Marko 14:1-72
-
Bapaizi bapangana kuti bamujaye Jesu (1, 2)
-
Jesu watilwa mafwuta aanunkilila (3-9)
-
Judasi waaba Jesu (10, 11)
-
Pobwe Lyakwiindilila lyamamanino (12-21)
-
Kutalisyigwa kwa Mulalilo wa Mwami (22-26)
-
Businsimi bwakuti Petro ulamukaka Jesu (27-31)
-
Jesu ulapaila mu Getesemane (32-42)
-
Jesu waangwa (43-52)
-
Kubetekwa kumbele lya Nkuta Mpati Yaba Juda (53-65)
-
Petro wamukaka Jesu (66-72)
14 Lino kwakasyeede mazuba obilo+ kuti kucitwe Pobwe Lyakwiindilila+ a Pobwe lya Zinkwa Zitajisi Bumena.+ Basilutwe babapaizi abalembi bakali kuyandaula nzila yakuti bamujate* cabucenjezu akumujaya;+
2 nkaambo bakali kwaamba kuti: “Ikutali ciindi capobwe; ambweni bantu inga baakubusya manyongwe.”
3 Lino naakali ku Betaniya kalya* muŋanda ya Simoni sicinsenda, kwakaboola mukaintu wakajisi nsazi yamafwuta aanunkilila, aategwa nardo. Eeyi yakali nardo iini-ini, iidula kapati. Wakajalula nsazi akutalika kumutila mafwuta amutwe.+
4 Babone boobo, ibamwi bakanyema akulyaambauzya mulicabo kuti: “Nkaambo nzi ncaanyonyoonwa mafwuta aanunkilila aaya?
5 Nkaambo mafwuta aaya aanunkilila naasambalwa madinari* aainda ku 300 akupa mali aayo kubacete!” Wakabacima* kapati mukaintu ooyu.
6 Pele Jesu wakati: “Amumuleke. Ino mumupenzyela nzi? Wandicitila cintu cibotu.+
7 Nkaambo bacete munooli limwi lyoonse,+ alimwi inga mwabacitila zibotu kufwumbwa mpomwayandila, pele mebo tamunooli andime lyoonse pe.+
8 Wacita mbwakonzya; waunanikila limwi mafwuta aanunkilila mubili wangu kuti ukazikkwe kabotu.+
9 Ncobeni ndimwaambila kuti, kufwumbwa makani mabotu aaya nkwaayookambaukwa munyika yoonse,+ ncaacita mukaintu ooyu acalo ciyakwaambwa mukwiibaluka nguwe.”+
10 Aboobo Judasi Isikariote, umwi wabali Kkumi Ababili, wakaunka kuli basilutwe babapaizi kutegwa akamwaabe kulimbabo.+
11 Bamvwe makani aaya, bakakondwa akumusyomezya kumupa mali aansiliva.+ Aboobo wakatalika kuyandaula ciindi cakumwaaba.
12 Lino mubuzuba bwakusaanguna bwa Zinkwa Zitajisi Bumena,+ ciindi nobakajisi cilengwa cakupaizya cipaizyo ca Pobwe Lyakwiindilila,+ basikwiiya bakwe bakamubuzya kuti: “Ino nkuli nkoyanda kuti tukubambile kutegwa ukalide nkuko Pobwe Lyakwiindilila?”+
13 Aboobo wakatuma basikwiiya bakwe bobilo akubaambila kuti: “Kamuya mumunzi, mulayaanya muntu uunyamwide nongo yamaanzi. Mumutobele,+
14 eelyo kufwumbwa mwayoonjila, mukamwaambile mwiniŋanda kuti, ‘Mwiiyi ubuzya kuti: “Ino ili kuli ŋanda yabeenzu mondikonzya kulida Pobwe Lyakwiindilila abasikwiiya bangu?”’
15 Uyoomutondezya ŋanda mpati yamujulu, iibambidwe kabotu alimwi iijisi zintu zyoonse ziyandika. Oomo amukatubambile.”
16 Aboobo basikwiiya bakaunka akunjila mumunzi akujana zintu mbubonya mbwaakabaambila, mpoonya bakalibambila Pobwe Lyakwiindilila.
17 Nokwakaba kumangolezya, wakaboola abali Kkumi Ababili.+
18 Eelyo nobakakkede kutebulu kabalya, Jesu wakati: “Ncobeni ndimwaambila kuti, umwi akati kanu ngondilya limwi, ulandaaba.”+
19 Bakausa, aboobo aumwi wakatalika kumubuzya kuti: “Sena ndime?”
20 Wakabaambila kuti: “Ngumwi wabali Kkumi Ababili ngotulya limwi mumutiba omwe.+
21 Nkaambo Mwanaamuntu ulamusiya nyoonse, mbubonya mbokulembedwe kujatikizya nguwe, pele maawe kumuntu ooyo iwaaba Mwanaamuntu!+ Nocakainda kubota ikuti muntu ooyo naatakazyalwa buyo.”+
22 Lino nobakacili kulya, wakabweza mukamu, wakalumba, wakaukomauna, wakabapa akwaamba kuti: “Amulye; eeci ciiminina mubili wangu.”+
23 Kumane wakabweza nkapu, wakalumba akubapa, mpoonya boonse bakanywa mulinjiyo.+
24 Eelyo wakabaambila kuti: “Eeci ciiminina ‘bulowa+ bwangu bwacizuminano,’+ ibuyootilwa akaambo kabanji.+
25 Ncobeni ndimwaambila kuti, tandikanywi kabili cakunywa cili coonse cizwa kumusaansa kusikila buzuba oobo mbondiyoonywa waini mupya mu Bwami bwa Leza.”
26 Mpoonya nobakamana kwiimba nyimbo zyakutembaula* Leza, bakaunka ku Cilundu ca Maolifa.+
27 Jesu wakati kulimbabo: “Nywebo nyoonse mulalebwa, nkaambo kulilembedwe kuti: ‘Ndiyoomuuma mweembezi,+ eelyo mbelele ziyoomwaika.’+
28 Pele ndaakubusyigwa, ndiyoosika ku Galilaya+ nywebo kamutanasika.”
29 Pele Petro wakati kulinguwe: “Nokuba kuti boonse aaba balebwa, mebo tandikoolebwa pe.”+
30 Aboobo Jesu wakamwaambila kuti: “Ncobeni ndikwaambila kuti sunu, inzya masiku ngoonya aaya, mukombwe katanalila ziindi zyobilo, ulandikaka ziindi zyotatwe.”+
31 Pele cakusinizya wakazumanana kwaamba kuti: “Nokuba kuti caamba kufwa anduwe, kunyina nonditiikukake pe.” Mpoonya boonse bamwi bakatalika kwaamba mbubonya.+
32 Aboobo bakasika kubusena butegwa Getesemane, eelyo wakaambila basikwiiya bakwe kuti: “Amukkale aano nondipaila.”+
33 Wakatolelezya Petro, Jakobo alimwi a Johane,+ eelyo wakausa akupenga kapati mumoyo.
34 Wakabaambila kuti: “Ndapenga kapati mumoyo cakuti inga ndafwa.+ Amukkale aano, mulinde.”+
35 Kumane naakeenda aniini kuyaambele, wakavwuntama ansi akutalika kupaila kuti nocali kukonzyeka, ciindi eeci citamusikili.
36 Kumane wakati: “Abba,* Taata,+ zintu zyoonse zilakonzyeka kulinduwe; koigusya nkapu eeyi kulindime. Pele kutabi kuyanda kwangu, akube kuyanda kwako.”+
37 Wakajokela akubajana baloona, mpoonya wakabuzya Petro kuti: “Simoni, sena uloona? Sena tonooli kukonzya kuliyumya akulinda kwawoola lyomwe?+
38 Amulinde akuzumanana kupaila, kutegwa mutanjili mumasunko.+ Moyo ncobeni ulapya* pele mubili unyina nguzu.”+
39 Mpoonya wakaunka alimwi kuyoopaila kaamba kaambo nkamunya.+
40 Wakaboola alimwi akubajana baloona, nkaambo meso aabo akalilemede, aboobo bakabula cakumuvwiila.
41 Alimwi wakaboola ciindi catatu akubaambila kuti: “Aciindi mbuli ceeci, muloona akulyookezya! Mbubo! Ciindi casika!+ Amubone! Mwanaamuntu waabwa mumaanza aabasizibi.
42 Amunyamuke, atweende. Amubone! Sikundaaba wasika afwaafwi.”+
43 Mpoonya naakacili kwaambaula, Judasi, umwi wabali Kkumi Ababili, wakasika ankamu yabantu kabajisi mapanga ankoli, ibakatumwa kuzwa kuli basilutwe babapaizi, balembi alimwi abaalu.+
44 Lino sikumwaaba wakabapede citondezyo ncobakamvwana cakuti: “Kufwumbwa ngondiyoomyonta, ngonguwe ooyo; amukamujate akumutola, atakamutiji pe.”
45 Aboobo wakaboola kuli Jesu akwaamba kuti, “Rabbi!” Mpoonya wakamumyonta.
46 Aboobo bakamujata akumwaanga.
47 Pele umwi wabaabo ibakaliko wakasomona panga lyakwe akuuma muzike wamupaizi mupati akumukosola kutwi.+
48 Pele Jesu wakabaambila kuti: “Nkaambo nzi ncomwaboola kuti mundijate amapanga alimwi ankoli mbuli kuti muboola kuzoojata mubbi?+
49 Buzuba abuzuba ndakali andinywe mutempele kandiyiisya,+ pele tiimwakandijata pe. Pele caba boobu kutegwa Magwalo azuzikizyigwe.”+
50 Lino boonse bakamusiya akutija.+
51 Pele mulombwana umwi iwakasamide buyo cisani cibotu cuuba-uba wakatalika kumutobela munsi, mpoonya bakasoleka kuti bamujate,
52 pele wakasiya cisani cakwe akutija amantanda.*
53 Lino Jesu bakamutola kumupaizi mupati,+ alimwi boonse basilutwe babapaizi abaalu abalembi bakabungana.+
54 Pele Petro, wakali kumutobela alaale kusikila mulubuwa lwamupaizi mupati; eelyo wakalikkede antoomwe ababelesi bamuŋanda kayota mulilo iwakali kuvwilima.+
55 Lino basilutwe babapaizi a Nkuta Mpati Yaba Juda yoonse, bakali kuyandaula kaambo kakumubejekezya Jesu kutegwa bamujaye, pele kunyina nkobakali kujana.+
56 Ncobeni bantu banji bakali kumubejekezya,+ pele twaambo twabo tiitwakali kweendelana.
57 Alimwi abamwi bakali kunyamuka akumubejekezya kabati:
58 “Twakamumvwa kaamba kuti, ‘Ndiyoomwaya tempele eeli lyakayakwa amaanza, alimwi mumazuba otatwe ndiyooyaka limbi litayakwi amaanza.’”+
59 Pele nomuba mukaambo aaka, bumboni bwabo tiibwakeendelana pe.
60 Mpoonya mupaizi mupati wakaimikila akati kabo akubuzya Jesu kuti: “Sena toinguli? Ino ncinzi bantu aaba ncobakutamikizya?”+
61 Pele wakaumwine buyo, kunyina ncaakaingula.+ Alimwi mupaizi mupati wakatalika kumwaambauzya akumubuzya kuti: “Sena nduwe Kristo Mwana wa Yooyo Uutembaulwa?”
62 Mpoonya Jesu wakati: “Inzya ndime; alimwi nywebo muyoobona Mwanaamuntu+ kakkede kujanza lyalulyo+ lyanguzu alimwi kaboola amakumbi aakujulu.”+
63 Amvwe boobo mupaizi mupati wakazapula zisani zyakwe akwaamba kuti: “Sena tuciyandika bakamboni abambi?+
64 Mwalimvwida kasampaula Leza. Ino muyeeya buti nywebo?” Boonse bakazumina kuti apegwe mulandu wakujaigwa.+
65 Kumane bamwi bakatalika kumuswida mate,+ kumuvwumba kumeso, kumuuma mfwaindi alimwi akumwaambila kuti: “Ikuti koli musinsimi, kotwaambila wakuuma!” Mpoonya nobakamana kumuuma mbayi kumeso, bakapaso bakamutola.+
66 Lino Petro naakacili mulubuwa, umwi wabasimbi babelesi bamupaizi mupati wakasika.+
67 Naakamubona Petro kayota mulilo, wakamulangisya akwaamba kuti: “Ayebo mwakali limwi amu Nazareta ooyu Jesu.”
68 Pele wakakaka kati: “Tandimuzyi alimwi tandicizyi ncoamba,” mpoonya wakaunka anze kumanjililo.*
69 Ooko mubelesi musimbi wakamubona, eelyo alimwi wakatalika kwaambila baabo bakaimvwi waawo kuti: “Ooyu ngumwi wabo.”
70 Alimwi wakaakazya makani aayo. Kwiinde kaindi kaniini, aabo bakaimvwi waawo alimwi bakatalika kwaambila Petro kuti: “Masimpe yebo uli umwi wabo, nkaambo uli muna Galilaya.”
71 Pele wakatalika kulisinganya akukonka kati: “Tandimuzyi pe muntu ooyu ngomwaamba!”
72 Mpoonya aawo mukombwe wakalila lwabili,+ eelyo Petro wakaayeeya majwi Jesu ngaakamwaambila aakuti: “Mukombwe katanalila ziindi zyobilo, ulandikaka ziindi zyotatwe.”+ Mpoonya wakausa akutalika kulila.
Bupanduluzi buyungizyidwe
^ Naa “bamwaange.”
^ Naa “kakkede kutebulu.”
^ Amubone Makani Aayungizyidwe B14.
^ Naa “Bakamwaambauda; Bakamubwentela.”
^ Naa “ntembauzyo kuli.”
^ Eeli ndibbala lya Chiaramu, nkokwaamba kuti “O Taata!”
^ Naa “uliyandide.”
^ Naa “katasamide bukkwene; kasamide buyo cisani camukati.”
^ Naa “kukaanda kakumanjililo.”
