibakatambula mabbuku manji akweebelela mavidiyo manji aakamwaigwa a Bakamboni ba Jehova.

 Ba Lisette bakaamba kuti: “Tandijisi majwi aakupandulula mbondakakkomana mulweendo oolu.” Ba Cindy abalo bakati: “Ikuti coolwe eeci cikaboole alimwi, ndiyooliwaalila. Kayi bakati syaankalibonene kuluudwa cilakatazya!”

 Basilweendo bamwi bakakulwaizyigwa kupilukila alimwi. Ba Mickaël bakati: “Tulilibambilide kuunka alimwi!” Ba Winsley bakalongela ku Saint-Laurent du Maroni. Ba Claude aba Lisette, boonse bobilo ibajisi myaka yakuma 60, bakalongela ku Apatou.