Isaya 30:1-33
30 “Maawe kubana bazangi,”+ mbwaamba Jehova,“Aabo bacita makanze aatali angu,+Ibapanga zizuminano,* pele ikutali kwiinda mukusololelwa amuuya wangu,Kutegwa bayungizye cibi kucibi.
2 Baunka ku Egepita+ kakunyina kundibuzya,*+Kuti bakayube akukwabililwa a Farao*Akuti bakayube mucimvwule ca Egepita!
3 Pele lukwabililo lwa Farao luyoomujazya nsoni,Alimwi ikuyuba mucimvwule ca Egepita kuyoomuletela masampu.+
4 Nkaambo basilutwe bakwe bali ku Zoani,+Alimwi batumwa bakwe basika ku Hanesi.
5 Boonse bayoofwa nsoniAkaambo kabana Egepita aabo ibatakonzyi kubaletela mpindu,Ibatagwasyi alimwi batakwe mpindu,Ibajazya buyo nsoni akuleta masampu.”+
6 Ngaaya makani mapati aajatikizya banyama bakumusanza:
Ikwiinda mucisi camapenzi abuyumuyumu,Cabasyuumbwa, basyuumbwa bavwuluma,Cabacipile alimwi anzoka zikali zyuuluka,*Banyamuna lubono lwabo aamisana yambongolo,Alimwi banyamuna mpasya zyabo aantunda zyankamela.
Nokuba boobo zintu eezyi tazikabagwasyi pe bantu aabo.
7 Nkaambo lugwasyo ndobapa bana Egepita ndwabuyo, talugwasyi naaceya.+
Aboobo ndabaita kuti: “Rahabu, ooyo uukkede buyo.”+
8 “Lino koya, ukalembe makani aaya aacilembelo cipapalete kabalangilila,Alimwi ukaalembe mubbuku,+Kutegwa akabeleke mumazuba aaboolaKaali bumboni butamani.+
9 Nkaambo aaba bantu mbazangi,+ mbana ibabeja,+Mbana ibatayandi kumvwa mulawo* wa Jehova.+
10 Baambila basikubona zyakumbele kuti, ‘Amuleke kubona,’
Alimwi baambila basizilengaano kuti, ‘Mutatwaambili zilengaano zyamasimpe.+
Amutwaambile zintu zikondelezya;* amubone zilengaano zyakubeja.+
11 Amuzwe munzila; amuleye munzila.
Mutatwaambili limbi makani aajatikizya Uusalala wa Israyeli.’”+
12 Aboobo mboobu mbwaamba Uusalala wa Israyeli:
“Mbokunga mwaakaka majwi aaya,+Musyoma mukuunina bamwi amubumpelengeAlimwi musyoma zintu eezyi,+
13 Nkokuti cinyonyoono eeci ciyoomubeda mbuli bwaanda bwaandukide,Mbuli cibeela citali ciyumu cabwaanda bulamfwu iciyanda kuwa.
Cilawa akupwaika, kufwumbwa ciindi.
14 Ciyoopwaigwa mbuli mboipwaigwa nongo mpati yamubumbi,Ciyoopwaigwa cakumaninina cakuti akati katubeela-beela twancico takukacaali lukaye noluba lomweLwakuyokolweda mulilo kucikkoNaa kutesya maanzi mucizyiba.”*
15 Nkaambo mboobu mbwaamba Mwami Singuzuzyoonse Jehova, Uusalala wa Israyeli:
“Mwapiluka kulindime akulyookezya nomutiifwutulwe;Mulaba anguzu kufwumbwa buyo kuti mubatame akuba alusyomo.”+
Pele nywebo mwakakaka.+
16 Muciindi caboobo mwakaamba kuti: “Peepe, tulatija amabbiza!”
Masimpe muyootija.
Mwakati, “Tuyootanta mabbiza aajisi lubilo!”+
Masimpe, aabo bamutandaanya banooli basilubilo.+
17 Bantu bali 1,000 bayookankama akaambo kakukongwa amuntu omwe buyo;+Muyootija akaambo kakukongwa abantu bosanweKusikila limwi mukasyaale buyo mbuli kasamu atala aacilundu,Mbuli cikwankwani atala aakalundu.+
18 Pele Jehova ulalindila kakkazikide moyo* kuti amufwide luzyalo,+Eelyo ulanyamuka kuti amufwide luse.+
Nkaambo Jehova ngu Leza uubeteka kabotu.+
Balikkomene boonse aabo bamulangila.*+
19 Bantu baakukkala mu Ziyoni, mu Jerusalemu,+ yebo tokalili pe.+ Masimpe uyookufwida luzyalo mbwayakulimvwida buyo jwi lyako lyakulila kuti ugwasyigwe; mbwayakulimvwida buyo uyookuvwiila.+
20 Nokuba kuti Jehova uyoomupa cakulya camapenzi akumupa maanzi aakudyaamininwa,+ Mwiiyi wanu Mupati takayubi limbi pe, aboobo muyoomubona Mwiiyi wanu Mupati+ ameso aanu.
21 Aalo matwi aako ayoomvwa jwi kusyule lyako kaliti, “Njeeyi nzila.+ Amweende mulinjiyo,” ikuti naa mwasiya nzila yeelede akuunka kululyo naa kulumwensyi.+
22 Alimwi muyoosofwaazya nsiliva iiziluludwe azikozyanyo zyanu zibezedwe alimwi angolida iiziluludwe azikozyanyo zyanu zifwulidwe.+ Muyoozisowa mbuli cisani ncabelesya mukaintu uuli kumwezi akuzyaambila kuti, “Kamuyooko!”*+
23 Leza uyookupa mvwula yakumeneka mbuto zyako nzyosyanga munyika yako,+ alimwi cakulya cizwa munyika yako cinooli cinji kapati alimwi cinoojisi busani bunji.*+ Mubuzuba oobo, zivwubwa zyako ziyoocelela mumacelelo mapati.+
24 Azyalo ŋombe ambongolo izilima mumyuunda ziyoolya cakulya cabanyama cilungidwe kabotu, eeco cakapupululwa amafwosyolo alimwi amafwoloko aakupupuluzya.
25 Atala aamalundu oonse malamfwu alimwi aatala aatulundu toonse tusumpukide kuyooba tulonga atugelo twamaanzi,+ mubuzuba bwakujaya kupati eelyo ngazi noziyakuwa.
26 Alimwi mumuni wamwezi uuzulide uyooba mbuli mumuni wazuba; awalo mumuni wazuba uyakwiinda kumweka ziindi zili ciloba,+ uyooba mbuli mumuni wamazuba aali ciloba, mubuzuba oobo Jehova mbwayakwaanga zicisa* zyabantu bakwe+ alimwi akuponya zilonda zitaambiki nzyobakaba anzizyo akaambo kakuumwa anguwe.+
27 Amubone! Izina lya Jehova lilaboola kuzwa kubusena bwakulamfwu kapati,Lilavwilima abukali bwakwe alimwi liboola amakumbi mapati.
Milomo yakwe izwide bukali,Alimwi mulaka wakwe uli mbuli mulilo uumpa cakumaninina.+
28 Muuya* wakwe uli mbuli mulonga uupaide uusika mane munsingo,Kuti asebe masi ansefwa yalunyonyooko;*Alimwi mumyeebo yabantu munooli matomu+ aabapa kusweeka.
29 Pele lwiimbo lwanu lunooli mbuli loolo lwiimbwa masikuNomulibambila* pobwe,+Alimwi muyookondwa mumoyo mbuli muntuWeenda kumwi kalizya* muntoliloNali munzila kuunka kucilundu ca Jehova, ku Ndomba ya Israyeli.+
30 Jehova uyoopa kuti jwi lyakwe lipati limvwugwe+Alimwi uyootondezya janza lyakwe+ lyanguzu noliboola ansi abukali bupati,+Amabangabanga aamulilo uumpa cakumaninina,+Antoomwe amvwula mpati yamucobocobo,+ mvwula yaguwo alimwi acivwulamabwe.+
31 Akaambo kajwi lya Jehova, cisi ca Asuri ciyakuyoowa citaambiki;+Walo uyoocuuma amusako.+
32 Alimwi kufwumbwa ciindi Jehova nabelesya musako wakwe wacisubuloKukwibbaula cisi ca AsuriUyoocita oobo antoomwe ansakalala alimwi atuntimbwa+Eelyo navwukaula janza lyakwe akubauma munkondo.+
33 Nkaambo busena bwakwe bwa Tofeti*+ bwabambwa kale;Alimwi bubambilidwe mwami.+
Walampya akukomezya mulwi wankuni,Mulilo ankuni nzinji kapati.
Muya wa Jehova, uuli mbuli kalonga kasulufa,Nguuyoobudoneka.
Bupanduluzi buyungizyidwe
^ Mu Chihebrayo, “Ibatila bukoko,” kuboneka kuti icaambwa aawa nkupanga cizuminano.
^ Naa “kakunyina kubuzya makani kumulomo wangu.”
^ Mu Chihebrayo, “mumampangala aa Farao.”
^ Naa “anzoka zikali zisweemuka.”
^ Naa “malailile.”
^ Mu Chihebrayo, “ziteteete.”
^ Naa ambweni, “mumugoti.”
^ Naa “ulalangila.”
^ Naa “bamulindila caluyandisisyo.”
^ Naa ambweni, “akuzyaamba kuti matombe.”
^ Mu Chihebrayo, “cinoojisi mafwuta.”
^ Naa “kutyoka.”
^ Mu Chihebrayo, “ansefwa yabuyo.”
^ Naa “Muya.”
^ Naa “Nomulisalazya kuti mulibambile”
^ Naa “kweelana akulila kwa.”
^ Aawa bbala lyakuti “Tofeti” libelesyedwe munzila yacikozyanyo ikwaamba busena bwakuumpila, kwiiminina lunyonyooko.
