Marko 10:1-52
10 Kuzwa kooko wakanyamuka akuboola kuminyinza ya* Judaya mutala lya Jordano, alimwi makamu aabantu akamubunganina. Eelyo mbuli cilengwa, wakatalika alimwi kubayiisya.+
2 Lino ba Farisi bakaboola kabajisi makanze aakumusunka, aboobo bakamubuzya naa mwaalumi ulizumizyidwe kuleka mukaintu wakwe.+
3 Wakabaingula kuti: “Ino Musa wakamulailila buti?”
4 Bakati: “Musa wakazumizya kulemba lugwalo lwakumutanda akumuleka mukaintu.”+
5 Pele Jesu wakabaambila kuti: “Akaambo kakuyuma kwamyoyo yanu+ ncaakamulembela mulawo ooyu.+
6 Nokuba boobo, ikuzwa kumatalikilo ‘Leza wakalenga mwaalumi amukaintu.+
7 Akaambo kaceeci mwaalumi uyoosiya bausyi abanyina,+
8 eelyo aaba bobilo bayooba mubili* omwe,’+ nkokuti tabacili bobilo, pele baba mubili omwe.
9 Aboobo aabo Leza mbaaswaanganya kutabi muntu uubaandaanya.”+
10 Alimwi nobakali muŋanda, basikwiiya bakatalika kumubuzya makani aaya.
11 Wakabaambila kuti: “Kufwumbwa uuleka mukaintu wakwe akukwata umbi wacita bumambe+ alimwi wabisizya mukaintu wakwe mutaanzi,
12 alimwi ikuti mukaintu wazwa kumulumaakwe* akukwatwa kuluumbi, wacita bumambe.”+
13 Lino bantu bakatalika kumuletela bana basyoonto kuti abikke maanza aakwe alimbabo, pele basikwiiya bakabakalalila.+
14 Jesu naakabona boobo wakakalala akubaambila kuti: “Amubaleke bana baboole kulindime; mutabakasyi pe, nkaambo Bwami bwa Leza mbwabaabo bali mbuli baaba.+
15 Ncobeni ndimwaambila kuti, kufwumbwa uutatambuli Bwami bwa Leza mbuli mwana musyoonto, takanjili pe mulimbubo.”+
16 Eelyo wakababweza bana akubafwukatila alimwi wakatalika kubaleleka kwiinda mukubikka maanza alimbabo.+
17 Lino naakali kuyaabweenda, muntu umwi wakamubalikila akumufwugamina akumubuzya kuti: “Omwiiyi mubotu, ino ncinzi ncondeelede kucita kutegwa ndikajane buumi butamani?”+
18 Jesu wakamubuzya kuti: “Nkaambo nzi ncondaamba kuti omubotu? Taakwe mubotu ccita buyo Leza alikke.+
19 Tee uliizyi milawo yakuti: ‘Utajayi,+ utaciti bumambe,+ utabbi,+ utapi bumboni bwakubeja,+ utaunini,+ lemeka bauso abanyoko.’”+
20 Imwaalumi ooyo wakati kulinguwe: “Omwiiyi, eezyi zyoonse ndali kuzitobela kuzwa kubwana.”
21 Jesu wakamulanga akumuyanda, eelyo wakamwaambila kuti, “Kuli cintu comwe ncobulizyide: Koya ukasambale zintu nzyojisi akupa bacete, aboobo uyooba alubono kujulu; wamana uboole ube sikunditobela.”+
22 Pele mwaalumi ooyu naakamvwa bwiinguzi oobu wakausa akuunka katyompedwe, nkaambo wakajisi lubono lunji.+
23 Lino naakamana kubalanga bantu, Jesu wakaambila basikwiiya bakwe kuti: “Eelo kaka ciyooba cintu ciyumu kubantu bajisi mali kunjila mu Bwami bwa Leza!”+
24 Pele basikwiiya bakagambwa akaambo kamajwi ngaakaamba. Mpoonya Jesu wakabaambila kuti: “Nobana, eelo kaka nciyumu kunjila mu Bwami bwa Leza!
25 Ncuuba-uba kunkamela ikwiinda mukapulo kanyeleti kwiinda mbocibede kumuntu muvwubi kunjila mu Bwami bwa Leza.”+
26 Pele alimwi bakagambwa kapati akumubuzya kuti: “Ino nguni mubwini uukonzya kufwutuka?”+
27 Jesu wakabalangisya kumane wakati: “Kubantu tacikonzyeki pe, pele ikutali kuli Leza, nkaambo zintu zyoonse zilakonzyeka kuli Leza.”+
28 Petro wakatalika kumwaambila kuti: “Bona! Twasiya zintu zyoonse akutobela nduwe.”+
29 Jesu wakati: “Ncobeni ndimwaambila kuti, kunyina wakasiya ŋanda naa banabokwabo naa bacizyi bakwe naa banyina naa bausyi naa bana bakwe naa myuunda akaambo kandime alimwi akaambo kamakani mabotu+
30 uutakajani zintu ziyungizyidwe ziindi zili 100 muciindi cino—nkokuti maanda, banabokwabo, bacizyi, bamamama, bana alimwi amyuunda antoomwe akupenzyegwa+—eelyo mubweende bwazintu buboola,* ibuumi butamani.
31 Pele banji bakusaanguna bayooba bakumamanino, abaabo bakumamanino bayooba bakusaanguna.”+
32 Lino bakali munzila kabaunka ku Jerusalemu, Jesu nguwakali kusolola alimwi bakagambwa, pele aabo ibakali kumuccilila bakayoowa. Alimwi wakatola bali Kkumi Ababili kumbali akutalika kubaambila zintu eezyi izyakali afwaafwi kumucitikila, ulaamba:+
33 “Amubone! Tuunka ku Jerusalemu, eelyo Mwanaamuntu uyakwaabwa kuli basilutwe babapaizi abalembi. Bayoomupa mulandu wakuti ajaigwe akumwaaba kubantu bamasi,
34 alimwi aaba bayoomufwubaazya akumuswida mate, bayoomukwibbaula akumujaya, pele kwaakwiinda mazuba otatwe uyoobuka.”+
35 Lino Jakobo a Johane, ibana basankwa ba Zebedayo,+ bakaboola kulinguwe akumwaambila kuti: “Mwiiyi, tuyanda kuti utucitile kufwumbwa ncotutiikulombe.”+
36 Wakababuzya kuti: “Ncinzi ncomuyanda kuti ndimucitile?”
37 Bakaamba kuti: “Tulomba kuti waakulemekwa tukakkale umwi kujanza lyako lyalulyo, uumbi kujanza lyako lyalumwensyi.”+
38 Pele Jesu wakabaambila kuti: “Tamucizyi ncomulomba. Sena mulakonzya kunywa nkapu njondinywa naa kubbapatizyigwa alubbapatizyo ndondibbapatizyigwa mebo?”+
39 Bakati kulinguwe: “Tulakonzya.” Mpoonya Jesu wakabaambila kuti: “Nkapu njondinywa, muyakwiinywa, alubbapatizyo ndondibbapatizyigwa, muyoobbapatizyigwa.+
40 Pele kujatikizya makani aakukkala kujanza lyangu lyalulyo naa kujanza lyangu lyalumwensyi tandili ndime ndisala pe, pele masena aaya ngabaabo bakabambilwa ngawo.”
41 Lino aaba bambi bali kkumi nobakaamvwa makani aaya, bakabanyemena ba Jakobo a Johane.+
42 Pele Jesu wakabaita akubaambila kuti: “Mulizyi kuti aabo babonwa* kuti mbaleli bamasi balabadyaaminina bantu, alimwi bapati akati kabo balabeendelezya calunya.+
43 Oobu tabusyi mboceelede kuba akati kanu pe; pele kufwumbwa uuyanda kuba mupati akati kanu weelede kuba mubelesi wanu,+
44 alimwi kufwumbwa uuyanda kuba wakusaanguna akati kanu weelede kuba muzike waboonse.
45 Nkaambo naba Mwanaamuntu wakaboola, ikutali kuzoobelekelwa, pele kuzoobeleka+ akupa buumi bwakwe kuti bube cinunuzyo cakununuzya banji.”+
46 Mpoonya bakasika ku Jeriko. Pele ciindi walo abasikwiiya bakwe abantu bali mbobabede nobakali kuzwa mu Jeriko, Bartimeyu (imwana wa Timeyu) moofwu sikulombelela wakalikkede mumbali aanzila.+
47 Naakamvwa kuti ngu Jesu waku Nazareta, wakatalika koongolola akwaamba kuti: “Jesu, O Mwana wa Davida,+ kondifwida luse!”+
48 Mpoonya bantu banji bakatalika kumukalalila akumwaambila kuti aumune, pele walo wakazumanana koongololesya kati: “Akaka O Mwana wa Davida, kondifwida luse!”
49 Aboobo Jesu wakaima akwaamba kuti: “Kamundiitila nguwe.” Aboobo bakamwiita moofwu ooyu kabamwaambila kuti: “Kkazika moyo! Nyamuka; ulakwiita.”
50 Mpoonya wakacisowa cisani cakwe caatala, wasotoka akuunka kuli Jesu.
51 Mpoonya Jesu wakamubuzya kuti: “Ncinzi ncoyanda kuti ndikucitile?” Moofwu wakamwaambila kuti: “Rabboni,* ndilomba kuti nditalike kubona.”
52 Eelyo Jesu wakamwaambila kuti: “Koya. Lusyomo lwako lwakuponya.”+ Mpoonya aawo wakatalika kubona+ alimwi wakatalika kumutobela munzila.
Bupanduluzi buyungizyidwe
^ Naa “kumasena aayengelede.”
^ Naa “nyama.”
^ Naa “waleka mulumaakwe.”
^ Naa “kuciindi ciboola.” Amubone Bupanduluzi Bwamabala.
^ Naa “aabo bazyibidwe.”
^ Nkokwaamba kuti “Mwiiyi.”
