Tatujisi basololi babbadelwa mumbunga yesu. Muciindi caboobo, mbubwenya mbocakabede ciindi mbungano ya Bunakristo niyakatalika, balangizi beelela balasalwa ‘kutegwa beembele mbungano ya Leza.’ (Milimo 20:28) Baalu aaba mbaalumi basimide kumuuya ibasololela mumbungano alimwi akucita bweembezi, “ikutali cakusinikizyigwa buya pe, pele cakuliyandila kumbele lya Leza; ikutali akaambo kakuyanda kujana mpindu cabumpelenge, pele caluyandisisyo.” (1 Petro 5:1-3) Ino mulimo nzi ngobatucitila?

Balatulanganya alimwi akutukwabilila. Baalu balasololela alimwi akugwasya kukwabilila mbungano kumuuya. Akaambo kakuti balizyi kuti Leza ngookabapa mulimo ooyu uuyandika kapati, tababadyaaminini bantu bakwe, muciindi caboobo balabagwasya kutegwa kabakkomana. (2 Bakorinto 1:24) Mbubwenya mbuli mweembezi mbwabikkila maano kumbelele imwi aimwi, baalu balasoleka kuti babazyibe boonse bali mumbungano umwi aumwi kumugama.—Tusimpi 27:23.

Balatuyiisya mbotukonzya kucita kuyanda kwa Leza. Nsondo ansondo baalu balatuyiisya ciindi camiswaangano yambungano kutegwa bayumye lusyomo lwesu. (Milimo 15:32) Alimwi baalumi aaba balyaabide balatusololela mumulimo wamumuunda, balabeleka andiswe akutuyiisya mbotukonzya kubeleka mumbazu zyoonse zyamulimo wamumuunda.

Balatukulwaizya. Kutegwa batugwasye kuyumya cilongwe cesu a Jehova, baalu balakonzya kutuswaya mumaanda eesu naa kubandika andiswe a Ŋanda ya Bwami kutegwa batugwasye alimwi akutuumbulizya kwiinda mukubelesya Magwalo.—Jakobo 5:14, 15.

Kuyungizya amulimo ngobajisi mumbungano, baalu banji balabeleka milimo yakumubili alimwi balijisi mikuli yamikwasyi yalo iiyanda ciindi cinji alimwi akubikkila maano. Tweelede kubalemeka bakwesu aaba ibabeleka canguzu.—1 Batesalonika 5:12, 13.

• Ino baalu bajisi mukuli nzi mumbungano?

• Muunzila nzi baalu mobatondezya kuti balatubikkila maano?