Isaya 22:1-25
22 Ngaaya makani mapati aajatikizya Kkuti lya Cilengaano:*+
Ino wabaanzi yebo, cakuti nyoonse mwatanta aziluli zyamaanda?
2 Wakazwide manyongwe,Wakali munzi walupyopyongano, munzi uusekelela.
Bantu bako bafwide tiibakajaigwa apanga pe,Nokuba kujaigwa munkondo.+
3 Beendelezi bako basilunya boonse batija aciindi comwe.+
Baangwa kakunyina kubelesya buta.
Bantu boonse ibakajanwa bakaangwa,+Nokuba kuti bakatijilide kulamfwu.
4 Nkakaambo kaako ndakati: “Amuleke kundilanga,Ndilalila ceetezya.+
Mutakakatili pe kunduumbulizyaAkaambo kakunyonyoonwa kwamwana musimbi* wabantu bangu.+
5 Nkaambo oobu mbuzuba bwamanyongwe, bwakuzundwa alimwi abwakukopana,+Kuzwa ku Mwami Singuzuzyoonse, Jehova wamakamu,Mukkuti lya Cilengaano.
Bwaanda bwakolomonwa+Alimwi kuli kulila kucilundu.
6 Elamu+ wabweza nkomo yamivwiAntoomwe ankalaki zyabasikalumamba alimwi amabbiza,*Awalo Kiri+ wavwumbula* ntobo.
7 Mumakkuti* aako mabotu kapati,Muyoozula nkalaki zyankondo,Alimwi mabbiza* ayakwiima kaalibambilide kumulyango wamunzi,
8 Cisitilizyo* ca Juda ciyoogwisyigwa.
“Mubuzuba oobo, yebo uyoolanga kuciyobwedo cazilwanyo ca Ŋanda ya Syokwe,+
9 alimwi muyoobona ŋanzi izinji zya Munzi wa Davida.+ Eelyo muyooyobolola maanzi aamuzyiba lyakunselelo.+
10 Muyoobala maanda aamu Jerusalemu, alimwi muyoomwaya maanda kutegwa muyumye bulambo.
11 Akati kamalambo obilo muyoopanga zyiba lyakuyobweda maanzi kuzwa kuzyiba lyakaindi, pele tamukalangi ku Mulengi Mupati wakacicita, alimwi tamukamuboni pe ooyo wakacibamba kaindi.
12 Mubuzuba oobo Mwami Singuzuzyoonse, Jehova wamakamu,Uyakwaambila bantu kuti balile akoomoka,+Kuti bakulule masusu akusama zisani zyamasaka.
13 Pele muciindi caboobo, kuli kusekelela akukondwa,Kujaya ŋombe akujaya mbelele,Kulya nyama akunywa waini.+
Baamba kuti, ‘Atulye akunywa, nkaambo kayi juunza tuyoofwa.’”+
14 Mpoonya ndakalimvwida amatwi aangu Jehova kandiyubunwida kuti: “‘Cinyonyoono canu eeci tacikoovwumbwa akumanizyigwa pe kusikila mane mukafwe,’+ mbwaamba Mwami Singuzuzyoonse, Jehova wamakamu.”
15 Mboobu mbwaamba Mwami Singuzuzyoonse, Jehova wamakamu: “Koya kumubanzi ooyu, kuli Sebina,+ ooyo uulanganya ŋanda* ukamwaambile kuti,
16 ‘Ino uyanda nzi okuno, nguni ngoyanda okuno, cakuti walisyida cuumbwe okuno?’ Walo wasya cuumbwe cakwe aacilundu; walipangila busena bwakulyookezyela* mumwala.
17 ‘Bona! Jehova ulakuwaala ansi canguzu, yebo omulombwana, alimwi ulakujata canguzu.
18 Ncobeni ulakuvwungaila canguzu mbuli bbola akukufwusila munyika mpati. Ooko nkoyoofwida, alimwi nkukonya ooko nkalaki zyabulemu bwako ziyooba masampu kuŋanda yasimalelaako.
19 Ndiyookugusya acuuno cako, akukutanda amulimo wako wabulemu.
20 “‘Mubuzuba oobo ndiyakwiita Eliyakimu+ mubelesi wangu imwana wa Hilikiya,
21 akumusamika cisani cako cilamfwu, ndiyoomwaanga lutambo lwako mucibuno,+ alimwi nguzu zyako zyakweendelezya* ndiyoozibikka mumaanza aakwe. Eelyo uyooba usyi bantu bakkala mu Jerusalemu abamuŋanda ya Juda.
22 Ndiyoobikka kkii yaŋanda ya Davida+ aagwezyo lyakwe. Uyookkiinuna eelyo kunyina umbi uuyookkiya; uyookkiya eelyo kunyina umbi uuyookkiinuna.
23 Ndiyoomugagaila mbuli nembe mubusena buyumu, eelyo uyooba mbuli cuuno cabwami cabulemu kuŋanda yabausyi.
24 Aalinguwe mpobayakwaanzika bulemu boonse bwaŋanda yabausyi, zyalani aluzubo,* zibelesyo zyoonse zisyoonto-syoonto, mbale zyanindi alimwi anongo zyoonse zipati-pati.
25 “‘Mubuzuba oobo,’ mbwaamba Jehova wamakamu, ‘inembe iigagaidwe mubusena buyumu iyoofwumunwa,+ alimwi iyoogonkwa akuloka, eelyo zyoonse eezyo zyaanzikidwe aalinjiyo ziyoowa akunyonyooka, nkaambo Jehova lwakwe nguwaamba.’”
Bupanduluzi buyungizyidwe
^ Kuboneka kuti icaambwa aawa munzi wa Jerusalemu.
^ Majwi aakuti “mwana musimbi” ambweni atondezya kweetezyegwa.
^ Naa “abasimabbiza.”
^ Naa “wabamba.”
^ Naa “Muzibanda.”
^ Naa “basimabbiza.”
^ Naa “Cikwabilizyo.”
^ Naa “ŋanda yamwami.”
^ Mu Chihebrayo, “cikkalilo.”
^ Naa “bulelo.”
^ Naa “atusyuukila.”
