Isaya 7:1-25
7 Lino mumazuba aa Ahazi+ mwana wa Jotamu mwana wa Uziya mwami wa Juda, Mwami Rezini wa Siriya alimwi a Peka+ mwana wa Remaliya, imwami wa Israyeli, bakaboola kuzoolwana Jerusalemu, pele wakaalilwa* kuuzunda munzi.+
2 Aboobo kuŋanda ya Davida kwakasika mulumbe wakuti: “Siriya wamvwana kuti babelekele antoomwe a Efraimu.”
Eelyo moyo wa Ahazi amyoyo yabantu bakwe yakatalika kuduntaana kapati, mbuli mbwaayuntaana masamu aamusyokwe nowuunga muwo.
3 Mpoonya Jehova wakaambila Isaya kuti: “Kounka, yebo amwanaako Seari-jasubu*+ mukaswaangane a Ahazi, kumamanino aamufwolo* wacizyiba+ cili kutala kumugwagwa uutozya kumuunda wasikuwasya zisani.
4 Weelede kumwaambila kuti: ‘Kocenjela alimwi utakopani. Utayoowi, alimwi moyo wako utapengi akaambo kazisisi eezyi zyobilo zyuunta busi, akaambo kabukali bupati bwa Rezini a Siriya alimwi amwana wa Remaliya.+
5 Nkaambo Siriya antoomwe a Efraimu alimwi amwana wa Remaliya bakanzide kukulwana, kabati:
6 “Katuya tukalwane* cisi ca Juda tukacipwayaule* akucizunda kutegwa cibe cesu, alimwi atubikke mwana wa Tabeeli kuti abe mwami wancico.”+
7 “‘Mboobu mbwaamba Mwami Singuzuzyoonse Jehova:
“Tabakazwidilili pe,Alimwi tazikacitiki pe.
8 Nkaambo mutwe wa Siriya ngu Damasiko,Mpoonya mutwe wa Damasiko ngu Rezini.
Mumyaka iili buyo 65 Efraimu uyoopwayaulwa cakumaninina akutaba limbi musyobo wabantu.+
9 Mutwe wa Efraimu ngu Samariya,+Mpoonya mutwe wa Samariya, mwana wa Remaliya.+
Ccita kuti mube alusyomo luyumu,Tamukookkalilila pe.”’”
10 Jehova wakazumanana kwaambaula a Ahazi kuti:
11 “Kolomba citondezyo kuli Jehova Leza wako;+ kuyaansi cilakonzya kulampa mbuli Cuumbwe* naa kuya mujulu cilakonzya kulampa mbuli kujulu.”
12 Pele Ahazi wakati: “Tandikoolomba pe, alimwi tandikoomusunka Jehova.”
13 Mpoonya Isaya wakati: “Amuswiilile nywebo nobamuŋanda ya Davida. Sena tamunalema kunyemya bantu? Sena alimwi mweelede kunyemya Leza?+
14 Aboobo Jehova lwakwe ulamupa citondezyo: Amubone! Mukaintu uucili mwana* uyoomita akuzyala mwana musankwa,+ eelyo uyoomuulika zina lyakuti Imanueli.*+
15 Mwana ooyo unoolya buci amafwuta aazwa kumukupa* caakusika ciindi cakuti azyibe kukaka cibi akusala cibotu.
16 Nkaambo mulombe ooyo katanazyiba kukaka cibi akusala cibotu, inyika yabami bobilo aabo mboyoowa kapati inooli buyo matongo.+
17 Jehova uyoopa kuti yebo, bantu bako alimwi abamuŋanda yabauso musikilwe mazuba aatanabwenwe kuzwa ciindi Efraimu naakazanduka kuli Juda,+ nkaambo Leza uyooleta mwami wa Asuri.+
18 “Mubuzuba oobo Jehova uyoosibila nzinini zili kutulonga-longa twamulonga wa Nile waku Egepita tuli kule alimwi anzuki zili mucisi ca Asuri,
19 aboobo zyoonse ziyooboola akukkala mumajeleele aamakkuti* alimwi amuŋanzi zyamandomba amutusamu twamamvwa toonse amumasena oonse aajisi maanzi.
20 “Mubuzuba oobo, Jehova uyoogela mutwe aboya bwamumaulu kwiinda mukubelesya mbeli iibbadelelwa yakucooko ca Mulonga,* nkokuti kwiinda mukubelesya mwami wa Asuri,+ alimwi mbeli eeyo iyoocinyoola acalo cilezu.
21 “Mubuzuba oobo muntu uyoofwutula ŋombe yomwe mpwizi iitaningakomena yamubutanga alimwi ambelele zyobilo.
22 Aboobo akaambo kakuvwula kwamukupa, muntu ooyo uyoolya mafwuta aazwa kumukupa* nkaambo boonse aabo ibayoosyala mucisi bayoolya buci amafwuta aazwa kumukupa.
23 “Mubuzuba oobo, mumasena oonse imwakali misaansa iili 1,000 yuulwa mali aansiliva aali 1,000, muyooba buyo tusamu twamamvwa ansaku.
24 Bantu bayoosika ooko amivwi alimwi amata, nkaambo cisi coonse cinoozwide buyo tusamu twamamvwa ansaku.
25 Alimwi tokasiki afwaafwi amalundu oonse aakali kulimwa amaamba, akaambo kakuyoowa tusamu twamamvwa ansaku; ayakuba masena aakweembelela ŋombe alimwi aalyataukwa ambelele.”
Bupanduluzi buyungizyidwe
^ Naa ambweni, “bakaalilwa.”
^ Nkokwaamba kuti “Balikke Basyeede Mbabayoopiluka.”
^ Naa “aamugelo wamaanzi.”
^ Naa ambweni, “tukacikonge.”
^ Naa “tukadonkaule bwaanda bwancico.” Mu Chihebrayo, “kucaandula.”
^ Naa “Cikkalilo Cabafwu.” Amubone Bupanduluzi Bwamabala.
^ Naa “Musimbi.”
^ Nkokwaamba kuti “Leza Ulaandiswe.”
^ Bamwi baamba kuti “maumba.”
^ Naa “aatulonga.”
^ Nkokuti, Mulonga wa Firate.
^ Bamwi baamba kuti “maumba.”
