Nokuba kuti mwasolekesya buti kuba alukkomano mucikwati alimwi amumukwasyi wanu, inga kwacitika zintu nzyomwatali kulangila izipa kuti cimuyumine kuzumanana kuba aalukkomano. (Mukambausi 9:11) Caluyando, Leza ulatupa lugwasyo notwaba amapenzi. Ikuti mwazibelesya njiisyo zyamu Magwalo zitobela, nywebo amukwasyi wanu muyoocikonzya kuliyumya nomuba mubukkale bukatazya kapati.

NCOLYAAMBA BBAIBBELE: “Kamuwaala makatazyo aanu oonse kulinguwe, nkaambo ulamubikkila maano.” (1 Petulo 5:7) Lyoonse kamuyeeya kuti Leza tayelede kupegwa mulandu akaambo kamapenzi aanu. (Jakobo 1:13) Mbomuyaabuswena kuli nguwe, uyoomugwasya munzila mbotu kwiinda. (Isaya 41:10) “Amutule myoyo yanu kulinguwe.”—Intembauzyo 62:8.

Alimwi muyoojana luumbulizyo nomubala akwiiya Bbaibbele abuzuba. Ikuti mwacita oobo, muyoolibonena Jehova ‘mbwatuumbulizya mumapenzi eesu oonse.’ (2 Bakolinto 1:3, 4; Baloma 15:4) Umusyomezya kuti uyoomupa “luumuno lwa Leza oolo lwiinda kumvwisya koonse.”—Bafilipi 4:6, 7, 13.

NCOMUKONZYA KUCITA:

• Amupaile kuli Jehova kutegwa amugwasye kubatama alimwi akuyeeya kabotu

• Amwiinduluke zintu nzyomwasala kucita akusala nzila iinda kubota

NCOLYAAMBA BBAIBBELE: “Moyo uucenjede ulalijanina luzibo, Akutwi kwamusongo kulayandaula luzibo.” (Tusimpi 18:15) Amutuzyibe twaambo toonse. Amubuzye kutegwa muzyibe ncayandika umwi aumwi wamumukwasyi wanu. Kamubandika ambabo. Amubaswiilile.—Tusimpi 20:5.

Ino mbuti kuti umwi mumukwasyi wafwa? Mutayoowi kutondezya mbomulimvwa. Amuyeeye kuti naba Jesu “yakamweenda misozi.” (Johane 11:35; Mukambausi 3:4) Kulyookezya alimwi akoona kwaciindi cilamfwu akwalo kulayandika. (Mukambausi 4:6) Eeci ciyoopa kuti cimuubile kuliyumya mubukkale bukatazya.

NCOMUKONZYA KUCITA:

• Kakutanaba mapenzi, amube acilengwa cakubandika amukwasyi wanu. Eeci ciyoopa kuti kabaliiba kubandika andinywe ciindi nokwaba mapenzi

• Amubandike abamwi ibakali mubukkale buli boobo

NCOLYAAMBA BBAIBBELE: “Muzwalani ulayandisya kuziindi zyoonse, Alimwi munyina wazyalilwa mapenzi.” (Tusimpi 17:17) Beenzinyoko inga bayanda kumugwasya, pele inga kabatazyi ncobeelede kucita. Mutawayiwayi kubaambila cini ncomuyanda. (Tusimpi 12:25) Alimwi amujane lugwasyo lwakumuuya kuli baabo balimvwisya kabotu Bbaibbele. Lulayo luzwa mu Bbaibbele ndobakonzya kumupa luyoomugwasya.—Jakobo 5:14.

Muyoogwasyigwa kuti lyoonse kamwiizya abantu bajisi lusyomo muli Leza amuzisyomezyo zyakwe. Alimwi muyoolimvwa kuumbulizyigwa kapati mwanoogwasya baabo bayandika kukulwaizyigwa. Amwaambile bamwi zintu nzyomusyoma kujatikizya Jehova alimwi azisyomezyo zyakwe. Lyoonse amube azintu zinji zyakucita kwiinda mukugwasya bantu bayandika lugwasyo alimwi mutalizanduli kubantu bamuyanda alimwi ibamubikkila maano.—Tusimpi 18:1; 1 Bakolinto 15:58.

NCOMUKONZYA KUCITA:

• Amubandike amweenzinyoko ngomumvwana limwi kapati kutegwa amugwasye

• Amwaambe masimpe zintu zini nzyomuyandika