Ezekieli 36:1-38
36 “Lino yebo omwanaamuntu, kosinsima kujatikizya malundu aa Israyeli, waambe kuti, ‘Nomalundu aa Israyeli, amumvwe jwi lya Jehova.
2 Mboobu mbwaamba Mwami Singuzuzyoonse Jehova: “Sinkondonyoko wamwaambila kuti, ‘Ehee! Naaba malundu aansiku lino aba eesu!’”’+
3 “Aboobo, kosinsima waambe kuti, ‘Mboobu mbwaamba Mwami Singuzuzyoonse Jehova: “Akaambo kakuti nywebo bamusaala akumulwana kumabazu oonse kutegwa mube mumaanza aabaabo bafwutuka* kuzwa akati kabantu bamasi, alimwi akaambo kakuti bantu baluujisi kumwaamba akumujaila zina,+
4 nkokuti, nywebo nomalundu aa Israyeli, amumvwe jwi lya Mwami Singuzuzyoonse Jehova! Mboobu Mwami Singuzuzyoonse Jehova mbwaambila malundu atulundu-lundu, tulonga amakkuti, matongo aatakwe cintu cili coonse,+ alimwi aminzi yakasiigwa eeyo yakasaalwa akusampaulwa abantu bakafwutuka bamumasi aabazingulukide;+
5 inzya mboobu Mwami Singuzuzyoonse Jehova mbwaambila zintu eezyi: ‘Mubusungu bwangu buvwilima+ ndiyakwaamba majwi aabukali kubantu bamumasi ibafwutuka alimwi akucisi coonse ca Edomu, aabo ibali kusekelela kapati alimwi akufwubaazya kapati+ ciindi nibali kulipa cisi cangu, kuti babweze macelelo aancico akucisaala.’”’+
6 “Aboobo, kosinsima kujatikizya cisi ca Israyeli, waambile malundu atulundu-lundu, tulonga amakkuti kuti, ‘Mboobu mbwaamba Mwami Singuzuzyoonse Jehova: “Amubone! Ndilaamba mubusungu bwangu amubukali bwangu, akaambo kamasampu aayo ngomunyamwide aazwa kumasi.”’+
7 “Aboobo mboobu mbwaamba Mwami Singuzuzyoonse Jehova: ‘Mebo lwangu ndatambika janza mujulu akukonka kuti masi aazingulukide ayoolinyamuda masampu aangawo.+
8 Pele nywebo, nomalundu aa Israyeli muyooba amitabi akubazyalila micelo bantu bangu ba Israyeli,+ nkaambo balapiluka ino-ino.
9 Nkaambo mebo ndilaandinywe, ndiyoomucebuka, eelyo muyoolimwa akusyangwa mbuto.
10 Ndiyoobavwuzya bantu banu—bamuŋanda ya Israyeli yoonse, boonse buyo—eelyo minzi iyookkalwa bantu+ aalo matongo ayooyakululwa.+
11 Inzya, ndiyoovwuzya bantu banu alimwi abanyama banu bavwubwa;+ bayoovwula akuzyalisya. Ndiyoopa kuti nywebo mukkalwe abantu mbubonya mbuli kaindi,+ alimwi ndiyoomuvwubya kwiinda mazuba aakaindi;+ eelyo muyoozyiba kuti ndime Jehova.+
12 Ndiyoopa kuti bantu—nkokuti bantu bangu ba Israyeli—beendeende mulindinywe akumubweza kuti mube babo.+ Muyooba lukono lwabo, eelyo kunyina limbi nomuyoobapa kubula bana.’”+
13 “Mboobu mbwaamba Mwami Singuzuzyoonse Jehova: ‘Akaambo kakuti bamwaambila kuti, “Nywebo muli nyika iilya bantu akujaya bana bamasi aanu,”’
14 ‘nkokuti kunyina nomuyoobalya limbi bantu naa kupa kuti masi aanu abule bana,’ mbwaamba Mwami Singuzuzyoonse Jehova.
15 ‘Tandikamupi limbi kutukilwa amasi naa kumupa kunyamuna masampu ngobaamba bantu,+ alimwi kunyina limbi nomuyoowisya masi aanu,’ mbwaamba Mwami Singuzuzyoonse Jehova.”
16 Alimwi ijwi lya Jehova lyakandisikila kaliti:
17 “Omwanaamuntu, ciindi bamuŋanda ya Israyeli nobakali kukkala mucisi cabo, bakacisofwaazya anzila zyabo alimwi amicito yabo.+ Mumeso aangu inzila zyabo zyakali mbuli busofwaazi bwamukaintu uuli kumwezi.+
18 Aboobo ndakabatila bukali bwangu akaambo kabulowa mbobakatila mucisi,+ alimwi akaambo kakuti bakasofwaazya cisi amituni yabo iisesemya.*+
19 Aboobo ndakabamwaya akati kamasi akubapalanganya muzisi zimbi.+ Ndakababeteka kweelana anzila yabo alimwi akweelana amicito yabo.
20 Pele nobakasika kumasi aayo, bantu bakasampaula zina lyangu lisalala+ kwiinda mukubaamba kuti, ‘Aaba mbantu ba Jehova, nokuba boobo bakatandwa mucisi cakwe.’
21 Aboobo, ndiyoolibikkila maano zina lyangu lisalala, eelyo ndyobasampaula bamuŋanda ya Israyeli akati kamasi ooko nkobaunka.”+
22 “Aboobo kobaambila bamuŋanda ya Israyeli kuti, ‘Mboobu mbwaamba Mwami Singuzuzyoonse Jehova: “Tandikoobweza ntaamu akaambo kandinywe, nywebo nobamuŋanda ya Israyeli, pele ndilacita oobo akaambo kazina lyangu lisalala, eelyo ndimwasampaula akati kamasi ooko nkomwaunka.”’+
23 ‘Masimpe, ndiyoolisalazya zina lyangu lipati,+ eelyo lyakasampaulwa akati kamasi, inzya eelyo ndimwakasampaula mulingawo; aboobo masi ayoozyiba kuti ndime Jehova,’+ mbwaamba Mwami Singuzuzyoonse Jehova, ‘ciindi ndaakusalazyigwa akati kanu balo kabalangilila.
24 Ndiyoomugwisya akati kamasi akumuyobolola kuzwa muzisi zyoonse akumuleta mucisi canu.+
25 Ndiyoomusansaila maanzi aanyina tombe, eelyo muyoosalala;+ ndiyoomusalazya kubusofwaazi bwanu boonse+ alimwi akumituni yanu iisesemya yoonse.+
26 Ndiyoomupa moyo mupya+ akubikka muuya mupya mulindinywe.+ Ndiyoogwisya moyo muyumu nta mbuli bbwe+ mumubili wanu akumupa moyo muteteete wanyama.*
27 Ndiyoobikka muuya wangu mulindinywe, alimwi ndiyoomupa kweenda mumilawo yangu,+ eelyo muyootobela akucita mbeta zyangu.
28 Aboobo muyookkala mucisi ncondakapa bamauso, alimwi muyooba bantu bangu andime ndiyooba Leza wanu.’+
29 “‘Ndiyoomufwutula kubusofwaazi bwanu boonse alimwi ndiyakwiita maila akwaavwuzya kapati, alimwi tandikamuleteli nzala pe.+
30 Ndiyoopa kuti micelo yazisamu abutebuzi bwamumyuunda zivwule, kutegwa mutakasampuki limbi akaambo kanzala akati kamasi.+
31 Aboobo muyooziyeeya nzila zyanu zibyaabi amicito yanu eeyo yatakali mibotu, eelyo muyoolisesemwa nobeni akaambo kamulandu wanu amicito yanu iisesemya.+
32 Pele amuzyibe kuti: Tandili mukucita boobu akaambo kandinywe pe,’+ mbwaamba Mwami Singuzuzyoonse Jehova. ‘Muciindi caboobo, amulisende akufwa nsoni akaambo kanzila zyanu, nywebo nobamuŋanda ya Israyeli.’
33 “Mboobu mbwaamba Mwami Singuzuzyoonse Jehova: ‘Mubuzuba mbondiyoomusalazya kumilandu yanu yoonse, ndiyoopa kuti minzi ikkalwe abantu+ akuti matongo ayakululwe.+
34 Inyika iinyonyookede, eeyo iyali matongo njobali kubona bantu boonse bainda, iyoolimwa.
35 Eelyo bantu bayakwaamba kuti: “Inyika yakanyonyookede yaba mbuli muunda wa Edeni,+ ayalo minzi eeyo iyakali matongo alimwi iyakanyonyoonwa akukolomonwa lino yaba minzi iikwabilidwe alimwi iikkalwa abantu.”+
36 Aboobo masi aasyeede aayo aamuzingulukide ayoozyiba kuti mebo lwangu, nde Jehova, ndime ndayakulula ceeco cakakolomonwa, akusyangulula ceeco cakanyonyoonwa. Mebo lwangu, nde Jehova, ndime ndaamba alimwi ndime ndacicita.’+
37 “Mboobu mbwaamba Mwami Singuzuzyoonse Jehova: ‘Kuyungizya waawo, bamuŋanda ya Israyeli ndiyoobaleka kuti bandilombe kubacitila cintu eeci: Ndiyoovwuzya bantu babo mbuli butanga bwambelele.
38 Mbubonya mbuli butanga bwabasalali, mbuli butanga bwamunzi wa Jerusalemu* kuciindi camapobwe aanguwo,+ iminzi eeyo iyakali matongo iyoozula makamu aabantu;+ eelyo bayoozyiba kuti ndime Jehova.’”
Bupanduluzi buyungizyidwe
^ Mu Chihebrayo, “basyeede.”
^ Mu Chihebrayo kuboneka kuti bbala eeli liliswaangene abbala lyaamba “bufwumba” alimwi lilabelesyegwa kwaamba cintu cisesemya.
^ Nkokuti, ooyo uubikkila maano kutobela busolozi bwa Leza.
^ Naa ambweni, “mbuli butanga bwambelele zyazituuzyo mu Jerusalemu.”
