2 Petro 1:1-21
1 Ndime Simoni Petro, imuzike alimwi mwaapostolo wa Jesu Kristo, nendilembela baabo ibakatambula lusyomo luyandisi mbubonya mbuli ndotujisi andiswe kwiinda mubululami bwa Leza wesu a Mufwutuli Jesu Kristo kuti:
2 Luzyalo lwa Leza aluumuno aziyungizyigwe kulindinywe kwiinda muluzyibo lwini-lwini+ lwa Leza alwa Jesu Mwami wesu,
3 nkaambo kwiinda munguzu nzyajisi zya Leza twapegwa zintu zyoonse zipa kuba abuumi akubelekela Leza cakulyaaba kwiinda muluzyibo lwini-lwini lwayooyo wakatwiita+ kwiinda mubulemu abukkale bwakwe bubotu.
4 Kwiinda muzintu eezyi, watupa zisyomezyo+ ziyandisi alimwi zitalikomeneni, kutegwa kwiinda muzintu eezyi mukonzye kuba alubazu mubube bwa Leza,+ mbwaanga mwakatija kuzwa mukubola kwamunyika ikuletwa azisusi zibi.
5 Akaambo kakaambo aaka, amusungwaale+ kapati ikutegwa muyungizye bukkale bubotu kulusyomo lwanu,+ kubukkale bubotu muyungizye luzyibo,+
6 kuluzyibo lwanu muyungizye kulilesya,+ kukulilesya kwanu muyungizye kuliyumya, kukuliyumya kwanu muyungizye kubelekela Leza cakulyaaba,+
7 kukubelekela Leza cakulyaaba kwanu muyungizye luyando lwabunyina, kuluyando lwabunyina lwanu muyungizye luyando.+
8 Nkaambo ikuti naa zintu eezyi kaziliko mulindinywe akuvwulisya, ziyoopa kuti mutabi batolo naa kutazyala micelo+ kujatikizya luzyibo lwini-lwini lwa Mwami wesu Jesu Kristo.
9 Nkaambo kufwumbwa muntu uutajisi zintu eezyi moofwu, ulifwinyide kutegwa ataboni mumuni*+ eelyo waluba kuti wakasalazyigwa kuzibi zyakwe+ zyakaindi.
10 Aboobo bakwesu, amusungwaale kapati ikutegwa mubusinizye bwiite+ alimwi akusalwa kwanu, nkaambo ikuti naa mwazumanana kuzicita zintu eezyi, kunyina nomuyakwaalilwa pe.+
11 Mubwini, munzila eeyi muyoopegwa coolwe cipati cakunjila mu Bwami butamani bwa Mwami+ a Mufwutuli wesu Jesu Kristo.+
12 Akaambo kaceeci, lyoonse ndinoolibambilide kumuyeezya zintu eezyi, nokuba kuti mulizizyi alimwi muliimvwi nji mukasimpe ikali mulindinywe.
13 Pele kufwumbwa kuti kandicili mutente*+ eeli, ndiyeeya kuti ncibotu kumusinsimuna kwiinda mukumuyeezya,+
14 mbwaanga ndilizyi kuti tente lyangu lilaafwaafwi kugusyigwa, mbubonya awalo Mwami wesu Jesu Kristo mbwaakanditondezya.+
15 Lyoonse ndinoosoleka kusikila mpondigolela kutegwa ndaakuunka mukacikonzye kuziyeeya* zintu eezyi lwanu nobeni.
16 Mubwini, tiitwakamuzyibya nguzu alimwi akubako kwa Mwami wesu Jesu Kristo kwiinda mukutobela twaano twakubeja twakapangwa cabucenjezu, pele twakalibonena ameso eesu bupati bwakwe.+
17 Nkaambo walo wakatambula kuzwa kuli Leza Taata lulemeko abulemu, eelyo naakaambwa kulinguwe kuzwa kubulemu bupati majwi aali mbuli yaaya* aakuti: “Ooyu Mwanaangu, ngweyandisya, ooyo mebo lwangu ngwekkomanina.”+
18 Inzya, majwi aaya twakaamvwa kaambwa kuzwa kujulu eelyo notwakali anguwe mucilundu cisalala.
19 Aboobo lino jwi lyabusinsimi lyasinizyigwa ncobeni kulindiswe, alimwi nywebo mucita kabotu kuti mulalibikkila maano mbubonya mbuli lambe+ liyaka mumudima (kusikila mane bwaumbuluka antanda+ yazwa) mumyoyo yanu.
20 Nkaambo cakusaanguna mulizyi kuti, kunyina businsimi bwamu Magwalo buzwa kubupanduluzi bwamuntu.
21 Nkaambo kunyina ciindi ibusinsimi nobwakaba akaambo kakuyanda kwamuntu,+ pele bantu bakaambaula zyakazwa kuli Leza kwiinda mukusololelwa amuuya uusalala.+
Bupanduluzi buyungizyidwe
^ Naa ambweni, “ataboni zili kumbele.”
^ Nkokuti, mubili wakwe waansi.
^ Naa “kuzyaamba.”
^ Mu Chigiriki, “ijwi lili boobu.”
