Bakamboni ba Jehova ku Bulgaria baluujisi kuyiisya bamwi kasimpe kajatikizya Leza alimwi a Jwi lyakwe, Bbaibbele. Kutegwa babagwasye, Bakamboni banji kuzwa mumwaka wa 2000 bali kulongela kucisi eeci. Ino mbuyumuyumu nzi buliko bwakuyookambaukila kucisi cimbi? Sena kuli mbocigwasya? Amumvwe nzyobakaamba aabo ibakalongela ku Bulgaria.

 Ba Darren ibakkala ku England bakaamba kuti: “Lyoonse twakajisi mbaakani yakuyoobelekela kubusena bubulide kucisi cimbi. Notwakakwatana aba Dawn, twakalongela ku London kuyoogwasyilizya kuyiisya Bbaibbele mumwaambo waci Russian. Tiilyakalampa, twakaba amakanze aagaminide aakulongela kucisi cimbi, pele akaambo katwaambo tumwi tiitwakacikonzya kucita oobo. Twakali kuyeeya kuti inga tiitwacikonzya kuunka, pele mulongwe umwi wakatugwasya kubona kuti bukkale bwesu bwakalicincide akuti cakali kukonzyeka.” Ba Darren abakaintu babo ba Dawn bakatalika kuyandaula cisi kwakabulide bamayi ba Bbaibbele alimwi buumi nkobwakali buuba-uba. Aboobo, mu 2011, bakalongela ku Bulgaria.

 Cikozyanyo cibotu cabaabo ibakalongela kuzisi zimbi cakabakulwaizya aabo kumatalikilo ibatakajisi mbaakani yakubelekela kunze aacisi. Ba Giada, ibakkala ku Italy abalumi babo ba Luca, bakaamba kuti: “Ndakaswaanganya Bakamboni ibasungu alimwi bakkomene ibakali kubelekela ku South America a Africa. Ndakakulwaizyigwa kapati alukkomano ndobajisi alimwi azyakuluula zyabo nzyobakaamba. Eeci cakandigwasya kucinca mbaakani zyangu mumulimo wa Jehova.”

 Ba Tomasz aba Veronika ibaku Czech Republic bakalongela ku Bulgaria mu 2015, antoomwe abana babo bobilo, Klara a Mathias. Ino ncinzi cakabakulwaizya kulonga? Ba Tomasz bakaamba kuti: “Twakabona cikozyanyo cabamwi bakalonga kuzwa mucisi cabo, kubikkilizya abacibbululu babo, mpoonya twakazinzibala kuyeeya zyakuluula zyabo zimwi. Twakakulwaizyigwa kapati alukkomano ndobakajana, aboobo twakabandika abanamukwasyi.” Banamukwasyi aaba ibakkomene, lino bakambaukila mucilawo cipya mudolopo lya Montana ku Bulgaria.

 Ba Linda mbamwi ba Bakamboni ibakalongela ku Bulgaria. Bakaamba kuti: “Myaka minji yainda ndakaswaide ku Ecuador alimwi ndakayaanya bamwi ibakalongela nkuko kuyookambauka. Eeci cakandipa kutalika kuyeeya kuti andime inga ndaakubelekela kubusena bubulide.” Ba Petteri alimwi aba Nadja, banabukwetene baku Finland, abalo bakazinzibala kuyeeya cikozyanyo cabamwi. Bakaamba kuti: “Kumbungano yakucisi nkotuzwa, twakajisi basikumwaya bacibwene ibakalongela mumasena aamwi kugwasya bantu kwiiya Bbaibbele. Lyoonse bakali kwaamba bubotu mbobakajana bwakucita mulimo ooyu. Bakayungizya kwaamba kuti myaka iilya yakali myaka iinda kubota mubuumi bwabo.”

 Kulibambilila limwi kulayandika kapati kuli baabo ibayanda kuyoobelekela kucisi cimbi. (Luka 14:28-30) Ba Nele baku Belgium, bakaamba kuti: “Nondakaba amakanze aakubelekela kucisi cimbi, ndakapaila akuyandaula zibalo mumabbuku eesu zyaamba kujatikizya kubelekela kucisi cimbi. Ndakazibala akubona ncondakali kuyandika kucita kutegwa ndilibambile kulonga.”

 Ba Kristian aba Irmina, baku Poland, bakakkala ku Bulgaria kwamyaka iinda ku 9. Bakabona mbocakabagwasya kubelekela mukabunga kakali kubelesya ci Bulgarian ku Poland kabatanalonga. Bantu bamukabunga bakabakulwaizya alimwi akubagwasya kwiiya mwaambo. Banabukwetene aaba bakaamba kuti: “Twakabona kuti, ikuti twalyaaba, Jehova ulatujanina nzyotuyandika kumubili, alimwi eeci cilakkomanisya. Ciindi nomumwaambila cakulyaaba Jehova kuti, ‘Ndime aano! Kondituma!’ mulakonzya kucita zintu nzyomwatali kuyeeyela.”—Isaya 6:8.

 Kutegwa balibambile alimwi akuyobola mali, ba Reto aba Cornelia, banabukwetene baku Switzerland, bakasala kuubya-ubya buumi bwabo. Bakaamba kuti: “Kakusyeede mwaka omwe kuti tulonge, twakaswaya ku Bulgaria nsondo yomwe kutegwa tubone buumi mbobwakabede mucisi eeci. Ookuya twakabandika abamisyinali bajisi luzyibo balo ibakatwaambila ncotwakeelede kucita.” Banabukwetene aaba bakaibelesya mizeezo njobakapegwa alimwi lino babeleka ku Bulgaria kwamyaka iinda ku 20.

 Aabo balongela kucisi cimbi beelede kucinca buumi bwabo kweelana abukkale bwakucisi eeco. (Milimo 16:9, 10; 1 Bakorinto 9:19-23) Buyumuyumu mbobajana banji nkwiiya mwaambo mupya. Ba Luca ibaambwa kale bakaamba kuti: “Lyoonse twakali kukukkomanina kupa bwiinguzi mumajwi eesu lyamiswaangano ya Bunakristo. Pele, notwakasika ku Bulgaria cakali ciyumu kulibambila bwiinguzi nobuba buuba-uba! Cakali mbuli kuti twajokela kubwana. Alimwi buya, bana balaayo mwaambo bakali kutwiinda kwiingula.”

 Ba Ravil, baku Germany, bakaamba kuti: “Kwiiya mwaambo tiicakali cuuba-uba. Pele ndakali kulyaambila kuti, ‘utaciindizyi kulibilika.’ Tiindakali kububikkila maano buyumuyumu, pele ndakali kububona kuba cibeela camulimo wangu uusetekene kuli Jehova.”

 Ba Linda, ibaambidwe kale bakaamba kuti: “Cilandiyumina kwiiya myaambo. Ci Bulgarian tacili cuuba kwiiya alimwi kanji-kanji inga ndiyanda kucileka buyo. Inga mwalimvwa kulendelelwa ikuti kamutakonzyi kubandika alimwi akumvwa nzyobaamba bamwi. Aboobo kutegwa ndiyumye cilongwe cangu a Jehova, ndakali kulisanina kumuuya muci Swedish. Pele, kwiinda mukugwasyigwa abakwesu abacizyi, ndakacikonzya kuciiya ci Bulgarian.”

 Buyumuyumu bumwi nkuyeeya kuŋanda. Aabo balongela kumbi balabasiya banamukwasyi abalongwe. Ba Eva, ibakalongela ku Bulgaria antoomwe abalumi babo ba Yannis, bakaamba kuti: “Kumatalikilo ndakali kulimvwa kulendelelwa, pele kwiinda mukubandika lyoonse abanamukwasyi abalongwe mbotwakasiya kuŋanda, alimwi akupanga balongwe bapya okuno, candigwasya kuliyumya.”

 Kuli buyumuyumu abumbi. Ba Robert aba Liana, ibakazwa ku Switzerland, bakapandulula kuti: “Mwaambo alimwi azilengwa zyakatubeda zyeenzu, alimwi tiitwakalibambilide kabotu kujatikizya kutontola kuli kokuno ciindi camupeyo.” Nokuba boobo, kuzumanana kuzilanga kabotu zintu alimwi akuba bantu baseka-seka kwabagwasya banabukwetene aaba kuzumanana kubeleka ku Bulgaria cakusyomeka kwamyaka iinda ku 14.

 Ba Lilly balabakulwaizya boonse ibayanda kuyoobelekela kubusena bubulide. Bakaamba kuti: “Ndalibonena Jehova mbwagwasya munzila zinji nzyondatakali kukonzya kubona kucisi nkondizwa. Ndijisi bubi kugwasyilizya bamwi alimwi eeci candigwasya kukomena kumuuya, kukkutila akundipa kuba alukkomano.” Balumi babo ba Ravil, balaazuminizya majwi aaya. Bakaamba kuti: “Oobu mbobuumi bwiinda kubota, alimwi ncoolwe cilibedelede kuzyibana a Banakristo basungu bamumasi aaindene-indene ibajisi luzyibo lunji lwakuyiisya kasimpe kamu Bbaibbele. Ndaiya zinji kulimbabo.”

 Muuya wakulyaaba ngobajisi banji wapa kuti bazwidilile mumulimo wakukambuka “makani mabotu aa Bwami . . . kumasi oonse.” (Matayo 24:14) Kuyungizya waawo, aabo ibakaunka kuyoobelekela ku Bulgaria bakalibonena Jehova mbwaakabapa nzyouyanda moyo wabo akupa kuti makanze aabo azwidilile.—Intembauzyo 20:1-4.