Bumwi buzuba ba Eliso nobakali kusololela ciiyo ca Bbaibbele kumukaintu umwi iwakajisi luyandisisyo, kwakaboola beenzu bakaswaya mukaintu ooyu. Wakali musololi wacikombelo abakaintu bakwe. Ba Eliso bakalizyi kuti banabukwetene aaba bakafwidwa mwanaabo musankwa caino-ino.

 Ciindi ba Eliso nobakabaanzya kujatikizya malila, musololi wacikombelo ooyu abakaintu bakwe bakalila citaambiki. Mpoonya cabukali, musololi wacikombelo wakati: “Tandimvwisyi kaambo Leza ncaakazumizya sunko lili boobu! Nkaambo nzi ncaakamubwezela mwanaangu musankwa alikke? Ndali kumubelekela Leza kwamyaka iili 28, lino amubone ncaandicitila! Nkaambo nzi Leza ncakaajaila mwanaangu?”

 Ba Eliso bakabapandulwida banabukwetene aaba kuti Leza tanaakamubweza mwanaabo. Kuyungizya waawo, bakabandika makani aajatikizya cinunuzyo, bubuke, akaambo Leza ncalekela zintu zibyaabi kucitika. Kumane musololi wacikombelo abakaintu bakwe bakaambila ba Eliso kuti bakabapa bwiinguzi mbobakali kupailila.

 Mvwiki yakatobela, musololi wacikombelo abakaintu bakwe bakabasangana aciiyo ca Bbaibbele bakaintu aabaya bakali aaluyandisisyo. Bakali kwiiya cibalo cakuti, “Bulangizi Bwini-Bwini Kubayandwa Benu Bafwide,” mubbuku lya Ino Ncinzi Cini Bbaibbele Ncoliyiisya? Banabukwetene aaba bakatola lubazu mumubandi calukkomano.

 Kumane boonse bakajanika kumuswaangano waalubazu wa Bakamboni ba Jehova ku Tbilisi, Georgia, alimwi bakakkomana aluyando alimwi alukamantano ndobakabona—ibube mbobakasola kwaciindi cilamfwu kuyiisya bacikombelonyina pele bakaalilwa.