2 Makani 2:1-18
-
Kulibambila kuyaka tempele (1-18)
2 Lino Solomoni wakapa malailile aakuti kuyakwe ŋanda iitwa azina lya Jehova+ alimwi aŋanda* yabwami bwakwe.+
2 Solomoni wakasala baalumi bali 70,000 kuti babe babelesi,* ibali 80,000 kuti babe basikubeza mabwe mumalundu+ alimwi abalangizi babasimilimo ibali 3,600.+
3 Kuyungizya waawo, Solomoni wakatumya mulomo kuli Hiramu+ mwami wa Turo wakuti: “Kondicitila mbubonya mbookacitila Davida taata ciindi nookamutumina zisamu zyakkedari kuti aliyakile ŋanda* yakukkala.+
4 Lino ndiyaka ŋanda yiitwa azina lya Jehova Leza wangu kuti ndiyaabe kulinguwe, kutegwa kanduumpa tununkilizyo kubusyu bwakwe,+ alimwi akubikka zinkwa zyakwiilika*+ lyoonse akutuula zituuzyo zyuumpwa mafwumofwumo akumangolezya,+ mumazuba aa Sabata,+ ciindi mwezi+ noukkala alimwi aciindi camapobwe+ aa Jehova Leza wesu. Malailile aaya anootobelwa mu Israyeli lyoonse.
5 Iŋanda njonditiiyake inooli mpati, nkaambo Leza wesu mupati kwiinda baleza bambi boonse.
6 Alimwi ino nguni uukonzya kuba anguzu zyakumuyakila ŋanda? Nkaambo majulu alimwi mujulu lyamajulu takonzyi kukkwana,+ aboobo ino mebo ndime ni kuti ndimuyakile ŋanda? Cilikke ncondikonzya kumuyakila mbusena bwakuuntumwida busi bwazipaizyo kulinguwe.
7 Lino konditumina muntu syaazibwene mukupanga zintu zyangolida, nsiliva, mukuba,+ butale, amuntu uucizyi kuluka masani aaboya bwambelele bwamubala wacisombo awadowalowa, ntali yamubala wajulu alimwi uuzyi kubeza zifwanikiso. Uzoobelekela mu Juda amu Jerusalemu antoomwe abasyaazibwene mbejisi, aabo Davida taata mbaakasala.+
8 Alimwi konditumina zisamu zyakkedari, zyamulombe+ azyaalugumi+ kuzwa ku Lebano nkaambo ndilizyi kabotu kuti babelesi bako balicibwene kutema masamu aaku Lebano.+ Babelesi bangu bazoobelekela antoomwe ababelesi bako+
9 kundibambila zisamu zinji, nkaambo ŋanda njondiyanda kuyaka inooli mpati kapati.
10 Lino bona! Babelesi bako basikutebba nkuni abasikutema masamu ndiyoobapa cakulya:+ Makore* aawiiti aali 20,000, makore aabbaale aali 20,000, nongo* zyawaini zili 20,000 alimwi anongo zyamafwuta zili 20,000.”
11 Amvwe boobo, Hiramu mwami waku Turo wakalembela Solomoni mulumbe wakuti: “Akaambo kakuti Jehova ulabayanda bantu bakwe, wakubikka kuba mwami wabo.”
12 Mpoonya Hiramu wakati: “Aatembaulwe Jehova Leza wa Israyeli iwakalenga julu anyika nkaambo wapa Mwami Davida imwana musongo,+ uucenjede alimwi uumvwisya,+ ooyo uutiyakile Jehova ŋanda alimwi aŋanda yabwami bwakwe.
13 Lino ndatuma mwaalumi syaazibwene, uuli aluzyibo akumvwisya, Hiramu-abi,+
14 imwana wamukaintu muna Dani pele usyi wakali muna Turo; ulaaluzyibo mukupanga zintu zyangolida, nsiliva, mukuba, butale, mabwe, zisamu, muntu uucizyi kuluka masani aaboya bwambelele bwamubala wacisombo, ntali yamubala wajulu, masani mabotu aadowalowa.+ Ulakonzya kubeza zifwanikiso zili zyoonse akupanga cintu cili coonse ncaambilwa kupanga.+ Uyoobelekela antoomwe abasyaazibwene ibako mukupanga zintu alimwi abasyaazibwene mukupanga zintu ibasimalelaangu Davida uso.
15 Lino simalelaangu kotumya wiiti, bbaale, mafwuta awaini nzyookasyomezya babelesi bako.+
16 Lino swebo tulagonka masamu aaku Lebano+ kweelana amboyanda alimwi tuyookuletela ngawo ku Jopa+ mulwizi kaangidwe muzileye; eelyo yebo uyakwaabweza akwaatola ku Jerusalemu.”+
17 Kumane Solomoni wakababala baalumi beenzu boonse ibakali munyika ya Israyeli+ musyule lyakubala nkwaakacitide Davida usyi,+ eelyo kwakajanwa kuti bakali 153,600.
18 Aboobo wakabikka baalumi bali 70,000 akati kabo kuti babe babelesi,* bali 80,000 kuti babe basikubeza mabwe+ mumalundu alimwi abalangizi babasimilimo ibali 3,600.+
Bupanduluzi buyungizyidwe
^ Naa “aŋanda yamwami.”
^ Naa “basikunyamuna mikuli.”
^ Naa “ŋanda yamwami.”
^ Nkokuti, zinkwa zyacitondezyo.
^ Kore lyomwe lyakaleelene amalita aali 220. Amubone Makani Aayungizyidwe B14.
^ Nongo eeyi yakaleelene amalita aali 22. Amubone Makani Aayungizyidwe B14.
^ Naa “basikunyamuna mikuli.”
