Bakamboni ba Jehova tabayandiki buya kulilembya kumulawo kutegwa bacite milimo yabo yabukombi. Nokuba boobo, kulilembya kumulawo kutugwasya kuti tuliyakile naa kutelela maanda aakubunganina alimwi akunjizya mabbuku eesu aamba zyabukombi mucisi cimwi acimwi.

• Mu 2004, nkuta zyaku Russia zyakajala mbunga yamumulawo iibelesyegwa a Bakamboni ba Jehova mu Moscow. Eeci cakapa kuti bakwesu mu Moscow batalike kupenzyegwa kapati. Bamapulisa bakatalika kubapenzya, bantu bamwi bakatalika kubalwaana ciindi nobakali kukambauka kubuleya alimwi bamukamwini masena mobakali kuswaanganina bakwesu bakazijaya zizuminano nzyobakapangene zyakutelela masena aayo, calo icakapa kuti bakwesu babule kwakuswaanganina akukombela. Mulubeta lwamu 2010, nkuta ya European Court of Human Rights (ECHR) yakacisalazya  kwaamba kuti cisi ca Russia cakatyola mulawo uubapa lwaanguluko Bakamboni ba Jehova mu Moscow alimwi yakalailila kuti mbunga yabo yamumulawo izumanane kubeleka. Tulikkomene kumuzyibya kuti mu May 27, 2015, cibeela camu Moscow camutabi uulanganya zyamilawo icitegwa Russian Federation Ministry of Justice cakalemba mbunga mpya yamumulawo ya Bakamboni ba Jehova mu Moscow.

Bunji bwaziindi, imbunga zyamumulawo izibelesyegwa a Bakamboni ba Jehova nyika yoonse mboizulwa taziteli pe, mbubonya buyo mbuli mbunga zimbi zyabukombi alimwi azyeezyo zitajani mpindu. Pele zimwi ziindi mfwulumende zilakaka kutubona kuti tuli mbunga zitayandiki kutela mitelo.

• Mucisi ca Sweden, mfwulumende yaamba kuti Bbeteli nikkampani iibanjizya mulimo bamukwasyi wa Bbeteli, ikutali mukwasyi wababelesi baciindi coonse ibacita mulimo waalubazu wabukombi. Cisi cibweza mali manji aamitelo aa Bbeteli alimwi akubakwesu babelekela ku Bbeteli. Kutegwa balanganye kaambo aaka, Bakamboni ba Jehova ku Sweden bakatola matongoosi aabo kunkuta zyamucisi nciconya alimwi bakalembela nkuta ya ECHR magwalo aaindene-indene aali cisambomwe.

Bantu ba Jehova balautobela cakulomya mulawo wamu Bbaibbele ‘wakufwula mapanga aabo kuba maamba aakulimya’ alimwi ‘akutaiya limbi nkondo.’ (Is. 2:4) Bakanzide kutatola lubazu mutwaambo twacisi amunkondo nokuba kuti mfwulumende zimwi tazibikkide bubambe bwakucita milimo imbi iitali yabusikalumamba.

• Milawo yamucisi ca South Korea iiliko lino tiizumizyi bantu kukaka mulimo wabusikalumamba akaambo kamanjezyeezya aabo. Mumyaka iili 60 yainda, Bakamboni baalumi ibainda ku 18,000 baangwa akaambo kakukaka mulimo wabusikalumamba. Bunji bwa Bakamboni mucisi eeci bajisi mulongwe naa wamumukwasyi iwakaangwa. Mu 2004 amu 2011, nkuta ya Constitutional Court of South Korea yakaamba kuti kwaangwa ooku kuleendelana amulawo wacisi. Nokuba boobo, mu July 2015, Nkuta eeyi yakakkala abanamaleya  kutegwa yaalange-lange alimwi makani aaya. Bakamboni ba Jehova nyika yoonse mboizulwa bapailila kuti makani aaya aatola ciindi cilamfwu akosolwe kabotu kutegwa bakwesu bakubusi mucisi ca South Korea batazumanani kwaangwa akaambo kalusyomo lwabo.

• Bakamboni ba Jehova botatwe mucisi ca Eritrea batalika mwaka wanamba 22 kabaangidwe akaambo kakukaka mulimo wabusikalumamba kweelana amanjezyeezya aabo. Ba Paulos Eyassu, ba Negede Teklemariam, aba Isaac Mogos tabanabetekwa naa kupegwa coolwe cakuliiminina beni munkuta. Antoomwe abambi bakwesu abacizyi ibali 50, balazumanana kusyomeka nokuba kuti balapenzyegwa alimwi bali mubukkale bwamuntolongo bubi kapati. Tulaalusyomo lwakuti Jehova ‘ulakumvwa kutongela’ kwabaabo baangidwe akaambo kalusyomo lwabo alimwi uyakubweza ntaamu yakubagwasya.—Int. 79:11.

• Mucisi ca Ukraine, ba Vitaliy Shalaiko bakabaita mu August 2014 kuti banjile mulimo wabusikalumamba ciindi nokwakali kulibunga-bunga kulibambila kulwana nkondo. Mbwaanga manjezyeezya aabo tanaakali kubazumizya kunjila mulimo ooyu, bakakaka, pele bakaamba kuti balakonzya kubeleka mulimo umbi uutali wabusikalumamba. Loya wamfwulumende wakamupa mulandu Mukwesu Shalaiko iwakukaka kunjila mulimo wabusikalumamba, pele nkuta iyakamubeteka alimwi amunkuta yaapiilu  tiibakamujanina mulandu uuli woonse. Nkuta yaapiilu yakaamba kuti ikusola kukwabilila Cisi inga takali kaambo nsini ikakonzya kupa kuti muntu anyangwe lwaanguluko ndwapedwe, akuti “kukaka kunjila mulimo wabusikalumamba akaambo kamanjezyeezya takubikki cisi muntenda pe.” Loya wamfwulumende wakacita apiilu alimwi. Mu June 23,  2015, nkuta mpati iilanganya twaambo tupati iitegwa High Specialized Court of Ukraine for Civil and Criminal Cases yakatobela mbozyakaakosola makani nkuta zisyoonto. Aboobo yakaasinizya makani aakuti kukaka mulimo wabusikalumamba akaambo kamanjezyeezya alimwi akwaanguluka kucita mulimo uutali wabusikalumamba kweelede kutobelwa nomuba muciindi camanyongwe mucisi.

Kujatikizya mbwaakakosolwa munzila iili kabotu makani, Mukwesu Shalaiko waamba kuti: “Akandiyumya majwi aali kulugwalo lwa Jeremiya 1:19. Ndakalilibambilide kufwumbwa mbwaakali kuyookosolwa makani, icintu cakali kuyandika kapati nkusyomeka kuli Jehova. Ndilaalusyomo lwakuti takandilekelezyi pe pele uyoondipa nguzu kutegwa ndizumanane kusyomeka. Nokuba boobo, makani akakosolwa munzila njindatakali kulangila. Ziindi zyoonse zyotatwe nondakali munkuta ndakajanwa kuti ndinyina mulandu. Alimwi ciindi coonse nondakali kubetekwa, ndakali kulimvwa kuti bakwesu bakalaandime. Tiindakalimvwa kuti ndalekelezyegwa pe.”

Mapobwe aacisi aleta buyumuyumu ku Banakristo caboola kumakani aakutatola lubazu mulingawo. Kwaambisya bakubusi balasunkwa kuleka kusyomeka kuli Jehova, mbwaanga bamayi balakonzya kusinikizya basicikolo kwiimba lwiimbo lwacisi naa kusalyuuta ndembela.

• Mu Cilikiti ca Karongi mucisi ca Rwanda, bamayi bakabapa mulandu basicikolo bali mbobabede Bakamboni wakutalemeka lwiimbo lwacisi akaambo kakuti bakali kukaka kulwiimba. Basicikolo aabo bakatandwa cikolo alimwi mane bakaangwa buya. Mu November 28, 2014, nkuta yaku Karongi iitola twaambo kunkuta mpati yakaamba kuti basicikolo bakanyina mulandu alimwi yakakosola kuti kukaka kwiimba lwiimbo lwacisi takuli kubula bulemu pe. Amwalo mumasi aambi aamu Africa mbuli Camaroon, Democratic Republic of Congo, Equatorial Guinea, alimwi a Malawi, basicikolo Bakamboni  bajana buyumuyumu mumakani ngoonya aaya alimwi zimwi ziindi abalo bakatandwa cikolo. Bakwesu muzisi eezyi basola kwaambila balupati-pati mumfwulumende alimwi abamayi kujatikizya kutatola lubazu kwa Bakamboni ba Jehova.

• Mu December 2013, cikolo cimwi cabuleya ku Lepaera, mucisi ca Honduras, cakakaka kubapa madipuloma aakumanizya cikolo cakusekondali basicikolo bobilo Bakamboni akaambo kakuti bakakaka kwiimba lwiimbo lwacisi akwaamba caambyo cakulemeka ndembela. Kutegwa bamane penzi eeli, baloya bobilo Bakamboni ba Jehova bakaswaangana amwiiminizi wamutabi walwiiyo akumutondezya mbwaakakosolwa munkuta makani aayo muzisi zimbi izinyina penzi anzyobasyoma basicikolo Bakamboni. Mwiiminizi wamfwulumende ooyo wakali amoyo mubotu alimwi wakazumina kuti basicikolo abazyali babo balembe twaambo akututola kunkumenkume iilanganya zyamilawo mumutabi weendelezya lwiiyo mucisi ca Honduras. Mu July 29, 2014, nkumenkume eeyo noyakamana kulanga matongoosi aabo, yakalailila kuti lwiiyo “lweelede kupegwa kubantu [boonse] kakunyina kusalulula” alimwi akuti basicikolo Bakamboni bapegwe madipuloma aabo.

Mucisi cili coonse, swebo Bakamboni ba Jehova, tutobela mulawo wa Jesu wakwaambila basimukoboma makani mabotu aa Bwami, kuswaangana antoomwe abasyomima kutegwa tukombe, alimwi  akwiiya Jwi lya Leza ciindi coonse. Kuyungizya waawo, tulaulemeka kapati mulawo wamu Bbaibbele wakuti tuyiisye bana besu milawo ya Jehova alimwi ‘akutantamuka bulowa.’ (Mil. 15:20; Dt. 6:5-7) Zimwi ziindi, kutobela milawo eeyi kutupa kuteendelana abalupati-pati bamumfwulumende aabo ibatamvwisyi nzyotusyoma.

• Mucooko ca Florida, mucisi ca U.S.A., mubetesi wamunkuta wakapa muzyali umwi mukaintu uutali Kamboni nguzu zyoonse zyakubayiisya makani aabukombi bana bakwe botatwe. Bausyi bana aaba Bakamboni bakalaililwa kuti batanikuyiisyi bana babo njiisyo zyabukombi zili zyoonse izikazyanya anzyobasyoma ba Katolika. Bausyi bana bakacita apiilu, eelyo mu August 18, 2014, nkuta yaapiilu yakazikazya nzyoyakalesyede nkuta nsyoonto. Kaitobela nzila iigaminide mbwaakali kukosolwa makani musyule, nkuta yakalemba kuti: “Ciindi coonse nkuta yali kumuzumizya muzyali uutapedwe nguzu zyakulela mwana ikuyiisya mwanaakwe makani aabukombi ngasyoma ikuti kakunyina bumboni busalede bwakuti makani aayo aabukombi alakonzya kumunyonyoona mwana.”

  Kweelana ambwaakakosolwa makani, ciindi coonse bana balaangulukide kwiiya alimwi akutobela njiisyo zya Jehova Leza izigwasya. Boonse bazumanana kuyaambele kumuuya nobayanzana ambungano yankobazwa. Bausyi bakaamba kuti: “Kuliyumya mubukkale oobu kwandigwasya kuba muntu uulomene. Mazuba aainda, lusyomo lwangu lwasunkwa munzila zili mbozibede, pele Jehova wandigwasya kutazungaana! Ndilizyi kuti kupenzyegwa kuli akati kazintu nzyotusala ciindi notulyaaba kubelekela Jehova.”

• Mucizyi Efigenia Semente uukkala ku Namibia, alimwi uujisi bana botawe wakaba apenzi lipati ilyakasunka kusyomeka kwakwe. Ciindi naakali mucibbadela katumbuka mwanaakwe watatu, zintu tiizyakeenda kabotu alimwi basilisi bamwi antoomwe ababbululu bakwe ibatali Bakamboni bakabweza cipepa kunkuta icaamba kuti abikkwe bulowa nayanda natayandi. Mucizyi Semente wakakaka kubikkwa bulowa alimwi awalo wakabelesya nkuta kuti imugwasye nkaambo wakalijisi nguzu zyakulisalilla busilisi mbwayanda. Mu June 24, 2015, Nkuta Mpati yaku Namibia yakatobela ncaakaamba Mucizyi Semente, alimwi yakaamba kuti “inguzu zyakusala cintu ceelede kucitwa naa citeelede kucitwa aamulwazi, kunyina makani naa muntu ooyo muzyali naa pe, ninguzu nzyajisi muntu umwi aumwi alimwi tazyeelede kukazyigwa pe.” Mucizyi Semente wakaamba kuti:  “Twakalimvwa kuti Jehova ncobeni wakali kutugwasya. Eelo kaka ncibotu kapati kuba cibeela cabunyina eeci. Masimpe Jehova ulatulanganya.”

• Bakamboni mucisi ca Switzerland balakkomana kutola lubazu mubukambausi bwakubuleya mumigwagwa yamumadolopo mapati. Nokuba boobo, balupati-pati bamudolopo lya Geneva bakabikka mulawo uukasya kubikka “masitaandi aajisi mabbuku naa makani aali woonse aamba zyabukombi mubuleya.” Bakamboni bakatola matongoosi aabo kunkuta, kabakankaizya kuti ikukasya kubikka makani aali woonse aabukombi ikubelesya masitandi “kukazya mulawo uuzumizya bantu kwaanguluka kukomba munzila njobayanda.” Nkuta yakazumina, aboobo Bakamboni bazwidilila mukubelekela antoomwe abalupati-pati bamudolopo ikujana busena bweelede alimwi aciindi cakucita bukambausi bwakubuleya kwiinda mukubelesya masitaandi.

• Nkumenkume zyamumfwulumede mucisi ca Azerbaijan zyayaambele kunyonganya zintu zyakumuuya nzyobacita Bakamboni ba Jehova. Kanji-kanji mutabi uulanganya bukwabilizi bwacisi uutegwa Ministry of National Security inga wiita Bakamboni ba Jehova akubabuzya-buzya. Kuyungizya waawo, bacibeela camfwulumende eeci alimwi inga balanjila mumaanda aa Bakamboni kuti  bayandaule mabbuku aabukombi aatazumizyidwe a Mfwulumende ikunjila mucisi. Bantu bazwa muzisi ziindene-indene bakagambwa ciindi mu February 2015 ibamutabi wamfwulumende uutegwa Ministry of National Security nobakaanga Bakamboni ba Jehova bobilo, ba Irina Zakharchenko aba Valida Jabrayilova, akaambo buyo kakubandika njiisyo zyamu Bbaibbele abasimukobonyina. Nokuba kuti tuluuside kapati akaambo kakupenzyegwa ikuli boobu, tulikkomene kuti basikumwaya mucisi ca Azerbaijan tiibajoka musyule pe, pele bazumanana cabusicamba kukambauka “makani mabotu aa Bwami” kuli basimukobonyina.—Mt. 24:14.

• Bakamboni ba Jehova mucisi ca Russia balapenga akaambo kakuti mfwulumende yazumanana kubapenzya akaambo kamilimo yabo yabukombi. Mane buya asunu, mabbuku aa Bakamboni ba Jehova aamba zyabukombi aali 80 aambwa kuti mabi kapati amfwulumende ya Russian Federation. Eeci caamba kuti tacizumizyidwe pe amulawo kumwaya naa kuba abbuku limwi akati kamabbuku aaya aambwa kuti mabi kapati mbuli bbuku lya Bbuku Lyangu lya Makani Aamu Bbaibbele. Kuyungizya waawo, mu December 2014, nkuta mpati yamu Russia yakaamba webbusaiti yesu ya jw.org kuti nimbi kapati. Makkampani aapa kuti bantu kabakonzya kubelesya Intaneti mucisi ca Russia moonse apa kuti bantu batacikonzyi kujalula webbusaiti ya jw.org, alimwi mulawo ulakasya kulumbaizya webbusaiti eeyi. Kuzwa mu March 2015, balupati-pati ibalanganya zintu zinjila mucisi tabaazumizyi kunjila mabbuku aali woonse aa Bakamboni, kubikkilizya ama Bbaibbele alimwi amabbuku aayo musyule oomu nkuta zyamu Russia ngozyakaambide kuti ali buyo kabotu.

Makani acibandikwa munkuta mudolopo lya Taganrog, oomo balupati-pati bamfwulumende mobakapa basikumwaya ibali 16 mulandu wakubikka bubambe alimwi akujanika kumiswaangano yabukombi. Mudolopo lya Samara, balupati-pati bakabweza cipepa kunkuta cakujala mbunga yamumulawo iibelesyegwa a Bakamboni akaambo kakuti baamba kuti nimbi kapati. Nokuba kuti kuli mapenzi aaya manji, bakwesu abacizyi mucisi ca Russia balikanzide kupa ‘zintu zya Leza kuli Leza,’ kakunyina kutyompwa naaceya.—Mt. 22:21.