Milimo 5:1-42
5 Pele mwaalumi umwi uutegwa Hananiya antoomwe amukaintu wakwe Safira, bakasambala lubono lumwi ndobakajisi.
2 Pele wakasisa mali amwi aakajanwa, imukaintu wakwe awalo wakalizyi, eelyo wakaleta buyo mali amwi akwaapa baapostolo.+
3 Pele Petro wakati: “Hananiya, nkaambo nzi ncowalekela Saatani kuti ayendelezye moyo wako kuti ucenge+ muuya uusalala+ alimwi akusisa mali amwi aamuulo wamuunda?
4 Sena kotanausambala muunda tiiwakali wako? Alimwi nookausambala sena mali aakajanwa tanaakacili aako? Ino nkaambo nzi ncooyeeya kucita cintu cili boobu mumoyo wako? Lino tonoocenga bantu pe, pele wabeja kuli Leza.”
5 Naakamvwa majwi aaya, Hananiya wakawa muzinga akufwa. Eelyo boonse ibakamvwa makani aaya bakayoowa kapati.
6 Mpoonya balombwana bakanyamuka, bamuvwungaila mumilembo, bamane bakamutola anze akuyoomuzikka.
7 Lino nokwakainda mawoola aatandila kuli otatwe mukaintu wakwe wakaboola akunjila, katazyi cakacitikide.
8 Petro wakati kulinguwe: “Kondaambila, sena aaya ngamali alikke yebo amulumaako ngomwakajana nomwakasambala muunda wanu?” Wakati: “Inzya, ngangawo.”
9 Aboobo Petro wakati kulinguwe: “Nkaambo nzi nywebo nyobilo ncomwakapangana kusunka muuya wa Jehova?* Bona! Imaulu aabaabo bazikka mulumaako ali amulyango, eelyo ayebo balakutola anze.”
10 Mpoonya aawo wakawa muzinga kumaulu aa Petro akufwa. Ibalombwana nobakanjila, bakajana wafwa kale, eelyo bakamutola anze akuyoomuzikka kumbali aamulumaakwe.
11 Aboobo mbungano yoonse alimwi abaabo boonse ibakamvwa makani aaya bakayoowa kapati.
12 Kunze lyaboobo, kwiinda mumaanza aabaapostolo izitondezyo azintu zigambya zinji zyakazumanana kucitika akati kabantu;+ alimwi boonse bakali kubungana antoomwe mu Kkoce lya Solomoni.+
13 Masimpe, kunyina muntu umbi uutali umwi wabo iwakaba abusicamba bwakubasangana; nokuba boobo, bantu bakali kubalumbaizya.
14 Alimwi bantu ibasyoma Mwami bakazumanana kuyungizyigwa, makamu-makamu aabaalumi alimwi abamakaintu.+
15 Mane bakali kutola baciswa mumigwagwa akubalazika aatulo alimwi aamacila, ikutegwa Petro anakwiinda, ambweni icinzimweemwe buyo cakwe inga cabaguma bamwi akati kabo.+
16 Alimwi makamu-makamu aabantu ibazwa muminzi yeengelede Jerusalemu bakazumanana kuboola, kabajisi bantu baciswa abaabo bakali kupenzyegwa amyuuya iisofweede, eelyo boonse bakali kuponesyegwa.
17 Pele mupaizi mupati aboonse bakali anguwe, ibakali bankamu yabukombi yaba Saduki, bakanyamuka kabazwide munyono.
18 Eelyo bakajata baapostolo akubabikka muntolongo yabuleya.+
19 Pele masiku, mungelo wa Jehova* wakajalula milyango yantolongo,+ wakabagusya anze akwaamba kuti:
20 “Kamuya, mukaime mutempele, muzumanane kwaambila bantu makani oonse aajatikizya buumi oobu.”
21 Nobakamvwa boobo bakanjila mutempele mafwumofwumo akutalika kuyiisya.
Lino mupaizi mupati abaabo mbaakali limwi nobakasika, bakabunganya Nkuta Mpati Yaba Juda antoomwe alimwi ankamu yoonse yabaalu babana Israyeli, eelyo bakatuma bakapaso kuyoobaletela baapostolo kuzwa muntolongo.
22 Pele bakapaso nobakasika ooko tiibakabajana muntolongo. Aboobo bakapiluka akuzikwaamba
23 kuti: “Twaakujana ntolongo ilijalidwe akukkiigwa kabotu, alimwi balindizi baliimvwi amilyango, pele nitwajalula twajana kunyina muntu mukati.”
24 Lino silutwe wabalindizi baatempele abasilutwe babapaizi nobakamvwa majwi aaya, bakamaninwa maano kujatikizya cakali kunoocitika.
25 Pele muntu umwi wakaboola akubaambila kuti: “Amubone! Ibaalumi mbomwakabikka muntolongo bali mutempele, baliimvwi bayiisya bantu.”
26 Mpoonya silutwe abakapaso bakwe bakaunka baakubaleta, pele bakabaleta kakunyina kubalwana, nkaambo bakali kuyoowa kuti bantu balabapwaya mabwe.+
27 Aboobo bakabaleta akubaimika kumbele lya Nkuta Mpati Yaba Juda. Mpoonya mupaizi mupati wakababuzya
28 akubaambila kuti: “Twakamulailila cakusinizya kuti mutazumanani kuyiisya muzina eeli,+ pele lino amubone! Mwazuzya Jerusalemu yoonse anjiisyo zyanu, alimwi mukanzide kutuletela mulandu wabulowa bwamuntu ooyu.”+
29 Petro abaapostolo bambi bakaingula kuti: “Tweelede kumvwida Leza mbwali mweendelezi kutali bantu.+
30 Leza wabamatata wakamubusya Jesu ngomwakajaya kwiinda mukumugagaila aacisamu.+
31 Leza wakamusumpula ooyu kujanza lyakwe lyalulyo+ kuti abe Musololi Mupati+ alimwi Mufwutuli,+ kutegwa ba Israyeli abape kweempwa akulekelelwa zibi.+
32 Alimwi tuli bakamboni kumakani aaya,+ swebo antoomwe amuuya uusalala+ ooyo Leza ngwapa baabo bamumvwida mbwali mweendelezi.”
33 Nobakamvwa majwi aaya, bakanyema kapati* alimwi bakali kuyanda kubajaya.
34 Pele mu Farisi umwi uutegwa Gamaliyeli+ wakanyamuka mu Nkuta Mpati Yaba Juda; wakali mwiiyi wa Mulawo iwakali kulemekwa kapati abantu boonse, eelyo wakalailila kuti babagusye anze baalumi aabo kwakaindi kasyoonto.
35 Mpoonya wakabaambila kuti: “Nobaalumi bamu Israyeli, amucenjele kapati kujatikizya ncomuyanda kubacita baalumi aaba.
36 Mucikozyanyo, kumazuba aamusyule kwakabuka Teuda, iwakali kulidunda kuti muntu mupati, alimwi munkamu yakwe mwakanjila bantu banji ibabalilwa ku 400. Pele wakajaigwa, alimwi boonse aabo ibakali kumutobela bakamwaika akuloba.
37 Kuzwa yooyu, kwakabuka Judasi muna Galilaya kumazuba aakulembwa kwabantu, alimwi wakakwela bantu kuti bamutobele. Pele muntu ooyo awalo wakafwa alimwi boonse aabo ibakali kumutobela bakamwaika.
38 Aboobo mumakani aaya ngotujisi lino, ndimwaambila kuti, kutabi ncomucita kubaalumi aaba, pele amubaleke buyo. Nkaambo ikuti makanze aaya naa mulimo ooyu uzwa kubantu, taukazwidilili;
39 pele ikuti kauzwa kuli Leza, tamukookonzya kuulesya.+ Buyo-buyo, mulaile kulijana kuti mulwana Leza.”+
40 Nobakamvwa boobo bakamumvwida, alimwi bakaita baapostolo, babakwibbaula*+ akubalailila kuti baleke kwaamba muzina lya Jesu, mpoonya bakabaleka baunka.
41 Aboobo bakazwa kumbele lya Nkuta Mpati Yaba Juda, kabakkomene+ nkaambo bakajanwa kuti baleelela kusampaulwa akaambo kazina lyakwe.
42 Alimwi buzuba abuzuba bakazumanana cakutaleka kuyiisya akwaambilizya makani mabotu aajatikizya Kristo Jesu+ mutempele akuŋanda aŋanda.+
Bupanduluzi buyungizyidwe
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “myoyo yabo yakacisa kapati.”
^ Naa “babauma.”
