Jesu Kristo—Kkii Waluzibo lwa Leza
Cibalo 4
Jesu Kristo—Kkii Waluzibo lwa Leza
1, 2. Mbuti zikombelo zyamunyika mbozyamunyonganya kkii waluzibo lwa Leza?
MULIIMVWI amulyango kamupakalisya makkii enu. Kulatontola anze alimwi kuli mudima, muliyandide kapati kunjila mukati—pesi kkii tabeleki. Walo ubaanga ngonguyo, ino cikulukulu taciputi pe. Ino cilatyompya kaka eeco! Mwaalanga alimwi makkii enu. Mwati ngangayo buya? Sena ndiza kuli wiinyonganya kkii eeyi?
2 Eeci nciimo cipandulula kabotu kukopana kwabukombi bwamunyika eeyi ncokwacita kuluzibo lwa Leza. Ikwaamba bwini, banji bamunyonganya kkii uujula luzibo oolu kuti luteelelwe—Jesu Kristo. Zikombelo zimwi zyamugusya kkii kwiinda mukutamubikkila maanu Jesu nokuceya. Bamwi baunyonganya mulimo wa Jesu, balamukomba mbuli Leza Singuzuzyoonse. Kufwumbwa mbocinga calangwa, lulijalidwe kulindiswe iluzibo lwa Leza kuti kakutakwe kumuteelelesya muntu ooyu mupati mumakani aaya, Jesu Kristo.
3. Nkaambo nzi Jesu ncanga ulategwa ngokkii waluzibo lwa Leza?
3 Ndiza mulayeeya kuti Jesu wakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Mukwaamba boobu Jesu taakali kutwanga buya pe. Ciindi aciindi Magwalo alasimpya kwaamba kuti kulayandika kuzibisya Kristo. (Ba-Efeso 4:13; Ba-Kolose 2:2; 2 Petro 1:8; 2:20) “Basinsimi boonse balasinizya anguwe [Jesu Kristo],” mbwaakacilemba mwaapostolo Petro. (Incito 10:43) Awalo mwaapostolo Paulo wakalemba ategwa: “Mulinguwe [Jesu] muzisisidwe imbono zyoonse zyamaanu azyaluzibo.” (Ba-Kolose 2:3) Mane Paulo wakaamba akuti zisyomezyo zya Jehova zyoonse zilacitika akaambo ka Jesu. (2 Ba-Korinto 1:20) Aboobo Jesu Kristo ngonguwe kkii waluzibo lwa Leza. Luzibo lwesu lwa mbuli mbwabede Jesu alimwi amulimo wakwe mububambe bwa Leza lweelede kaluluzi. Ino nkaambo nzi basikumutobela Jesu ncobamubona kuti ngomupati mumakanze aa Leza?
MESIYA UUSYOMEZEDWE
4, 5. Mbulangizi nzi bwakayeeme ali Mesiya, alimwi basiciiya ba Jesu bakali kumulanga buti?
4 Kuzwa kuciindi ca Abelo muntu uusyomeka, babelesi ba Leza bali kululangila kapati Lunyungu lwakaambilizigwa a Jehova Leza lwakwe. (Matalikilo 3:15; 4:1-8; Ba-Hebrayo 11:4) Kwayubululwa kuti Lunyungu oolo luyooba Mesiya, icaamba “Munanike” mumakanze aa Leza. Wakali kuzoopa kuti “zibi zimanisigwe,” alimwi kubota kwa Bwami bwakwe kwakaambilizigwa muntembauzyo. (Daniele 9:24-26; Intembauzyo 72:1-20) Nguni ino wakali kuzooba Mesiya?
5 Kamuyeeya buyo mbwaakazwigwa moyo mukubusi mu Juda Andreya naakamvwa majwi aa Jesu waku Nazareta. Andreya wakavwuumuka kuya kumunyina Simoni Petro akuyoomwaambila ategwa: “Twamujana Mesiya.” (Johane 1:41) Basiciiya ba Jesu bakasyoma kuti ngu Mesiya uusyomezedwe. (Matayo 16:16) Ibanakristo balilisungwide kupa buumi bwabo akaambo kakusyoma kuti Jesu ncobeni ngu Kristo antela Mesiya ooyo wakaambilizigwa. Ino balaa zisinizyo nzi? Atulange nzila zyotatwe zyabumboni.
BUMBONI BWAKUTI JESU WAKALI NGO MESIYA
6. (a) Mulongo nzi wamazyalane iwakali kuzoozyala Lunyungu lusyomezedwe, alimwi tuzi buti kuti Jesu wakaboola kwiinda mumukwasyi ooyo? (b) Nkaambo nzi ncocitakonzeki kumuntu uuli woonse uupona muciindi eeci kuzwa mu 70 C.E. ikusinizya makani kuti walyaamba kuba Mesiya?
6 Mulongo wamazyalane aa Jesu nceceeleko cakusaanguna icakumuziba kuba Mesiya uusyomezedwe. Jehova wakaambila mubelesi Wakwe Abrahamu kuti Lunyungu lusyomezedwe luyoozwa mumukwasyi wakwe. Izaka mwanaa Abrahamu, Jakobo mwanaa Izaka, a Juda mwanaa Jakobo umwi aumwi wakapegwa cisyomezyo cili boobu. (Matalikilo 22:18; 26:2-5; 28:12-15; 49:10) Imulongo wamazyalane aa Mesiya wakacesyegwa nokwakainda myaanda yamyaka ciindi Mwami Davida naakaambilwa kuti mukwasyi wakwe nguwakali kuzoomuzyala Ooyo. (Intembauzyo 132:11; Isaya 11:1, 10) Malembe aa Makani Mabotu aa Matayo a Luka alakasinizya kaambo kakuti Jesu wakaboola kwiinda mumukwasyi ooyo. (Matayo 1:1-16; Luka 3:23-38) Nokuba kuti Jesu wakalaa basinkondonyina bamusulide loko, taakwe umwi wabo iwakakazya mulongo wamazyalane aakwe walo wakamwaisidwe loko. (Matayo 21:9, 15) Aboobo kulalibonya kuti mulongo wamazyalane aakwe ncintu citakwe mbocikazigwa pe. Nokuba boobo, malembe aamikwasyi yaci Juda akanyonyoonwa abana Roma nobakasaala Jerusalemu mumwaka wa 70 C.E. Kuziindi zyakumbele kwiina muntu wakali kunookonzya kusinizya kuti ngo Mesiya uusyomezedwe pe.
7. (a) Ncitondezyo nzi cimbi cakuti Jesu ngowakali Mesiya? (b) Mbuti Mika 5:2 mbuyakazuzikizigwa kujatikizya Jesu?
7 Businsimi buzuzikizidwe ncitondezyo cimbi. Businsimi bunji bwamu Magwalo aaci Hebrayo bulapandulula mbazu ziindene-indene izyabuumi bwa Mesiya. Mumwaanda walusele B.C.E., musinsimi Mika wakaambilizya kuti ooyu muleli mupati wakali kuzoozyalilwa mumunzi uutakwe mpuwo wa Betelehemu. Minzi yobile mu Israyeli yakaulikwa kuti Betelehemu, pesi businsimi oobu bwakuugama buya kuti ngu Betelehemu-Efrata, ooko kwalo Mwami Davida nkwaakazyalilwa. (Mika 5:2) Josefa a Mariya, bazyali ba Jesu, bakali kukkala ku Nazareta, makkilomita aali 150 kuya kunyika kuzwa mu Betelehemu. Pesi ciindi Mariya naakamisi, muleli waku Roma Kaisara Augusto wakalailila bantu boonse kuti bakalilembye kuminzi nkobazwa. * Aboobo Josefa wakayandika kuti atole mukaintu wakwe uumisi ku Betelehemu, ooko kwakaakuzyalilwa Jesu.—Luka 2:1-7.
8. (a) Ndilili nozyakatalika “nsondo” zili 69 alimwi ncinzi cakacitika kuciindi eeco? (b) Ino “nsondo” zili 69 zyakali zilamfwu buti, alimwi ninzi cakacitika nozyakamana?
8 Mumwaanda wacisambomwi B.C.E., musinsimi Daniele wakaambilizya kuti “mwami uunanikidwe [Mesiya]” wakali kuzoolibonya “insondo” zili 69 kuupedwe mulawo wakubusya awakuyakulula Jerusalemu. (Daniele 9:24, 25) Yomwe yomwe “insondo” yakali kulampa myaka iili musanu aibili. * Kutobela zyaamba Bbaibbele alimwi amalembe aanyika aazyabaciindi, mulawo wakuyakulula Jerusalemu wakapegwa mumwaka wa 455 B.C.E. (Nehemiya 2:1-8) Aboobo Mesiya wakeelede kuzoolibonya myaka iili 483 (ba 69 ibali 7) kuzwa mumwaka wa 455 B.C.E. Kubala ooko kutusisya mumwaka wa 29 C.E., nguwena mwaka Jehova naakamunanika muuya uusalala Jesu. Oobu Jesu wakazooba “Kristo” (icaamba “Munanike”), antela Mesiya.—Luka 3:15, 16, 21, 22.
9. (a) Ino Intembauzyo 2:2 yakazuzikizigwa buti? (b) Mbusinsimi nzi bumwi bwakazuzikizigwa muli Jesu? (Amubone ccaati.)
9 Aino tali woonse muntu wakamuzumina Jesu kuti ngo Mesiya uusyomezedwe, alimwi Magwalo akacisinsima eeci. Mbuli mbokulembedwe ku Intembauzyo 2:2, Mwami Davida mumuuya wa Leza wakaamba kuti: “Bami baansi balalibamba, abalo beendelezi balalayana, kukulwisya Jehova amunanike wakwe.” Oobu businsimi bwakatondezya kuti basololi batazwi mucisi comwe bakali kuzookamantana kutegwa bamucise Munanike wa Jehova, antela Mesiya. Mbubwena oobo mbucakazooba. Ibasololi bacikombelo ba Juda, Mwami Heroda amweendelezi muna Roma Ponto Pilato boonse bakatola lubazu mukujaya Jesu. Heroda a Pilato ibakali basinkondonyina bakaba balongwe bayanzene kapati kuzwa ciindi eeco. (Matayo 27:1, 2; Luka 23:10-12; Incito 4:25-28) Kutegwa mubone azimbi zisinizyo zyakuti Jesu ngowakali Mesiya, amulange ccaati iisindikizya cibalo iilaa mutwe wakuti “Businsimi Bumwi Bupati Bujatikizya Mesiya.”
10. Muunzila nzi Jehova mwaakapa bukamboni bwakuti Jesu ngo Munanike wakwe ngwaakasyomezya?
10 Ibukamboni bwa Jehova Leza acalo ncitondezyo cimbi cizuminizya kuti Jesu ngo Mesiya. Jehova wakatuma bangelo kuyoozibya bantu kuti Jesu ngu Mesiya wakasyomezegwa. (Luka 2:10-14) Atwaambe ciindi Jesu naakali kupona anyika, Jehova lwakwe mwini wakaamba kuzwa kujulu, kutondezya kumuzumina Jesu. (Matayo 3:16, 17; 17:1-5) Jehova Leza wakamupa nguzu Jesu kuti kacita maleele. Yomwe yomwe yazeezi ncito cakali cisinizyo cimbi cizwa kuli Leza icakuti Jesu ngu Mesiya, nkaambo Leza takwe naakali kunga ulapa nguzu kumuntu sikulicengeezya kuti kacita maleele pe. Alimwi Jehova wakabelesya muuya wakwe uusalala kulembya Makani Mabotu, cakunga zitondezyo zyakuti Jesu ngo Mesiya zyakazooba cibeela ca Bbaibbele, ibbuku liinda kusandululwa akumwaisigwa kuzwa kaindi.—Johane 4:25, 26.
11. Zitondezyo zinji buti izisinizya kuti Jesu ngo Mesiya?
11 Kuzibikka antoomwe, eezi nzila zyabumboni zilajatikizya myaanda yatwaambo tuzibya Jesu kuti ngo Mesiya uusyomezedwe. Aboobo cilalibonya kuti Banakristo beni-beni baliluzi kumubona kuti ngonguwe uutegwa “basinsimi boonse balasinizya anguwe” akuti ngo kkii waluzibo lwa Leza. (Incito 10:43) Pele nzinji zyakwiiya kujatikizya Jesu Kristo kwiinda kwalo ikuti ngu Mesiya. Ino wakazwa kuli? Wakali muntu uli buti?
JESU KATANA KUBA MUNTUNSI
12, 13. (a) Ino tuzi buti kuti Jesu wakaliwo kujulu katana kuboola anyika? (b) Ino “Ijwi” nguni, alimwi ninzi ncaakacita katana kuba muntunsi?
12 Buumi bwa Jesu bulakonzya kwaandaanizigwa muzibeela zyotatwe. Cakusaanguna cakatalika kakucili ciindi cilamfwu katana zyalwa anyika. Mika 5:2 yakaamba kuti Mesiya ‘ngwakalekale, ngwamazuba aaciindi loko.’ Alimwi Jesu wakacisalazya kwaamba kuti wakazwa “kujulu.” (Johane 8:23; 16:28) Ino wakakkala ciindi cilamfwu buti kujulu katana boola anyika?
13 Jesu wakali kutegwa ngu “simuzyalwa alike” wa Leza nkaambo Jehova lwakwe kumugama nguwakamulenga. (Johane 3:16) Mbwaakali “mutaanzi kuzyalwa kuzilenge zyoonse,” Jesu kuzwaawo wakabelesegwa a Leza mukulenga zintu zyoonse zimbi. (Ba-Kolose 1:15; Ciyubunuzyo 3:14) Johane 1:1 yaamba kuti “Ijwi” (Jesu katana kuba muntunsi) wakali aa Leza “kumatalikilo.” Aboobo Ijwi wakali a Jehova ciindi “ijulu anyika” nozyakalengwa. Leza wakali kwaambila Jwi ciindi Walo naakati: “Atupange muntu mucinkozya cesu.” (Matalikilo 1:1, 26) Mbubwena buyo, Ijwi weelede nguwakali “mwana” wa Leza uuyandwa, oobuya busongo bupedwe buntu ku Tusimpi 8:22-31, bwalo bwakali kubeleka antoomwe a Jehova mukupanga zintu zyoonse. Jehova naakamana kumulenga, ooyu Ijwi wakakkala ciindi a Leza kujulu katana kuzooba muntu anyika.
14. Nkaambo nzi Jesu ncaambwa kuba “cikozyano ca-Leza uutabonwi”?
14 Anu ncencico bbuku lya Ba-Kolose 1:15 Jesu ncolimwaamba kuba “cikozyano ca-Leza uutabonwi”! Kwiinda mukubaamwi ciindi citaambiki coonse eco, ooyu Mwana uumvwa wakazooba buyo mbubwena mbuli Wisi, Jehova. Aaka nkaambo kambi Jesu ncali kkii kuluzibo lwa Leza ilupa buumi. Zyoonse zintu Jesu nzyaakacita naakali anyika nzizyona awalo Jehova nzyaakali kunga ulacita. Aboobo, kuziba Jesu kumwi caamba kuyungizya luzibo lwesu lwa Jehova. (Johane 8:28; 14:8-10) Aboobo cilalibonya kuti ncintu cipati kwiiya azimbi kujatikizya Jesu Kristo.
BUUMI BWA JESU ANYIKA
15. Ino Jesu wakazyalwa buti kali mwana uulondokede?
15 Mucibeela cabili mubuumi bwakwe, Jesu wakali waano anyika. Wakalisungula ciindi Leza naakali kulonzya buumi bwakwe kuzwa kujulu kuya mwida lya musimbi usyomeka mu Juda uutegwa Mariya. Inguzu zyakwe, antela muuya wa Jehova uusalala wanguzu, ‘wakamuvunikila’ Mariya kumupa kuti amite kuti muciindi akatumbuke mwana uulondokede. (Luka 1:34, 35) Jesu taakazyalwa katalondokede, mbokunga ibuumi bwakwe bwakazwa ku Ntalisyo iilondokede. Wakakomezegwa mumunzi uutakwe mpuwo kali mwana wakulela kumubezi Josefa alimwi wakali ngomutaanzi akati kabana bali mbobabede mumukwasyi.—Isaya 7:14; Matayo 1:22, 23; Marko 6:3.
16, 17. (a) Nkuli Jesu nkwaakajana nguzu zyakucita maleele, alimwi akali maleele nzi amwi? (b) Mbube nzi bumwi Jesu mbwaakatondezya?
16 Ikusungwaala kwa Jesu mukukomba Jehova Leza kwakali kulibonya kale ciindi naakalaa myaka iili 12. (Luka 2:41-49) Naakakomena akutalika mulimo wakwe kalaa myaka iili 30, Jesu wakatondezya aluyando lwakwe lupati kubantunyina. Imuuya uusalala wa Leza nuwakamupa nguzu zyakucita maleele, wakaponya balwazi, balema, baliciside, boofwu, basyaataambi, basicinsenda. (Matayo 8:2-4; 15:30) Jesu wakasanina zyuulu zyabantu bafwide nzala. (Matayo 15:35-38) Wakaumuzya guwo lyakali kunoobikka buumi bwabalongwe bakwe muntenda. (Marko 4:37-39) Nobaba bafwu abalo wakababusya. (Johane 11:43, 44) Aaya maleele nzintu zisinizidwe loko. Nobaba basinkondonyina bakazumina kuti Jesu “ulacita malele manji.”—Johane 11:47, 48.
17 Jesu wakeendeenda mucisi cakwabo, ikuyaabuyiisya bantu zya Bwami bwa Leza. (Matayo 4:17) Wakaba citondezyo cibotu camuntu uukkazika moyo alimwi imubombe kuli bamwi. Nociba ciindi basiciiya bakwe nobakamutyompya, mukweetela wakati: “Walo moyo ulayandisya pele mubili wabula nguzu.” (Maako 14:37, 38, Ci) Nokuba boobo, Jesu wakali sicamba alimwi takwe naakeenkela kusinsa baabo baubyaubya kasimpe akudyaaminina bantu batakwe nguzu. (Matayo 23:27-33) Icipati kwiinda zyoonse ncaakacita Jesu nkwiiya citondezyo ca Wisi caluyando. Mane Jesu wakalilisungwide nokuba kufwa kutegwa bantu batalondokede babe abulangizi bwabuumi kumbele. Anu ncobeni Jesu ncotumwaamba kuti ngo kkii wa luzibo lwa Leza! Ee, ngukkii uupona! Nkaambo nzi ncotwaamba kuti kkii uupona? Ooyu mubuzyo utuleta kucibeela catatu mubuumi bwakwe.
JESU SUNU
18. Mbuti mbotweelede kumuyeeyela Jesu Kristo sunu?
18 Nokuba kuti Bbaibbele lilaamba kuti Jesu wakafwa, lino ulapona! Atwaambe myaanda yabantu bakali kupona mumwanda wamyaka wakusaanguna C.E. bakalibonena ameso kuti wabusigwa. (1 Ba-Korinto 15:3-8) Mbuli mbokwakasinsimwa, kuzwa ciindi eeco wakakkala kululyo lwa Wisi akulindilila kupegwa nguzu zyabwami kujulu. (Intembauzyo 110:1; Hebrayo 10:12, 13) Aboobo mbuti mbotweelede kumuyeeyela Jesu sunu? Sena mmuvwanda uutakwe anguzu uulede mucilido? Antela ndiza mmwaalumi uuli mukupenga uujaigwa? Peepe. Mmwami singuzu uulela! Alimwi ino-ino, uyoobutondezya buleli bwakwe anyika yesu eeyi iinyongene.
19. Nintaamu nzi Jesu njayootola ino-ino?
19 Ku Ciyubunuzyo 19:11-15, Mwami Jesu Kristo ulatondezegwa kabotu-kabotu kaboola anguzu zinji kuzoojaya babi. Ma! Ooyu Muleli wakujulu siluyando weelede uliyandide kapati kumana mapenzi aakatazya mamiliyoni aabantu sunu! Alimwi mbubwena oobu uliyandide kugwasya baabo basoleka kwiiya citondezyo ncaakapa naakali anyika. (1 Petro 2:21) Uyanda kubavwuna “kunkondo yabuzuba bupati bwa-Leza Singuzuzyoonse,” yalo iifwini kwiitwa kuti Harmagedoni, kutegwa bakakonzye kubaa buumi butamani kabali basikulelwaa Bwami bwa Leza bwakujulu.—Ciyubunuzyo 7:9, 14; 16:14, 16.
20. Ino Jesu uyoobacitila nzi bantu mu Bulelo bwakwe bwa Cuulu ca Myaka?
20 Mu Bulelo bwa Jesu bwaluumuno oobo bwa Cuulu ca Myaka ibwakaambilizigwa, uyoocita maleele kugwasya bantu boonse. (Isaya 9:6, 7; 11:1-10; Ciyubunuzyo 20:6) Jesu uyooponya malwazi oonse akumanya lufwu. Alimwi uyoobusya zyuulu zyamamiliyoni aabantu kutegwa abalo bakakonzye kupona anyika. (Johane 5:28, 29) Twasyoma muyookondwa kwiiya azimbi zijatikizya Bwami bwakwe bwabu Mesiya mucibalo cicili kumbele. Kamusyoma kuti tatukonzi akweezeezya kubota kwabuumi bwesu mubulelo bwa Bwami. Ncintu cipati kumuziba kabotu Jesu Kristo! Ee, tuyandika kuti tutabi notumuluba Jesu, kkii uupona waluzibo lwa Leza ilutola kubuumi butamani.
Bupanduluzi buyungizidwe
^ munc. 7 Ooku kulembya kwakapa kuti cuubeube ku bulelo bwaba Roma kubweza mitelo. Aboobo Augusto cakutaliyeeyela wakagwasya kuzuzikizya businsimi bujatikizya muleli wakali ‘kuzootuma sikutezya koonse koonse mucisi.’ Mbubwena businsimi bwakaambilizya kuti “mwami wacizuminano,” antela Mesiya wakali kuya “kupwayika” mumazubaa sikutobela muleli ooyo mubuleli. Jesu wakajaigwa muciindi lyakali kulela Tiberiyo, iwakatobela Augusto mubuleli.—Daniele 11:20-22.
^ munc. 8 Bama Juda bansiku bakalifwini kuyeelela nsondo zyamyaka. Mucikozyanyo, mbubwena mbuli buzuba bwamusanu aabili mbubwakali buzuba bwa Sabata, mwaka wamusanu aibili wakali mwaka wa Sabata.—Kulonga 20:8-11; 23:10, 11.
AMULISUNKE LUZIBO LWENU
Mbuti mulongo wamazyalane aa Jesu mbuusinizya kuti Jesu ngu Mesiya?
Mbusinsimi nzi bumwi bwabu Mesiya bwakazuzikizigwa a Jesu?
Mbuti Leza lwakwe mbwaakatondezya kuti Jesu ngo Munanike wakwe?
Nkaambo nzi Jesu ncali ngokkii uupona waluzibo lwa Leza?
[Mibuzyo yaciiyo]
[Ccaati iili apeeji 37]
BUSINSIMI BUMWI BUPATI BUJATIKIZYA MESIYA
BUSINSIMI CICITIKA KUZUZIKIZIGWA
BWANA BWAKWE
Isaya 7:14 Kuzyalwa kumusimbi Matayo 1:18-23
Jeremiya 31:15 Kujaigwa kwabana Matayo 2:16-18
amana kuzyalwa
MULIMO WAKWE
Isaya 61:1, 2 Wakatumwa a Leza Luka 4:18-21
Isaya 9:1, 2 Mulimo wakwe wakabonya Matayo 4:13-16
bantu mumuni mupati
Intembauzyo 69:9 Busungu kuŋanda ya Jehova Johane 2:13-17
Isaya 53:1 Kutasyomwa Johane 12:37, 38
Zekariya 9:9; Kunjila mu Jerusalemu Matayo 21:1-9
Intembauzyo 118:26 amwanaa mbongolo; kute-
mbaulwa kuti ngo mwami akuti
nguuboola muzina lya Jehova
KUTAMWA KWAKWE AKUFWA
Intembauzyo 41:9; 109:8 Umwi mwaapostolo tasyomeki; Incito 1:15-20
waaba Jesu kwabikkwa
umbi abusena bwakwe
Zekariya 11:12 Waabwa amali aansiliva aali 30 Matayo 26:14, 15
Intembauzyo 27:12 Bakamboni babeji Matayo 26:59-61
babelesyegwa
Intembauzyo 22:18 Zyakusama zyakwe Johane 19:23, 24
zyawaalilwa cisolo
Isaya 53:12 Kubalilwa antoomwe Matayo 27:38
abasikusotoka mulawo
Intembauzyo 22:7, 8 Kusampaulwa mukufwa Marko 15:29-32
Intembauzyo 69:21 Kupegwa waini uupapa Marko 15:23, 36
Isaya 53:5; Kuyaswa Johane 19:34, 37
Isaya 53:9 Kuzikkwa abavwubi Matayo 27:57-60
Intembauzyo 16:8-11 Kubusigwa katanabola Incito 2:25-32;
[Cifwanikiso icili apeeji 35]
Leza wakasungula Jesu kuti kaponya balwazi
