Baefeso 1:1-23
1 Ndime Paulo, iwakaba mwaapostolo wa Kristo Jesu kwiinda mukuyanda kwa Leza, nendilembela basalali bali ku Efeso+ aabo ibasyomeka muli Kristo Jesu kuti:
2 Amube aluzyalo alimwi aluumuno kuzwa kuli Leza Taateesu a Mwami wesu Jesu Kristo.
3 Aatembaulwe Leza Usyi wa Mwami wesu Jesu Kristo, nkaambo watuleleka azileleko zyoonse zyamuuya mumasena aakujulu kwiinda muli Kristo,+
4 mbwaanga wakatusala kuti tukamantane anguwe* matalikilo aanyika* kaatanaba, kuti tube basalali alimwi ibanyina kampenda+ mumeso aakwe muluyando.
5 Nkaambo wakatusalila limwi+ kuti tube bana bakwe+ kwiinda muli Jesu Kristo, kweelana acimubotela alimwi akuyanda kwakwe,+
6 kutegwa atembaulwe akaambo kaluzyalo lwakwe lupati+ ndwaakatufwida kwiinda muli yooyo ngwayandisya.+
7 Kwiinda mulinguwe twakaangununwa acinunuzyo cabulowa bwayooyo,+ inzya, ikulekelelwa kwamilandu yesu,+ akaambo kaluzyalo lwa Leza lunji kapati.
8 Wakatutondezya luzyalo lwakwe lunji kapati alimwi akutupa busongo boonse akumvwisya*
9 kwiinda mukutuzyibya maseseke aamakanze aakwe.+ Maseseke aayo aleendelana aceeco cimubotela ncaakakanza lwakwe mwini
10 kuti cakkwana ciindi cibikkidwe ayendelezye zintu ikutegwa aziyobolole zintu zyoonse antoomwe muli Kristo, izintu zili kujulu alimwi azintu zili anyika.+ Inzya, mulinguwe,
11 ooyo ngotukamantene limwi alimwi ngotwakasalwa limwi kuba basikukona,+ mbwaanga twakasalilwa limwi kweelana amakanze aayooyo uusala kucita zintu zyoonse kweelana akuyanda kwakwe,
12 kutegwa swebo notwakasaanguna kuba abulangizi muli Kristo tupe kuti Leza atembaulwe akupegwa bulemu.
13 Pele andinywe mwakaba abulangizi mulinguwe nomwakamvwa majwi aakasimpe, imakani mabotu aamba zyalufwutuko lwanu. Alimwi kwiinda mulinguwe, nomwakasyoma, mwakabikkwa ciganto+ camuuya uusalala wakasyomezyegwa.
14 Muuya uusalala ooyu ncisinizyo* cakuti tuyoopegwa lukono lwesu kumbele,+ kutegwa kwiinda mucinunuzyo lubono lwa Leza+ lukanununwe,+ akuti bulemu bwakwe bukatembaulwe.
15 Nkakaambo kaako andime, kuzwa nindakamvwa zyalusyomo ndomujisi mu Mwami Jesu alimwi aluyando ndomutondezya kubasalali boonse,
16 nsileki kumupailila pe. Lyoonse ndilamubandauka mumipailo yangu,
17 kuti Leza wa Mwami wesu Jesu Kristo, Taateesu uulemekwa, amupe muuya wabusongo akuti mucikonzye kumvwa zintu nzyayubununa muluzyibo lwini-lwini lujatikizya nguwe.+
18 Wajalula myoyo yanu kuti mubone, kutegwa mubuzyibe bulangizi oobo mbwaakamwiitila, muzyibe lubono lunji ndwajisi oolo ndwayoopa kuti bakone basalali,+
19 akuti muzyibe mbozili zipati nguzu zyakwe nzyaakatutondezya swebo tobasyomi.+ Bupati bwanguzu nzyajisi bulabonwa kwiinda mukubelesyegwa kwanguzu zyakwe,
20 eezyo nzyaakabelesya kuli Kristo ciindi naakamubusya kuzwa kubafwu akumukkazika kujanza lyakwe lyalulyo+ mumasena aakujulu,
21 aasumpukide kapati kwiinda mfwulumende zyoonse, bweendelezi buli boonse, basinguzu boonse, bulelo buli boonse akulemekwa kwiinda zina lili lyoonse lyaambwa+ mubweende bwazintu obuno* alimwi aboobo buboola kumbele.
22 Alimwi wakabombya zintu zyoonse kunsi aamaulu aakwe,+ akumubikka kuti abe mutwe wazintu zyoonse zijatikizya mbungano,+
23 eeyo iili ngomubili wakwe+ uuzwide yooyo uuzuzya zintu zyoonse cakumaninina.
Bupanduluzi buyungizyidwe
^ Nkokuti, a Kristo.
^ Eeci caamba kuzwa kukumitwa naa kukuzyalwa kwabantu, nkokuti bana ba Adamu a Eva.
^ Naa “amaano.”
^ Naa “mali aakujatizya cintu (mali aacizuminano); cisinizyo (cisyomezyo) cazintu ziboola kumbele.”
^ Naa “muciindi ecino.” Amubone Bupanduluzi Bwamabala.
