Baroma 14:1-23
14 Amumutambule muntu ooyo uutanasima mulusyomo,+ pele mutamubeteki akaambo kakwiindana mizeezo.*
2 Umwi muntu ulijisi lusyomo lumupa kulya zintu zyoonse, pele uutanasima ulya buyo cisyumani.
3 Ooyo uulya atasampauli yooyo uutalyi, alimwi ooyo uutalyi atabeteki yooyo uulya,+ nkaambo Leza wamutambula awalo ooyo.
4 Ino nduwe ni yebo oobeteka mubelesi wamweenzinyoko?+ Mukuli wasimalelaakwe mwini kumubeteka naa uli kabotu naa pe.+ Ncobeni ulakonzya kukkomaninwa a Leza, nkaambo Jehova* ulakonzya kumugwasya.
5 Muntu umwi ubona buzuba bumwi kuti bulayandika kwiinda bumbi;+ uumbi ubona buzuba bumwi kuti buleelene amazuba ambi oonse;+ muntu umwi aumwi asinizye cakumaninina mumizeezo yakwe mwini.
6 Ooyo uubona buzuba bumwi kuti bulayandika, ububona boobo mukulemeka Jehova.* Alimwi ooyo uulya, ulalya mukulemeka Jehova* nkaambo ulamulumba Leza;+ alimwi ooyo uutalyi, talyi mukulemeka Jehova,* pele ulamulumba Leza.+
7 Nkaambo mubwini kunyina muntu akati kesu uuliponena lwakwe mwini,+ alimwi kunyina uulifwida lwakwe mwini.
8 Nkaambo ikuti naa tulapona, tuponena Jehova,*+ alimwi ikuti naa twafwa, tufwida Jehova.* Aboobo kufwumbwa naa tulapona naa twafwa, tuli bantu ba Jehova.*+
9 Nkaambo Kristo wakafwa akuba muumi alimwi, kutegwa abe Mwami wabafwide abaumi.+
10 Pele ino nkaambo nzi yebo ncobeteka imunyoko?+ Naa ino nkaambo nzi alimwi ncomusampaula imunyoko? Nkaambo kayi toonse tuyoobetekwa kumbele lyacuuno calubeta ca Leza.+
11 Nkaambo kulilembedwe kuti: “‘Masimpe mbubonya mbondili muumi,’+ mbwaamba Jehova,* ‘magondo oonse ayoondifwugamina, alimwi milaka yoonse iyoozumina caantangalala kuti ndime Leza.’”+
12 Aboobo umwi aumwi wesu uyoolyaambilila mwini kuli Leza.+
13 Aboobo, atuleke kubetekana,+ muciindi caboobo amukanze kutabikkila munyoko cilebyo naa cisinkilizyo.+
14 Ndilizyi alimwi ndilisinizyide mu Mwami Jesu kuti kunyina cintu citasalali;+ ccita buyo cintu muntu ncabona kuti tacisalali, ncecitasalali kulinguwe.
15 Nkaambo ikuti munyoko ulacimwa akaambo kacakulya, nkokuti toceendi caluyando.+ Utanyonyooni muntu ooyo Kristo ngwaakafwida akaambo kacakulya cako.+
16 Aboobo nywebo mutapi kuti bantu baambe cintu cibotu ncomucita kuti ncibi.
17 Nkaambo Bwami bwa Leza tabwaambi kulya akunywa pe,+ pele bwaamba bululami, luumuno akukondwa antoomwe amuuya uusalala.
18 Nkaambo kufwumbwa muntu ooyo uubelekela Kristo munzila eeyi ulatambulika kuli Leza alimwi ulayandwa abantu.
19 Aboobo atusungwaalile kucita zintu ziletela luumuno+ azintu iziyaka umwi aumwi.+
20 Amuleke kumwaya mulimo wamaanza a Leza akaambo buyo kacakulya.+ Masimpe, zintu zyoonse zilasalala, pele tacili kabotu kuti muntu kalya akulebya bamwi.+
21 Cilainda kubota kutalya nyama, naa kutanywa waini nokuba kutacita cintu cili coonse icilebya munyoko.+
22 Lusyomo oolo ndojisi, alube akati kanduwe a Leza. Ulikkomene muntu ooyo uutalibeteki akaambo kazintu nzyasala kucita.
23 Pele imuntu uulya kumwi kadooneka, wabetekwa kale, nkaambo tanaalya kweelana alusyomo lwakwe. Ncobeni, icintu coonse cicitwa iciteendelani alusyomo ncibi.
Bupanduluzi buyungizyidwe
^ Naa ambweni, “kazintu nzyayeeya mumoyo.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
