Intembauzyo 77:1-20
Kumweendelezi wanyimbo; kujatikizya Jedutuni.* Intembauzyo ya Asafu.+ Lwiimbo.
77 Ndilakwiilila Leza ajwi lyangu;Ndilakwiilila Leza, eelyo walo ulandimvwa.+
2 Ibuzuba nondili mumapenzi ndiyandaula Jehova.+
Imasiku tandileki* kutambika maanza aangu kulinguwe.
Tandikonzyi kuumbulizyigwa.
3 Nondiyeeya Leza, ndilatongela;+Ndilakatazyigwa alimwi ndilagonkelwa.+ (Sela)
4 Yebo wazijata zikoye zyangu kuti nditaoni;Ndakopana alimwi tandikonzyi kwaambaula.
5 Ndayeeya mazuba aakaindi,+Imyaka yakale-kale.
6 Masiku ndiyeeya nyimbo yangu;+Ndilayeeyesya mumoyo wangu;+Ndilavwuntauzya cakulomya.
7 Sena Jehova ulatusowelalyo?+
Sena takatufwidi limbi luzyalo?+
8 Sena takalutondezyi limbi luyando lwakwe lutamani?
Sena cisyomezyo cakwe caba cabuyo kumazyalani oonse?
9 Sena Leza waluba kufwida luzyalo,+Alimwi sena bukali bwakwe bwapa kuti luse lwakwe lumane? (Sela)
10 Sena ndizumanane kwaamba kuti: “Icindicisizya* moyo ncakuti:+
Mupatikampatila watusandukila”?*
11 Ndinooyeeya milimo ya Ja;Ndinooyeeya milimo iitaliboteli njookacita kaindi.
12 Ndinoozinzibala kuyeeya milimo yako yoonseAlimwi ndinookkala ansi kuyeeya zintu nzyocita.+
13 O Leza, inzila zyako zilasalala.
Ino nguleza nzi mupati mbuli nduwe, O Leza?+
14 Nduwe Leza mwini-mwini uucita zintu zibotu kapati.+
Watondezya nguzu zyako kumisyobo yabantu.+
15 Wavwuna* bantu bako anguzu zyako,*+Ibana ba Jakobo abana ba Josefa. (Sela)
16 Maanzi akakubona, O Leza;Maanzi akakubona akuyoowa.+
Alimwi maanzi malamfwu akakopana.
17 Makumbi akapoomona maanzi.
Ijulu livwumbidwe makumbi lyakazuma,Alimwi mivwi yako yakauluka ooku akooku.+
18 Ikundindima kwamuzumo+ wako kwakali mbuli mavwili aankalaki;Indabo zyakamunika nyika;*+Inyika yakatenkaana akuzungaana.+
19 Mugwagwa wako wakainda mulwizi,+Inzila yako yakainda mumaanzi manji;Pele mikondo yako tiiyakali kukonzya kutobelezyegwa pe.
20 Wakasololela bantu bako mbubonya mbuli butanga,+Kabalanganizyigwa* a Musa alimwi a Aroni.+
Bupanduluzi buyungizyidwe
^ Amubone Bupanduluzi Bwamabala.
^ Mu Chihebrayo, “tandimvwi cinwe.”
^ Mu Chihebrayo, “wacinca janza lyakwe lyalulyo kulindiswe.”
^ Naa “Icindiyasa mu.”
^ Mu Chihebrayo, “Wanununa.”
^ Mu Chihebrayo, “ajanza lyako.”
^ Naa “nyika mbotu.”
^ Mu Chihebrayo, “Kwiinda mujanza lya.”
