2 Bakorinto 10:1-18
10 Lino mebo lwangu, nde Paulo, ndamulomba mukubomba moyo amuluzyalo lwa Kristo,+ nokuba kuti nondili andinywe akulangana cantongolameso+ ndili muntu waansi, pele nentali andinywe ndili sicamba.+
2 Ndilomba kuti ndanooli andinywe, nditakabi nondiba abusicamba akubweza ntaamu eezyo nzyondikanzide kubweza cabukali kuli bamwi ibatubona mbuli kuti tweenda cabuntu.
3 Nkaambo nokuba kuti tweenda mbuli bantu bamwi, tatulwani nkondo kweelana abuntu bwesu pe.
4 Nkaambo zilwanyo zyankondo njotulwana tazili zyabuntu pe,+ pele nzilwanyo zijisi nguzu kwiinda muli Leza+ kutegwa tumwaye zintu zyoonse ziyumu nta.
5 Nkaambo tulanyonyoona mizeezo iilubide yoonse acintu cili coonse cisumpulwa kuti cikazyanye aluzyibo lwa Leza,+ alimwi tulazunda mizeezo yoonse akwiipa kuti imvwide Kristo;
6 alimwi tulilibambilide kusubula muntu uuli woonse uutamvwidi,+ mbomuyoomanina buyo kutondezya kuti nywebo mulamvwida cakumaninina.
7 Mubona zintu kweelana ambozibede mumeso aanu. Ikuti kakuli muntu uusyoma kuti uzulilwa kuli Kristo, akayeeye kaambo aaka kakuti: Mbubonya walo mbwazulilwa kuli Kristo, andiswe ooko nkotuzulilwa.
8 Nkaambo nokuba kuti ndaindilizya asyoonto kulidunda kujatikizya nguzu nzyaakatupa Mwami kuti tumuyake ikutali kumunyonyoona,+ tandikonzyi kuusyigwa nsoni pe.
9 Nkaambo tandiyandi kuboneka mbuli kuti ndisola kumukonga amagwalo aangu.
10 Nkaambo bamwi baamba kuti: “Magwalo aakwe malemu alimwi alijisi nguzu, pele lwakwe mwini naliko ulibonya kuti muntu-muntu buyo alimwi nzyaamba zilasesemya.”
11 Imuntu ooyo azyibe kuti, mbubonya mbwaabede majwi eesu ngotulemba mumagwalo notutali kooko, mbotuyoocita oobo twanooli kooko.+
12 Nkaambo tatusoli kulibikka akati kabantu bamwi naa kulyeezyanya abantu bamwi balilumbaizya beni.+ Pele bantu aabo nobatobela zyeelelo zyabo beni akulyeezyanya mulicabo batondezya kuti banyina maano pe.+
13 Nokuba boobo swebo tuyoolidunda, ikutali kunze aamilimo njotupedwe, pele kweelana amunyinza wacilawo ncaakatupimina Leza, icilawo eeco ncaakasisya nokuba kooko nkomubede.+
14 Mubwini tatwiiyungizyi buya minyinza njotupedwe mbuli kuti kunyina notwakasikide kale kulindinywe, nkaambo ndiswe twakasaanguna kusika koonse akooko kulindinywe amakani mabotu aajatikizya Kristo.+
15 Peepe, tatulidundili mubusena butali mucilawo ncotupedwe naa mumilimo yamuntu uumbi, pele tujisi bulangizi bwakuti lusyomo lwanu mboluyaabukomena, milimo njotwacita iyakuvwula mucilawo cesu. Mpoonya tuyoozumanana kuukomezya mulimo wesu,
16 ikutegwa twaambilizye makani mabotu mumasi aali kule andinywe, akuti tutalidundili zintu izyakacitwa kale mucilawo camuntu uumbi.
17 “Pele ooyo uulidunda, aalidunde muli Jehova.”*+
18 Nkaambo muntu uulilumbaizya mwini tali nguwe uukkomaninwa pe,+ pele uukkomaninwa ngooyo Jehova* ngwalumbaizya.+
