1 Johane 1:1-10
1 Tumulembela kujatikizya ceeco cakaliko kuzwa kumatalikilo, ncotwakamvwa, ncotwakabona ameso eesu, ncotwakalangisya akucijata-jata amaanza eesu, ikujatikizya jwi lyabuumi.+
2 (Inzya, ibuumi bwakayubununwa, mpoonya twakabona alimwi tulapa bumboni+ akumwaambila buumi butamani+ ibwakali a Taata alimwi ibwakayubununwa kulindiswe).
3 Eeco ncotwakabona akumvwa tulamwaambila andinywe+ kutegwa andinywe mukonzye kuyanzana andiswe. Alimwi iluyanzano oolu tulilujisi a Taata alimwi a Mwanaakwe Jesu Kristo.+
4 Aboobo, tulemba zintu eezyi kutegwa kukondwa kwesu kuzulile.
5 Ooyu ngomulumbe ngotwakamvwa kulinguwe alimwi ngotwaambilizya kulindinywe kuti: Leza mumuni+ alimwi mulinguwe kunyina mudima naaceya.
6 Ikuti naa twaamba kuti, “Tuliyanzene anguwe,” pele katuzumanana kweenda mumudima, nkokuti tulabeja alimwi tatuciti kweelana akasimpe pe.+
7 Pele, ikuti naa tweenda mumumuni mbubonya walo mwini mbwali mumumuni, nkokuti tuli aluyanzano akati kesu alimwi bulowa bwa Jesu Mwanaakwe bulatusalazya kuzibi zyoonse.+
8 Ikuti naa twaamba kuti, “Tunyina cibi,” twalyeena lwesu tobeni+ alimwi kasimpe takako pe mulindiswe.
9 Ikuti twalyaambilila zibi zyesu, mbwaanga walo ulasyomeka alimwi uliluleme, ulakonzya kutulekelela zibi zyesu akutusalazya kukutalulama koonse.+
10 Ikuti naa twaamba kuti, “Tatunabuzuba twabisya,” tumupa kuba mubeji, alimwi ijwi lyakwe taliko pe mulindiswe.
