2 Samuele 3:1-39
3 Lino nkondo akati kamukwasyi wa Saulo awa Davida yakazumanana; alimwi Davida wakali kuyaabuba anguzu,+ pele mukwasyi wa Saulo wakali kuyaabuceya nguzu.+
2 Aciindi eeci Davida wakalizyede kale bana basankwa ku Hebroni.+ Mwanaakwe mutaanzi wakali Amunoni,+ ngwaakazyala kuli Ahinoamu+ waku Jezreeli.
3 Wabili wakali Kileabu,* ngwaakazyala kuli Abigayeli+ muna Karimeli mukamufwu wa Nabala; alimwi watatu wakali Abisalomu+ mwana wa Maaka imwana musimbi wa Talimai+ mwami wa Gesuri.
4 Wane wakali Adonija+ mwana wa Hagiti, eelyo wasanu wakali Sefatiya mwana wa Abitali.
5 Kumane wacisambomwe wakali Itireamu mwana wa Egila, mukaintu wa Davida. Aaba mbabana Davida mbaakazyala ku Hebroni.
6 Nokuba kuti nkondo yakazumanana akati kamukwasyi wa Saulo awa Davida, Abineri+ wakazumanana kuba anguzu mumukwasyi wa Saulo.
7 Lino Saulo wakalijisi mwanakasuwa wazina lya Rizipa,+ mwana wa Aya. Kumane Isibosete+ wakati kuli Abineri: “Ino nkaambo nzi ncowakoonana amwanakasuwa wabataata?”+
8 Eelyo Abineri wakanyema kapati akaambo kamajwi ngaakaamba Isibosete, aboobo wakati: “Sena ndili mubwa wamucisi ca Juda? Kusikila sunu, ndazumanana kutondezya luyando lutamani kumukwasyi wa Saulo uso, kubanabokwabo akubeenzinyina alimwi tiindakulekela kuti uwide mumaanza aa Davida; nokuba boobo sunu undipa mulandu akaambo kamukaintu.
9 Leza andisubule kapati kuti naa tandikoocitila Davida mbubonya Jehova mbwaakakonka kulinguwe:+
10 kwiinda mukulonzya bwami kuzwa kumukwasyi wa Saulo akukkazikizya bwami bwa Davida mu Israyeli amu Juda, kuzwa ku Dani kusikila ku Beere-seba.”+
11 Eelyo tanaakacili kukonzya kwaamba jwi noliba lyomwe kuvwiila Abineri nkaambo wakali kumuyoowa.+
12 Aboobo Abineri wakatuma batumwa kuli Davida kuyoomwaambila kuti: “Ino nyika eeyi njiyani?” Alimwi wakayungizya kuti: “Kopanga cizuminano andime, eelyo ndilacita kufwumbwa ncondikonzya* kuleta bana Israyeli boonse kulubazu lwako.”+
13 Davida wakati: “Ncibotu, ndilapanga cizuminano anduwe. Cintu comwe buyo ncondikulomba ncakuti, utakasoli kuboola kubona busyu bwangu ccita kuti ukamuletelezye Mikala+ mwana wa Saulo waakuboola kundibona.”
14 Mpoonya Davida wakatuma batumwa kuli Isibosete+ imwana wa Saulo kuyoomwaambila kuti: “Kondipa mukaintu wangu Mikala ngondakalungila ndomo zyaba Filisiti zili 100.”+
15 Aboobo Isibosete wakatuma bantu kuyoomubweza kuzwa kumulumaakwe Palitieli,*+ imwana wa Laisi.
16 Pele mulumaakwe wakamutobela kayaabulila mane kuyoosika ku Bahurimu.+ Mpoonya Abineri wakati kulinguwe: “Kopiluka!” Eelyo wakapiluka.
17 Lino Abineri wakatumya mulomo kubaalu bamu Israyeli akubaambila kuti: “Kuzwa kaindi mwali kuyanda kuti Davida abe mwami wanu.
18 Aboobo amubweze ntaamu lino nkaambo Jehova wakaambila Davida kuti: ‘Kwiinda mumubelesi wangu Davida,+ ndiyoofwutula bantu bangu bana Israyeli kumaanza aaba Filisiti akumaanza aabasinkondonyina boonse.’”
19 Mpoonya Abineri wakaambaula abana Benjamini.+ Alimwi wakaunka kuyakwaambaula kumbali a Davida ku Hebroni kujatikizya zintu zyoonse nzyobakazuminana bana Israyeli alimwi aboonse bamuŋanda ya Benjamini.
20 Abineri antoomwe abaalumi bakwe bali 20 nobakasika kuli Davida ku Hebroni, Davida wakababambila pobwe.
21 Mpoonya Abineri wakati kuli Davida: “Kondileka nduunke ndikabunganye bana Israyeli boonse kulinduwe omwami simalelaangu kutegwa bapange cizuminano anduwe, eelyo masimpe uyooba mwami wabo boonse.” Aboobo Davida wakamuleka Abineri kuunka muluumuno.
22 Aciindi eeci, Joabu ababelesi ba Davida bakapiluka kuzwa kukusaala, alimwi bakaletelezya azisaalo zinji. Abineri wakalizwide kale kuli Davida ku Hebroni nkaambo wakalimulekede kale kuti aunke muluumuno.
23 Lino Joabu+ ampi yabasikalumamba yoonse njaakali limwi niyakasika, Joabu wakaambilwa kuti: “Abineri+ mwana wa Neri+ waliboolede kumwami alimwi mwami wamuleka kuti aunke, lino uli mulweendo lwakwe muluumuno.”
24 Aboobo Joabu wakaunka kumwami akwaamba kuti: “Ino ncinzi ncoocita? Abineri waliboolede kulinduwe. Ino wamulekela nzi kuti aunke muluumuno?
25 Ulimuzyi kabotu Abineri mwana wa Neri! Waboolelede buyo kukufwubaazya akuzyiba mboendeenda akuzyiba zintu zyoonse nzyocita.”
26 Aboobo Joabu wakazwa kuli Davida akutuma batumwa kuti bamutandile Abineri, eelyo bakamweenzya kucikala ca Sira akumupilusya; pele Davida kunyina ncaakazyi pe.
27 Lino Abineri naakapiluka ku Hebroni,+ Joabu wakamutola kumulyango kuti aambaule anguwe ambali. Pele ooko wakamuyasa sumo mwida cakuti wakafwa;+ wakacita oobo akaambo kakujaya* Asaheli+ mwanookwabo.
28 Eelyo Davida naakaamvwa makani aaya wakati: “Mebo abwami bwangu tatujisi alimwi tatukabi amulandu wabulowa+ bwa Abineri mwana wa Neri nouceya kuli Jehova.
29 Mulandu aube amutwe wa Joabu+ aamukwasyi wabausyi woonse. Mumukwasyi wa Joabu kutabuli muntu uusensa kubwaalumi naa kubukaintu,+ sicinsenda,+ mwaalumi uulemene,* muntu uujaigwa apanga naa uubula cakulya!”+
30 Aboobo Joabu amwanookwabo Abisai+ bakajaya Abineri+ akaambo kakuti wakajaya Asaheli mwanookwabo munkondo+ ku Gibeoni.
31 Mpoonya Davida wakaambila Joabu abantu boonse mbaakali limwi kuti: “Amuzapaule zisani zyanu akusama masaka akumulila Abineri.” Awalo Mwami Davida wakali kuyaabweenda musyule lyamacila.
32 Eelyo bakamuzikka Abineri ku Hebroni; alimwi mwami wakoongolola kulila acuumbwe ca Abineri, mpoonya bantu boonse bakatalika kulila.
33 Mwami wakaimba lwiimbo lwakulila Abineri kati:
“Sena Abineri inga wafwa mbuli muntu mufwubafwuba?
34 Maanza aako taakaangidwe pe,Azyalo zituta zyako tiizyakaangidwe ansimbi zyamukuba.*
Wafwa mbuli muntu wajaigwa azigwebenga.”*+
Bamvwe boobo bantu boonse bakatalika alimwi kulila.
35 Kumane buzuba mbubonya oobo bantu boonse bakaboola kuti bape Davida cinkwa cakumuumbulizya,* pele walo wakakonka kuti: “Leza andisubule kapati ikuti naa ndilye cilyo cili coonse kalitanabbila zuba!”+
36 Bantu boonse bakabona cakacitika alimwi cakabakkomanisya. Mbubonya mbozyakabakkomanisya zintu zyoonse nzyaakacita mwami, acalo eeci cakabakkomanisya bantu boonse.
37 Aboobo buzuba oobo bantu ba Davida boonse alimwi abana Israyeli boonse bakazyiba kuti tali mwami wakapa kuti Abineri imwana wa Neri ajaigwe.+
38 Mpoonya mwami wakaambila babelesi bakwe kuti: “Sena tamuzyi kuti ngusilutwe alimwi mwaalumi singuzu iwafwa sunu mu Israyeli?+
39 Mebo sunu ndawizuka nokuba kuti ndili mwami uunanikidwe,+ alimwi baalumi aaba, ibana ba Zeruya+ bandicitila lunya kapati.+ Jehova amupilusizye sizibi kweelana azibi zyakwe.”+
Bupanduluzi buyungizyidwe
^ Mu Chihebrayo, “alimwi bona, ijanza lyangu lilaanduwe.”
^ Mu Chihebrayo, “kabulowa bwa.”
^ Ambweni kwaamba mwaalumi uulemene uukonzya buyo kubeleka milimo yeelede kubelekwa abamakaintu.
^ Mu Chihebrayo, “tiizyakaangidwe mukuba.”
^ Mu Chihebrayo, “abana bakutalulama.”
^ Naa “cinkwa camalila.”
