Cibalo 2

Ibbuku Litondezya Luzibo lwa Leza

1, 2. Nkaambo nzi ncotuyandika busolozi bwa Mulengi wesu?

MMUZEEZO buya wamaanu iwakuti Mulengi wesu siluyando inga ulatwaabila bbuku lyamalailile abusolozi tobantu. Sena tamuzumini na kuti bantu bayandika busolozi?

² Kwiinda amyaka iili 2,500 eeyi yainda, musinsimi alimwi sikwiiya zyaciindi wakalemba kuti: “Muntu ulaya bweenda, pele tabwene kweenzya intaamu zyakwe.” (Jeremiya 10:23) Sunu ikululama kwakaambo aako mane kulalibonya kwiinda lyoonse. Ncencico sikwiiya zyaciindi William H. McNeill, ncaakati: “Ibukkale bwabantu anyika eeyi mmulongo buyo wamapenzi aatobelene amanyongwe mubuleya.”

3, 4. (a) Muunzila nzi motweelede kukulanga kwiiya kwa Bbaibbele? (b) Mbuti mbotutililange-lange Bbaibbele?

³ Ibbaibbele lilazuzikizya busolozi boonse bwabusongo mbotuyandika. Mmasimpe banji balazingwa ciindi citaanzi nobalanga mu Bbaibbele. Ndibbuku lipati, alimwi zibeela zimwi tazili zitete kuziteelela pe. Pesi kuti naa mwaba nomupegwa pepa lyamalailile aamufwu eelyo limulailila nzyomweelede kucita kutegwa mukone lubono lunji, sena inga tamukootola ciindi kulibala kabotu-kabotu? Naa mwajana kuti zibeela zyapepa eeli zimwi zilakatazya kuteelela, mulalangilwa kujana lugwasyo kumuntu uulaa luzibo mutwaambo tuli boobu. Ino Bbaibbele alyalo kuti twalilanga munzila iili boobu? (Incito 17:11) Lyalo lijatikizya zintu zipati kwiinda lubono lwakukona. Mbuli mbutwaiya mucibalo  cainda, iluzibo lwa Leza lulakonzya kutola kubuumi butamani.

⁴ Atulilange bbuku litondezya luzibo lwa Leza. Tulasaanguna kulilanga Bbaibbele mukukosaula-kosaula lyoonse mbolibede. Twamana tulabandika twaambo bantu banji balaa luzibo ncobasyomena kuti ndi Jwi lizwa kuli Leza.

IZILI MU BBAIBBELE

5. (a) Mujanika nzi mu Magwalo aaci Hebrayo? (b) Mujanika nzi mu Magwalo aaci Giliki?

⁵ Ibbaibbele lijisi mabbuku aali 66 muzibeela zyobile, izifwini kutegwa Cizuminano Caciindi a Cizuminano Cipya. Mabbuku aamu Bbaibbele aali 39 akalembwa kapati muci Hebrayo, alimwi aali 27 muci Giliki. Magwalo aaci Hebrayo, alo aajisi mabbuku kuzwa ku Matalikilo kusikila ku Malaki, aamba zyakulenga alimwi amyaka mitaanzi iili 3,500 yabuntu. Notulanga cibeela eeci ca Bbaibbele, tulaiya Leza mbwaakabeleka abana Israyeli—kuzwa kukuzyalwa kwaciinga cabo mumwaanda wa 16 B.C.E. kusikila mumwaanda wa 5 B.C.E. * Magwalo aaci Giliki, alo aajisi mabbuku kuzwa ku Matayo kusikila ku Ciyubunuzyo, atondezya kuyiisya kwa Jesu Kristo abasiciiya bakwe amicito yabo mumwaanda wakusaanguna C.E.

6. Nkaambo nzi ncotweelede kuliiya Bbaibbele lyoonse mbolizulwa?

⁶ Bamwi baamba kuti “Cizuminano Caciindi” ncabama Juda eelyo “Cizuminano Cipya” nca Banakristo. Pele mbuli bwaamba 2 Timoteo 3:16, “Magwalo aya oonse akazwa kuli-Leza, alikondede.” Aboobo, iciiyo cini ca Magwalo cileelede kujatikizya Bbaibbele lyoonse mboolibede. Kujanika kuti zibeela eezi zyobile zya Bbaibbele, zilagwasilizyanya, zilanjilana kabotu-kabotu mukupandulula mutwe omwe wamakani.

7. Ibbaibbele lilaa mutwe wamakani nzi?

⁷ Ndiza mwali kuunka kukukomba kwamyaka minji  akumvwa Bbaibbele kalibalwa cakupozya. Antela nywebo lwenu ndiza mubalide zibeela-beela zimwi. Sena mwalizi na kuti Bbaibbele lilikamantene lyoonse kuzwa ku Matalikilo kusikila ku Ciyubunuzyo? Ee, mutwe wamakani uukamantanya zibeela ulajanika mu Bbaibbele. Ino mmutwe nzi walo? Ngwakusinizya nguzu zya Leza izyakulela bantu akuzuzikizya kwamakanze aakwe aaluyando kwiinda mu Bwami bwakwe. Kumbele tuyoobona bwini-bwini Leza mbwayoozuzikizya makanze aaya.

8. Ino Bbaibbele litondezya nzi kujatikizya mbuli mbwabede Leza?

⁸ Kunze lyakutondezya makanze aa Leza, Ibbaibbele lilatondezya mbuli mbwabede walo. Mucikozyanyo, kuzwa mu Bbaibbele tulaiya kuti Leza ulaa mbwalimvwa, akuti kusala nkotusala kulamujatikizya awalo. (Intembauzyo 78:40, 41; Tusimpi 27:11; Ezekiele 33:11) Intembauzyo 103:8-14 yaamba kuti Leza “ngusibuuya, ngusiluse, ulamuka kukalala, ulizwide luzyalo.” Ulatweendelezya mulubomba,  ‘kayeeyede kuti twakabumbwa aabulongo buyo’ akuti notufwa tulapiluka kuli mbubo. (Matalikilo 2:7; 3:19) Ma! Bwabota bube mbwatondezya! Sena tali ngo Leza ngomuyanda kukomba uuli boobu?

9. Ino Bbaibbele litutondezya buti zyeelelo zya Leza, alimwi mbuti mbotunga twagwasigwa aluzibo luli boobu?

⁹ Ibbaibbele lilatutondezya zyeelelo zya Leza cakusalazya. Zimwi ziindi eezi zyeelelo zyaambwa kuba milawo. Pesi kanji-kanji, zilatondezegwa munjiisyo ziyiisigwa kwiinda muzikozyanyo. Leza wakalembya zimwi zyakacitika mu Israyeli yansiku kuti kazitugwasya. Aaya makani aatasisikizi atondezya zicitika ciindi bantu nobabelekela antoomwe amakanze aa Leza alimwi amause aaletwa ciindi nobatola nzila yabo beni. (1 Bami 5:4; 11:4-6; 2 Makani 15:8-15) Cakutadooneka ikubala makani aaya aacitikide ncobeni kuyoojatikizya myoyo yesu. Kuti twazyeezeezya zyakacitika izilembedwe, inga twakonzya kulyeezyanya abantu aabo bakajatikizidwe mulinzinzyo. Munzila eeyi, tulakonzya kugwasigwa azikozyanyo zibotu akutantamuka ziteyo zyakaca basikucita zibi. Nokuba boobo mubuzyo ooyu mupati uyandika kwiingula: Ino inga twaba buti masimpe kuti eeco ncotubala mu Bbaibbele cizwa kuli Leza?

SENA INGA MWALISYOMA BBAIBBELE?

10. (a) Nkaambo nzi bamwi ncobayeeya kuti Bbaibbele ndyakaindi? (b) Ino 2 Timoteo 3:16, 17 itwaambila nzi kujatikizya Bbaibbele?

¹⁰ Ambweni mulibwene kuti mabbuku manji aapa kulaya alaba akaindi mumyaka misyoonto buyo. Ino mbuti lyalo Bbaibbele? Ndyaciindi loko, kwiindide myaka iitandila ku 2,000 kuzwa lyakalembwa mabala aalyo eelezya. Aboobo bamwi bayeeya kuti talibeleki pe mumazubaa sunu. Pesi kuti naa Bbaibbele lizwa kuli Leza, ikulaya kwalyo kweelede lyoonse kakubeleka nokuba kwaciindi. Imagwalo eelede kaacili “alikondede kukufundisya akukulaya, akukuolola akukupandulula makani aabululami, kuti muna-Leza alibambe, azulile kukumana milimo mibotu yoonse.”—2 Timoteo 3:16, 17.

11-13. Nkaambo nzi ncotunga twaambila kuti Bbaibbele lilabeleka naaba mazuba ano?

 ¹¹ Notulangisya kujanika kuti njiisyo zya Bbaibbele zilabeleka kapati sunu mbubwena mbuli nozyakalembwa-lembwa. Mucikozyanyo, ikwaamba mbuli zyabuntu, Ibbaibbele lilatondezya kuteelela kwalo kujatikizya mazyalani oonse aabantu. Eeci ncuubauba kubona mu Makani aa Jesu aa Cilundu, alo aajanika mubbuku lya Matayo, caandaano 5 kusikila ku 7. Makani aaya akamubotela kapati mufwu Mohandas K. Gandhi iwakali musololi mucisi ca India cakuti waambwa kuti wakaambila simfulumende muna Britain kuti: “Ciindi cisi cenu acesu zyaakuzuminana aziyiisyo zyakaambwa a Kristo mu Makani aaya aa Cilundu, tunooli twaakonzya mapenzi, kutali esu alo, pele aanyika yoonse mbwiizulwa.”

¹² Anu nceeci bantu ncozibabotela ziyiisyo zya Jesu! Mu Makani aa Cilundu, wakatutondezya nzila iitola kukukondwa kwini. Wakapandulula mbokubambwa twaambo. Jesu wakapa malailile aambuli mbokweelede kupailwa. Wakatondezya ciimo cabusongo kujatikizya ziyandika kumubili amane wakapa Mulawo Mubotu wakuyanzana kabotu abambi. Ikubona bumpelenge bwamubukombi akubaa bukkale bwakuliiba kumbele twakali tumwi twatwaambo ntwaakabikkilizya mumakani aaya.

¹³ Mu Makani aa Cilundu alimwi amumapeeji oonse aacaala, Ibbaibbele lilacisalazya kwaamba ncotweelede kucita ancotweelede kutantamuka kutegwa tusumpule bukkale bwesu. Ikulaya kwandilyo kulagwasya cakuti umwi mwiiyi cakamupa kwaamba kuti: “Nokuba kuti ndili sikulaya uulaa bachelor’s a master’s degree kucikolo casekondali, akuti ndakabalide mweelwe mupati wamabbuku aajatikizya buponi bwakumizeezo a psychology, ndakajana kuti kulaya kwa Bbaibbele kujatikizya zintu zili mbuli lukwatano luzwidilila, kukasya bumpelenge bwabakubusi, alimwi ambokujanwa ambokubambwa balongwe kulainda kule-kule ali zeezyo kufwumbwa nzindakabalide kukkoleji.” Kunze lya kugwasya akubeleka sunu, Ibbaibbele lilasyomeka.

 LILILUZI ALIMWI LILASYOMEKA

14. Ninzi citondezya kuti Bbaibbele lilazuminana asayaansi?

¹⁴ Nokuba kuti Bbaibbele talili bbuku liyiisya sayaansi, lilazuminana asayaansi. Mucikozyanyo, iciindi bunji bwabantu nobakali kusyoma kuti nyika ilipapalede, imusinsimi Isaya wakaikozyanisya a “mubalo” (muci Hebrayo, chugh, lyalo aawa ililaa bupanduluzi bwa “cibulungene”). (Isaya 40:22) Muzeezo wanyika iibulungene teewakaduma kusikila mane nokwakainda zyuulu zyamyaka kuzwa mazuba aa Isaya. Kuyungizya ali ceeci, Jobu 26:7—yalo yakalembwa myaka yiinda ku 3,000 musule—yaamba kuti Leza ulimu “kwaanzika nyika kutakwe ciliko.” Mboobu mbwaamba umwi sikwiiya zya Bbaibbele: “Jobu mbwaakaziba kasimpe kalo katondezedwe alwiiyo lwazyamujulu, ikwaamba kuti nyika ilalengelela kiiliiminide mumwaako, mmubuzyo uutapasunuki ino kuli baabo bakazya kuti Magwalo Aasalala taazwi [kuli Leza].”

15. Ino lusyomo lwesu mu Bbaibbele luyumizigwa buti anzila yandilyo yakuluula makani?

¹⁵ Ayalo nzila ya Bbaibbele yakuluula makani ilaluyumya lusyomo lwesu mubbuku eeli lyansiku. Ikwiimpana azyaano, izintu zyaambwa kucitika mu Bbaibbele zijatikizigwa abantu beni-beni amadeti. (1 Bami 14:25; Isaya 36:1; Luka 3:1, 2) Nokuba kuti kaindi basikulemba zyaciindi bakali kukukomezya kuzunda kwamami aabo akusisa kuzundwa akulubizya kwabo, basikulemba Bbaibbele teebakali kusisikizya alimwi bakali kusyomeka—nokuba kujatikizya zibi zyabo zipati.—Myeelwe 20:7-13; 2 Samuele 12:7-14; 24:10.

IBBUKU LYABUSINSIMI

16. Mbumboni nzi bupati kwiinda ibutondezya kuti Bbaibbele lizwa kuli Leza?

¹⁶ Ibusinsimi buzuzikizidwe bupa citondezyo cisinizya kuti Bbaibbele lizwa kuli Leza. Ibbaibbele lilaa businsimi bunji buzuzikizidwe kale cakumaninina. Aino bantu buyo tabakonzi kuceendelezya eeci. Ninzi ino iceendelezya businsimi oobu? Ibbaibbele ndilyona lyaamba kuti “teensi luyando lwamuntu lwakaleta businsimi kalekale, pe, pele bantu  ba-Leza bakaamba mbobakasungulwa [m]uuya wa-Leza,” antela nguzu zya Leza zibeleka. (2 Petro 1:21) Amweezeezye zikonzyanyo zimwi.

17. Mbusinsimi nzi bwakaambilizya kuwa kwa Babuloni, alimwi bwakazuzikizigwa buti?

¹⁷ Ikuwa kwa Babuloni. Isaya a Jeremiya boonse bakakwaambilizya ikuwa kwa Babuloni kuli ba Mediya aba Persia. Icigambya ncakuti, businsimi bwa Isaya bwakalembwa imyaka iili 200 Babuloni katana kuzundwa! Izibeela zyabusinsimi oobu eezi zitobela lino ntwaambo tulembedwe buya mulwiiyo lwazyaciindi: ikuyuminizya Mulonga Firate kwiinda mukunyona maanzi aawo kuya muziba lyakupanga (Isaya 44:27; Jeremiya 50:38); ibuyamba bujatikizya zitendele zya Babuloni zyaamilonga (Isaya 45:1); akusaalwa amuleli uutegwa Koresi.—Isaya 44:28.

18. Ino businsimi bwa Bbaibbele bwakazuzikizigwa buti mukubuka akuwa kwa “mwami waba-Helene”?

¹⁸ Ikubuka akuwa kwa “mwami waba-Helene.” Mucilengaano Daniele wakabona sijembwe wauma mugutu, wamutyola ameja akwe obile. Kumane lwija lupati lwasijembwe lwakatyolwa, mpoona mubusena bwalyo kwakamena meja one. (Daniele 8:1-8) Cakapandululwa boobu kuli Daniele: “Mugutu ngowakabona uuli ameja obile—nkokuti bami ba-Mediya aba-Persia. Asijembwe uuli aboya ngumwami waba-Helene, aluja lupati luli akati kameso aakwe ngumwami mutaanzi. Lino mbubonya mbowakabona kuti, luja nelwakatyoka, kwakamena ambi one mucibaka calo, nkokuti mami one ayoozwa mubwami obo, pele taakooyooelana abo munguzu.” (Daniele 8:20-22) Ikuzuzikizya businsimi oobu, nokwakainda myaanda yamyaka yobile, “mwami waba-Helene,” Alesandro Mupati, wakabuzunda bwami bulaa meja obile bwa Mediya a Persia. Alesandro wakafwa mumwaka wa 323 B.C.E. eelyo mukuya kwaciindi kwakanjila masilikani bakwe bapati bone mubusena bwakwe. Nokuba boobo, kwiina bulelo akati kayaaya aakatobela ibwakeelana kunguzu a bwami bwa Alesandro.

19. Mbusinsimi nzi bwakazuzikizigwa muli Jesu Kristo?

 ¹⁹ Buumi bwa Jesu Kristo. Magwalo aaci Hebrayo ajisi businsimi bunji bwakazuzikizigwa mukuzyalwa, kubeleka, kufwa akubuka kwa Jesu. Mucikozyanyo, kakucili myaka yiinda ku 700, Mika wakaambilizya kuti Mesiya, antela Kristo, uya kuzyalilwa mu Betelehemu. (Mika 5:2; Luka 2:4-7) Awalo Isaya iwakali kupona kuciindi ca Mika, wakaambililzya kuti Mesiya wakali kuya kuumwa akuswidwa mate. (Isaya 50:6; Matayo 26:67) Kakucili myaka iili 500 kumbele, Zekariya wakasinsima kuti Mesiya uya kwaabwa amali aansiliva aali 30. (Zekariya 11:12; Matayo 26:15) Kakucili myaka yiinda kucuulu, Davida wakaambilizya ziyoocitika iziswaangene alufwu lwa Jesu Mesiya. (Intembauzyo 22:7, 8, 18; Matayo 27:35, 39-43) Kakucili myaanda yamyaka yosanwe, Daniele wakasinsima ciindi Mesiya naya kulibonya alimwi abulamfwu bwamulimo wakwe aciindi calufwu lwakwe. (Daniele 9:24-27)  Ooku nkuzubaula-zubaula buyo kwabusinsimi bwakazuzikizigwa muli Jesu Kristo. Ciyoomubotela ikubala azimbi zinji kapati izijatikizya nguwe kumbele.

20. Ibusinsimi bwamu Bbaibbele bulondokede ibuzuzikizidwe bweelede kutupa lusyomo nzi?

²⁰ Abumbi businsimi bunji bwamu Bbaibbele bwalo bujatikizya ciindi cilamfwu bulizuzikizidwe kale. Inga mwabuzya kuti, ‘Pele ino eci cibujatikizya buti buumi bwangu?’ Mboobuya, ikuti muntu umwi wamwaambila masimpe kwamyaka minji, sena inga mwamudooneka aamba cintu cipya? Peepe! Leza walikwaamba kasimpe mu Bbaibbele lyoonse. Sena eci taceelede kuyaka lusyomo lwenu muzisyomezyo zya Bbaibbele, mbuli businsimi bujatikizya paradaiso yaanyika? Mmasimpe, inga twabaa lusyomo mbuli lwakajisi Paulo, umwi wabasiciiya ba Jesu bamumwaanda wakusaanguna, walo wakalemba kuti ‘Leza tabeji.’ (Tito 1:2) Kunze lyazeezi, ciindi notubala Magwalo akubelesya kulaya kwangayo, tubelesya busongo ibantunsi mbobatakonzi kujana lwabo beni, nkaambo Bbaibbele ndebbuku litondezya luzibo lwa Leza ilutola kubuumi butamani.

‘AMUYANDISYE’ LUZIBO LWA LEZA

21. Ninzi ncomweelede kucita kuti zimwi nzyomwiiya mu Bbaibbele zyabaanga zyamuzinga?

²¹ Mbomuyaabwiiya Bbaibbele, mulalangilwa kujana zintu zimwi ziindene azeezyo nzyomwakayiisigwa musule. Ambweni muyoojana akuti zimwi ziyanza zyenu zyabukombi nzyomuyandisya tazimuboteli Leza. Muyoojana kuti Leza ulaa zyeelelo zyaciluzi acilubide izisumpukide kwiinda zeezyo zivwulide munyika eeyi iitakwe makani azicitwa. Eeci ciyoobaanga camuzinga kumatalikilo. Pesi amukkazike moyo! Amwaalange kabotu-kabotu Magwalo kutegwa mujane luzibo lwa Leza. Kamulibambilide kuti kulaya kwa Bbaibbele kulakonzya kumuyanzya kuti mubambulule kuyeeya kwenu amicito munzila imwi.

22. Nkaambo nzi ncomwiiya Bbaibbele, alimwi mbuti mbomunga mwagwasya bambi kuti baciteelele eeco?

²² Balongwe abasazinyoko basinizizye inga bakukazya  kwiiya kwenu kwa Bbaibbele, pesi Jesu wakati: “Umwi aumwi uundizumina kubusyu bwabantu, ambebo nzoomuzumina kubusyu bwa-Taata uuli kujulu. Pele umwi aumwi uunditama kubusyu bwabantu, ambebo nzoomutama kubusyu bwa-Taata uuli kujulu.” (Matayo 10:32, 33) Bamwi inga bayoowa kuti mulanjila cikombelo citobela muntu antela mulaba bantu baintide. Pele kwaamba ncobeni, ncomusola kucita nkujana luzibo luluzi ilwa Leza akasimpe kakwe. (1 Timoteo 2:3, 4) Kutegwa mugwasye bambi kuciteelela eeci, amube bantu batete, kutali basinkazi, ciindi nomwaambaula ambabo kujatikizya nzyomwiiya. (Ba-Filipi 4:5) Amuyeeye kuti mbanji basandulwa “kakunyina akubelesya majwi” ciindi nobabona zitondezyo zyakuti luzibo lwa Bbaibbele lulabagwasya ncobeni bantu.—1 Pita 3:1, 2, Ci.

23. Mbuti mbomunga mwaba ‘aluyandisisyo’ kuluzibo lwa Leza?

²³ Ibbaibbele litukulwaizya boobu: “Amukozye mbuli bavwanda kukuyandisya mukupa wamuuya uutavwelwi acintu.” (1 Petro 2:2) Imuvwanda uponena abusani bubotu ibuzwa kuli banyina alimwi ulazumanana kulilila ceeco ncayandika. Munzila njiyona aswebo tuyooponena aluzibo lwa Leza. ‘Amuyandisye’ Jwi lyakwe kwiinda mukuzumanana kwiiya kwenu. Ee, aibe mbaakani yenu ikubala Bbaibbele abuzuba. (Intembauzyo 1:1-3) Eeci ciyoomuletela zilongezyo zipati, nkaambo Intembauzyo 19:11 yaamba boobu kujatikizya mbeta zyamilawo ya Leza: “Kuzibamba nkokuleta bulumbu bupati.”

Bupanduluzi buyungizidwe

AMULISUNKE LUZIBO LWENU

Muunzila nzi Bbaibbele molitali mbuli mabbuku ambi?

Nkaambo nzi ncomunga mwalisyoma Bbaibbele?

Ninzi kulindinywe cisinizya kuti Bbaibbele ndi Jwi lizwa kuli Leza?

[Mibuzyo yaciiyo]

[Kabbokesi kali apeeji 14]

AMULIBELESYE KABOTU BBAIBBELE LYENU

Kuziba Bbaibbele lyenu takweelede kukatazya buya pe. Amubelesye peeji lyazili mukati kwiiya mbwaatobelene mabbuku aa Bbaibbele alimwi ampaabede.

Mabbuku aa Bbaibbele alaa zyaandaano atupango ikugwasya kulangaula. Izyaandaano zyakabikkwa mumwaanda wa 13 alimwi kulibonya kuti mumwaanda wa 16, muncini wakusimbya waku France wakakosaula Magwalo aaci Giliki mutupango tuli sunu. Ibbaibbele likkwene litaanzi kubaa manamba aacaandaano aatupango lyakali limwi lyaci French lyalo lyakamwaisigwa mu 1553.

Ciindi magwalo naa ambwa mubbuku eeli, namba yakusaanguna itondezya caandaano, kakuli iitobela yaamba kapango. Mucikozyanyo, “Tusimpi 2:5” caamba kuti, ibbuku lya Tusimpi, caandaano ca 2, kapango ka 5 [antela caandaano cipati ca 2, cisyoonto ca 5]. Kwiinda mukulangaula magwalo aambidwe, talikalampi mulatalika kuubilwa kujana zibalo zyamu Bbaibbele.

Inzila yiinda kugwasya mukuziba Bbaibbele nkulibala abuzuba. Kumatalikilo eeci inga calibonya kuyuma-yuma. Pesi kuti kamubala kuzwa kuzyaandaano zyotatwe kusikila kuli zyosanwe abuzuba, muyoomana kulibala lyoonse Bbaibbele mumwaka omwe. Sena tamukonzi kutalika sunu na?

[Kabbokesi kali apeeji 19]

IBBAIBBELE—IBBUKU LILIBEDELEDE

• Ibbaibbele “[li]zwa kuli-Leza.” (2 Timoteo 3:16) Nokuba kuti bantunsi mbabakaalemba majwi, Leza wakayeendelezya mizeezo yabo, cakuti kwaamba ncobeni Ibbaibbele “Mmajwi aa Leza.”—1 Batesalonika 2:13, Ci.

• Ibbaibbele kulembwa lyakatola ciindi cilampa myaanda yamyaka iili 16, abalembi bali 40 baindele-indene loko. Nokuba boobo icakabambwa ncintu cizuminene kuzwa kumatalikilo kusikila kumamanino.

• Ibbaibbele lyafwutuka manjaka kwiinda bucitide limbi bbuku. Bantu bakali kutentwa acisamu Kaindi akaambo buyo kakuti bakajisi kkopi lya Magwalo.

• Ibbaibbele ndetaanzi kumabbuku aainda kuulwa munyika. Lilisandulwidwe lyoonse mbolibede antela zibeela-beela, mumilaka yiinda ku 2,000. Izyuulu zyamamiliyoni aamakkopi zilisimbidwe, alimwi ccita naa kuli kubusena anyika ikunga takukoojanwa kkopi lyalyo.

• Icibeela ca Bbaibbele icaciindi kapati cilasika kumwaanda wa 16 B.C.E. Eeci ciindi teelyakalina kulibonya bbuku lya Rig-Veda ilyaci Hindu (munsi-munsi amwaka wa 1300 B.C.E.), antela bbuku lya “Mulawo wa Zinzuma Zyotatwe” lyaci Buddha (mumwaanda wasanu B.C.E.), antela Korani yamu Isilamu (mumwaanda waciloba C.E.), alimwi a Nihongi yaci Shinto (mu 720 C.E.).

 [Cifwanikiso icili apeeji 20]